މަހުން މަހަށް ނެރޭ ޓޫރިޒަމްގެ ތަފާސް ހިސާބުތައް ނެރުން މި މަހު މަޑުޖެހިއްޖެ އެވެ.
މިދިޔަ މެއި މަހުގެ ރިޕޯޓު ޓޫރިޒަމް މިނިސްޓްރީން އާންމުކުރީ ޖޫން ތިނެއްގަ އެވެ. އާންމު އުސޫލުގެ ދަށުން ކޮންމެ މަހަކުވެސް ނިމުން މަހުގެ ރިޕޯޓު، ފެށޭ މަހުގެ ފުރަތަމަ ހަފުތާގެ ތެރޭގައި އާންމުކުރެ އެވެ.
ނަމަވެސް މި މަސް ދެބައިވިއިރުވެސް ޖޫން މަހުގެ ރިޕޯޓު އާންމުކޮށްފައެއް ނުވެ އެވެ. މަހުގެ ރިޕޯޓުތަކުގެ އިތުރުން ޓޫރިސްޓުން ރާއްޖެ އަންނަ ނަމްބަރުތަކާއެކު ކޮންމެ ދުވަހަކު ނެރޭ ތަފާސް ހިސާބުތައް ނެރުންވެސް މިހާރު ވަނީ މަޑުޖެހިފަ އެވެ. އެ ރިޕޯޓު އެންމެ ފަހުން ނެރެފައިވަނީ މި މަހު އަށެއްގަ އެވެ.
މިކަމާ ގުޅިގެން "އަދަދު" އިން ސުވާލުކުރުމުން ޓޫރިޒަމް މިނިސްޓްރީގެ އިންފޮމޭޝަން އޮފިސަރު ވިދާޅުވީ، މި ހަފުތާގެ ތެރޭގައި ޖޫން މަހުގެ ތަފާސް ހިސާބުތައް އާންމުކުރާނެ ކަމަށް މިނިސްޓްރީގެ ސްޓެޓިސްޓިކްސް ޑިޕާޓްމަންޓުން ބުނި ކަމަށެވެ.
"މި ދޭތެރެއިން ސްޓެޓްސްގެ އެއް ބޭފުޅަކު ޗުއްޓީގަ އުޅުމާއި އަނެއް ބޭފުޅާ ވަރަށް ބޮޑަށް ބަލިވެ އުޅުއްވާތީ އަޕްލޯޑުނުވެ އޭނީ،" އޭނާ ވިދާޅުވި އެވެ.
ޓޫރިޒަމްގެ ރިޕޯޓުތައް މަޑުޖެހިފައިމިވަނީ ރާއްޖެއަށް ޓޫރިސްޓުން އަންނަ އަދަދު ދަށްވެ އެ ދާއިރާވެސް މަޑުޖެހިފައިވާ ދުވަސްވަރެއްގަ އެވެ. މިއީ އާންމުކޮށްވެސް ރާއްޖެއަށް އޮފް ސީޒަނެވެ. ނަމަވެސް މި އަހަރުގެ އޮފް ސީޒަނުގައި ފަތުރުވެރިން އަންނަ މިންވަރު ވަނީ ކުރީ އަހަރުތަކާ އަޅާ ބަލާއިރު ދަށަށް ގޮސްފަ އެވެ.
މިދިޔަ މަހަކީ ދޮޅު އަހަރު ދުވަހުގެ ތެރޭގައި ރާއްޖެ އަށް އެންމެ މަދުން ޓޫރިސްޓުން އައި މަސް ކަމަށް ޓޫރިޒަމް މިނިސްޓްރީން އާންމުކުރި ތަފާސްހިސާބުތަކުން ދައްކަ އެވެ. ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިދިޔަ މަހު ރާއްޖެ އައިސްފައިވަނީ 119,875 ޓޫރިސްޓުންނެވެ. މިދިޔަ އަހަރުގެ މޭ މަހު ރާއްޖެ އައީ 120,959 ޓޫރިސްޓުންނެވެ.
