ސިހުރު ހެދިކަމުގެ ތުހުމަތުކޮށް ފުލުހުން ހައްޔަރުކޮށްފައި ހުރި ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް ޖަލުގައި 20 ދުވަސް ގެންގުޅުމަށްފަހު ކޯޓަށް ނުގެންގޮސް މިއަދު ދޫކޮށްލައިފި އެވެ.
ޖޫން 23، ގައި ފުލުހުން ހައްޔަރު ކުރީ ޝަމްނާޒް އާއި އޭނާގެ އެއްބަނޑު އެއްބަފާ ކޮއްކޮ ހައްވާ ސަނާ އަލީ ސަލީމް އާއި ސިހުރު ހެދި ކަމަށް ބުނާ މުލީއާގޭގެ ކުރީގެ ކައްކާ ތ. ކިނބިދޫ، ނިވައިދޮށުގޭ، ހުސައިން ސަމީރެވެ.
އެ މައްސަލައިގައި ހައްޔަރުކުރި ސަނާ އާއި ހުސައިން ސަމީރު ވެސް ވަނީ ދޫކޮށްލާފަ އެވެ. އޭގެ ތެރެއިން ސަނާ ބަންދުން ދޫކޮށްލީ މިއަދު ޝަމްނާޒްއާއެކީ އެވެ. ހުސެއިން ސަމީރު ދޫކޮށްލީ ޖުލައި 1، ގަ އެވެ.
ޝަމްނާޒް ހައްޔަރުކުރިއިރު ގާތުން ދޭ އެއް އަހަރާއި ފަސް މަހުގެ ކުއްޖަކު ހުއްޓެވެ. ނަމަވެސް ބަންދުގައި ހުރި 20 ދުވަހުގެ ތެރޭގައި ގާތުން ދިނުމަށް ފުރުސަތު ދީފައެއް ނުވެ އެވެ.
އެއީ ޝަމްނާޒް އާއި ރައީސް އޮފީހުގެ މިނިސްޓަރު އާދަމް ރަމީޒުގެ ތުއްތު ކުއްޖެކެވެ. ރަމީޒު ވަނީ މިދިޔަ މަހުގެ ތެރޭގައި ޝަމްނާޒް ވަރިކޮށްފަ އެވެ. ޝަމްނާޒް ހައްޔަރު ކުރި ފަހުން ސަރުކާރުން ވަނީ ރަމީޒު މަގާމުން ސަސްޕެންޑުކޮށްފަ އެވެ.
މައްސަލައިގައި ހައްޔަރުކުރި ޝަމްނާޒް ތިމާވެއްޓާ ބެހޭ މިނިސްޓްރީގެ ސްޓޭޓް މިނިސްޓަރުކަމުން ވަނީ ވަކިކޮށްފަ އެވެ. އަދި އޭނާގެ ކޮއްކޮ ސަނާ ވަނީ އެންވަޔަރަމަންޓް މިނިސްޓްރީގެ ސީނިއާ ޕޮލިޓިކަލް ޑިރެކްޓަރުކަމުން ވަކިކޮށްފަ އެވެ.
