އިކޮނޮމިކް މިނިސްޓަރު މުހައްމަދު ސައީދު މިހާރު އެމެރިކާއަށް ކުރައްވަމުން ގެންދަވާ ދަތުރުގެ ތެރެއިން ދިވެހި ސަރުކާރުން އެމެރިކާއާއެކު ރަސްމީ ވިޔަފާރީގެ މަޝްވަރާތައް ފަށައިފި އެވެ. މި ދަތުރަކީ ދެ ގައުމުގެ ވިޔަފާރީގެ ގުޅުން ބަދަހިކޮށް އިންވެސްޓްމަންޓު ހޯދުމުގެ ބޭނުމުގައި ކުރާ ދަތުރެކެވެ.
މި މަޝްވަރާތަކުގައި ބައިވެރިވި ރާއްޖޭގެ ވަފުދުގައި މިނިސްޓަރު ސައީދުގެ އިތުރުން އެމެރިކާގައި ހުންނަވާ ރާއްޖޭގެ ސަފީރު އަބްދުލްގަފޫރު މުހައްމަދުގެ އިތުރުން އެސްޓީއޯގެ ސީއީއޯ ޝިމާދު އިބްރާހިމްގެ އިތުރުން ސަރުކާރުގެ އޮފިޝަލުންނާއި ރާއްޖޭގައި ހުންނަވާ އެމެރިކާގެ ސަފީރުވެސް ހިމެނެ އެވެ.
އިކޮނޮމިކް މިނިސްޓްރީގެ އެކްސްގައި ކުރި ޕޯސްޓެއްގައި ބުނެފައިވަނީ މި މަޝްވަރާތަކަކީ އެމެރިކާގެ ޗެމްބާ އޮފް ކޮމާސް އިން ރޭވި ރައުންޑް ޓޭބަލް މަޝްވަރާއެއް ކަމަށެވެ. އަދި މި ބައްދަލުވުމުގައި އެމެރިކާގެ ކޯޕަރޭޓް ދާއިރާއިން އޮފިޝަލުން ބައިވެރިވި ކަމަށްވެސް އެ ވުޒާރާއިން ބުނެފައިވެ އެވެ.
ވިޔަފާރީގެ ގުޅުން ބަދަހިކުރަން ރާއްޖޭގެ ޓީމުން ކުރާ މި ދަތުރު އެންމެ ފުރަތަމަ އިއުލާނުކުރެއްވީވެސް މިނިސްޓަރު ސައީދު އެވެ. އޭނާ އެހެން ވިދާޅުވީ މަޖިލިސް އިންތިހާބާ ދިމާކޮށް ރައީސް ޑރ. މުހައްމަދު މުއިއްޒުއާއި ވަޒީރުންގެ ޓީމަކުން އުތުރަށް ކުރެއްވި ދަތުރެއްގެ ތެރެއިން ފެބްރުއަރީ 27، ގައި ށ. މިލަންދޫގައި ހުންނަވާ ދެއްކެވި ވާހަކައިގަ އެވެ.
މި ސަރުކާރުން ރާއްޖެއާ އެމެރިކާއާ ދެމެދު އޮންނަ ހާރިޖީ ގުޅުން ބަދަހިކުރަމުންދާއިރު ހާރިޖީ ވަޒީރު މޫސާ ޒަމީރުވެސް ވަނީ މިދިޔަ މަހު އެމެރިކާއަށް ވަޑައިގެންފަ އެވެ. އެމެރިކާއިންވެސް ދަނީ އިސް އޮފިޝަލުން ފޮނުވާ މަޝްވަރާތައް ބާއްވަމުންނެވެ.
ނަމަވެސް، އެމެރިކާއިން ބޮޑެތި އެހީތަކެއްވާ އިޒްރޭލުން ފަލަސްތީނުގައި ހިންގަމުންދާ ގަތުލުއާންމާ ދިމާކޮށް ރާއްޖެއިން އިޒްރޭލުގެ ޕާސްޕޯޓު މަނާކުރަން ނިންމި ނިންމުމާއެކު އެ ގައުމުގެ ސެނެޓުގައި ރާއްޖެއަށް ދަތިކުރަން މަސައްކަތްތަކެއް ކުރި އެވެ. ނަމަވެސް އެކަމުގައި ކުރިއެރުމެއް ލިބިފައެއް ނުވެ އެވެ.
