ސިހުރު ހެދިކަމުގެ ތުހުމަތުކޮށް ހައްޔަރު ކޮށްފައި ހުރި، އެންވަޔަރަމެންޓު މިނިސްޓަރީގެ ކުރީގެ ސްޓޭޓް މިނިސްޓަރު ފާތިމަތު ޝަމްނާޒު އަލީ ސަލީމްއާ ދެކޮޅަށް އެއްވެސް ހެއްކެއް މިހައިތަނަށް ފުލުހުންނަށް ނުދެއްކޭ ކަމަށާއި ޝަމްނާޒުގެ ކުރީގެ ފިރިމީހާ، އާދަމް ރަމީޒުއާ ދެކޮޅަށް ބަޔާން ދީފިނަމަ ދޫކޮށްލާނެ ކަމަށް ފުލުހުން ތަކުރާރުކޮށް ޝަމްނާޒު ގާތުގައި ބުނަމުން ދާކަމަށް ޝަމްނާޒުގެ ލޯޔަރު، އަލީ ޝާހު ވިދާޅުވެއްޖެ އެވެ.
ޝަމްނާޒުގެ މައްސަލައާ ގުޅޭގޮތުން "އަދަދު" އާ ވަހަކަދައްކަމުން ޝާހު ވިދާޅުވީ ޝަމްނާޒުއާ ދެކޮޅަށް އެއްވެސް ހެއްކެއް ފުލުހުންނަށް ނުދެއްކޭއިރު ވެސް، އޭނާ ހައްޔަރު ކޮށްފައި ހުރީ ސިޔާސީ ގޮތުން ފްރޭމް ކޮށްގެން ކަމަށެވެ. އަދި ޝަމްނާޒުގެ ކުރީގެ ފިރިމީހާ، އާދަމް ރަމީޒުއަށް އެނގޭ، ސަރުކާރުގެ ބޮޑެތި ސިއްރުތަކެއް ޝަމްނާޒުއަށް ވެސް އެނގޭ ކަމަށް ޝާހު ވިދާޅުވި އެވެ.
ޝާހު ވިދާޅުވީ "އިރުކޮޅުކޮޅާ ފުލުހުން ގޮސް ޝަމްނާޒު ކައިރީ މި ބުނަނީ އާދަމް ރަމީޒުއާ ދެކޮޅަށް ބަޔާން ދޭށޭ ދޫކޮށްލަ ދޭނަމޭ،" ބުނާ ކަމަށެވެ.
"ކޮންމެ ގޮތެއްވިޔަސް [ކުރީގެ ފިރިމީހާ] ރަމީޒު ފްރޭމް ކުރުމަކަށް، ރަމީޒުއާ ދެކޮޅަކަށް އޭނަ ބަޔާނެއް ނުދޭނެތާ،"
ސިހުރު ހެދުމުގެ ތުހުމަތުގައި ޝަމްނާޒު އާއި އޭނާގެ އެއްބަނޑު އެއްބަފާ ކޮއްކޮ، ހައްވާ ސަނާ ސަލީމް ހައްޔަރު ކުރީ ޖޫން 23 ވަނަ ދުވަހު އެވެ. އޭގެފަހުން ދެ ފަހަރެއްގެ މަތިން ހަތް ދުވަހުގެ މުއްދަތު ޖެހުމަށްފަހު މިދިޔަ ހޯމަ ދުވަހު ވަނީ އެ ދެމީހުންގެ ބަންދަށް އިތުރު ފަސް ދުވަސް ޖަހައިފަ އެވެ.
ތިންފަހަރެއްގެ މަތިން އެމީހުންގެ ބަންދުގެ މުއްދަތު އިތުރު ކުރިއިރު ވެސް ޝަމްނާޒުއާ ދެކޮޅަށް އެއްވެސް ހެއްކެއް ފުލުހުންނަށް ނުދެއްކޭ ކަމަށް ޝާހު ވިދާޅުވި އެވެ.
"ފުލުހުންނަކަށް ބުނެއެއް ނުދެވޭ އޭނާގެ މައްޗަށް އެޕްލައި ކުރެވޭ ގާނޫނީ މާއްދާތައް ހުރީ ކިހިނެއް ކަމެއް ވެސް އެއްވެސް އެއްޗެއް ބުނެއެއް ނުދެވޭ، ހަމައެކަނި ފުލުހުން ބުނާ ބުނުމަށް މުއްދަތު އިތުރު ކޮށްދެނީ، އެއްވެސް އަސާސެއް ހުރެގެން ހެއްކެއް ހުރެގެނެއް ނޫން، އަނިޔާ ލިބުނު ފަރާތެއް ނެތް، ޝަކުވާ ކުރި ފަރާތެއް ނެތް، ޝަކުވާ ކުރި ފަރާތަކީ ކާކުތޯ، މައްސަލަ ހުށަހެޅި ފަރާތަކީ ކާކުތޯ ބުނީމަ ފުލުހުން ބުނަނީ އެއީ އިންޓެލިޖެންސުން ކުރާ ކަމެކޯ،" ޝާހު ވިދާޅުވި އެވެ.
ޝަމްނާޒު ހައްޔަރު ކުރުމުގެ ކުޑަ ދުވަސްކޮޅެއް ކުރިން އާދަމް ރަމީޒް ވަނީ ކޯޓުން ބޭރުން ޝަމްނާޒު ވަރިކޮށްފަ އެވެ.
ޝަމްނާޒު ހައްޔަރު ކުރިއިރު ވެސް ރަމީޒު "އެކަހެރި" ކޮށްފައިވާކަމުގެ އަޑުތައް ހުރީ ގަދަކޮށެވެ. ރައީސް މުއިއްޒުއާ ވަރަށް ގާތްކޮށް މަސައްކަތް ކުރެއްވި އާދަމް ރަމީޒް، ރައީސްއާ އެއްކޮށް ނުފެންނަތާ މަސްތަކެއް ވެއްޖެ އެވެ.
ޝަމްނާޒާއި ރަމީޒު ވެސް ރައީސް މުއިއްޒު މޭޔަރަކަށް ހުންނެވިއިރު ކައުންސިލް މެންބަރުކަން ކުރެއްވި އެވެ. ދެ ބޭފުޅުން ވެސް ކައުންސިލުން އިސްތިއުފާ ދިނީ ސަރުކާރުގެ މަގާމުތަކަށް އައުމަށެވެ.
ޝަމްނާޒުއާއި އޭނާގެ ކޮއްކޮގެ އިތުރުން ސިހުރު ހެދި ކަމަށް ތުހުމަތު ކުރާ، ތ. ކިނބިދޫ ހުސައިން ސަމީރު ވެސް ފުލުހުން ހައްޔަރު ކުރި އެވެ. ނަމަވެސް އޭނާ މިހާރު ވަނީ ޝަރުތުތަކެއް ކުރުމަށްފަހު ބަންދުން ދޫކޮށްލައިފަ އެވެ.
އެ ހުރިހާ އެންމެން ވެސް ހައްޔަރު ކޮށްފައި ވަނީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށް ކަމަށް ފުލުހުން ބުންޏެވެ. ނަމަވެސް އެ ރިޕޯޓާ ގުޅޭ އިތުރު އެއްވެސް މައުލޫމާތެއް ފުލުހުން އާންމެއް ނުކުރެ އެވެ.
ޝާހު ވިދާޅުވީ ޝަމްނާޒުގެ ފަރާތުން ކަމުގެ ހަގީގަތް ސާފުކޮށް، އެކަމާ ގުޅޭގޮތުން ކުރިއަށް އޮތް ތަނުގައި ސާފު މައުލޫމާތު ނޫސްވެރިންނާ ހިއްސާ ކުރާނެ ކަމަށެވެ.
