ރާއްޖެ-އެމެރިކާގެ ޓްރޭޑް އެންޑް އިންވެސްޓްމަންޓް ފްރޭމްވޯކް (ޓީއައިއެފްއޭ) ކައުންސިލުގެ ތިންވަނަ ބައްދަލުވުން އެމެރިކާގެ ވޮޝިންޓަންގައި ބާއްވައިފި އެވެ.
އިކޮނޮމިކް މިނިސްޓަރު މުހައްމަދު ސައީދު ކޯޗެއާކަން ކުރެއްވި އެ ބައްދަލުވުމުގައި އެމެރިކާއިން ދެކުނު އަދި ސެންޓްރަލް އޭޝިއާއަށް ކަނޑައަޅުއްވާފައި ހުންނެވި އެސިސްޓެންޓް ޓްރޭޑް ރިޕްރެސެންޓޭޓިވް ބްރެންޑަން ލިންޗްގެ އިތުރުން ދެ ގައުމުގެ އިސްވެރިން ބައިވެރިވެވަޑައިގެންނެވި އެވެ.
އެމެރިކާގެ ޓްރޭޑް ރިޕްރެޒެންޓޭޓިވް އޮފީހުން ނެރުނު ނޫސް ބަޔާނެއްގައި ބުނީ މިނިސްޓަރު ސައީދު އަދި ލިންޗް ވަނީ އެ ބައްދަލުވުމުގައި ދެ ގައުމުގެ އިގްތިސާދީ ގުޅުން އިތުރަށް ވަރުގަދަކޮށް، ކުރިއެރުމަށް އިންވެސްޓްމަންޓްތަކާ ގުޅޭގޮތުން މަޝްވަރާ ކުރައްވާފައި ކަމަށެވެ.
ރާއްޖޭގެ ފަރާތުން ބައްދަލުވުމަށް ރާއްޖޭގެ ފަރާތުން ރައީސް ޑރ. މުހައްމަދު މުއިއްޒުގެ އިގްތިސާދީ ސިޔާސަތު ހުށަޅައި، އެ ހުށަހެޅުމަށް ދެވެން އޮތް އެންމެ ފުރިހަމަ އެއްބާރުލުމަށް ވަނީ އެދިފަ އެވެ.
އޭގެއިތުރުން، ރާއްޖޭގައި މާލީ، ކަނޑުގެ ދާއިރާއިން، ރިއަލް އެސްޓޭޓް އަދި ޓޫރިޒަމް ދާއިރާއިން އިންވެސްޓް ކުރެވޭނެ ފުރުސަތުތައް ރާއްޖޭގެ ވަފްދުން ވަނީ ފާހަގަކުރައްވާފަ އެވެ.
ދެ ގައުމުން ވެސް ވަނީ މުވައްޒަފުންގެ ހައްގާއި، ޑިޖިޓަލް ޓްރޭޑް އަދި ތިމާވެށީގެ ގޮތުން ދެމެހެއްޓިނިވި ގޮތެއްގައި ކުރާ މަސައްކަތް އިތުރު ކުރުމަށް އެއްބާރުލުން އިތުރުކުރުމަށް އެއްބަސްވެފަ އެވެ.
އިކޮނޮމިކް މިނިސްޓަރު މުހައްމަދު ސައީދު މިހާރު އެމެރިކާއަށް ކުރައްވަމުން ގެންދަވާ ދަތުރުގެ ތެރެއިން ދިވެހި ސަރުކާރުން އެމެރިކާއާއެކު ރަސްމީ ވިޔަފާރީގެ މަޝްވަރާތައް ކުރައްވަމުންނެވެ.
އެގޮތުން، އެމެރިކާގެ ޗެމްބާ އޮފް ކޮމާސް އިން ރޭވި ރައުންޑް ޓޭބަލް މަޝްވަރާއެއްގައި އެމެރިކާގެ ކޯޕަރޭޓް ދާއިރާގެ އޮފިޝަލުންނާއެކު ވެސް ސައީދު ވަނީ ބައްދަލުކުރައްވާފަ އެވެ.
މި ސަރުކާރުން ރާއްޖެއާ އެމެރިކާއާ ދެމެދު އޮންނަ ހާރިޖީ ގުޅުން ބަދަހިކުރަމުންދާއިރު ހާރިޖީ ވަޒީރު މޫސާ ޒަމީރުވެސް ވަނީ މިދިޔަ މަހު އެމެރިކާއަށް ވަޑައިގެންފަ އެވެ. އެމެރިކާއިންވެސް ދަނީ އިސް އޮފިޝަލުން ފޮނުވާ މަޝްވަރާތައް ބާއްވަމުންނެވެ.
ނަމަވެސް، އެމެރިކާއިން ބޮޑެތި އެހީތަކެއްވާ އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދިމާކޮށް ރާއްޖެއިން އިޒްރޭލުގެ ޕާސްޕޯޓު މަނާކުރަން ނިންމި ނިންމުމާއެކު އެ ގައުމުގެ ސެނެޓުގައި ރާއްޖެއަށް ދަތިކުރަން މަސައްކަތްތަކެއް ކުރި އެވެ. ނަމަވެސް އެކަމުގައި ކުރިއެރުމެއް ލިބިފައެއް ނުވެ އެވެ.
