އިންޑިއާގެ ގައުމީ ކްރިކެޓު ޓީމުން ޓީ20 ވޯލްޑް ކަޕު ކާމިޔާބު ކުރުމުން އެކަމުގެ އުފާފާޅުކުރުން ރާއްޖޭގައި ކުރިއަށް ގެންދަން އެމްއެމްޕީއާރުސީ އަދި މަޓީ އިން ދައުވަތު ދީފި އެވެ.
އެމްއެމްޕީއާރުސީއިން މިއަދު ނެރުނު ނޫސް ބަޔާނެއްގައި ބުނީ އިންޑިއާގެ ކާމިޔާބީ ރާއްޖޭގައި ފާހަގަކުރުމަށް އެ ދެ ފަރާތުން ރަސްމީކޮށް އިންޑިއާގެ ގައުމީ ޓީމަށް ދައުވަތު ދީފައިވާ ކަމަށެވެ. އަދި މި ދައުވަތުގައި ރާއްޖެއިން އިންޑިއާގެ ޓީމަށް "ހަނދާނުން ފުހެލަން ބޭނުންނުވާފަދަ ހިތްފަސޭހަ އަދި ލުއިކަން ލިބިދޭ" ޗުއްޓީއެއް ފޯރުކޮށްދޭނެ ކަމަށް ބުނެފައިވާ ކަމަށްވެސް ބަޔާނުގައިވެ އެވެ.
އެމްއެމްޕީއާރުސީގެ މެނޭޖިން ޑިރެކްޓަރު ޑިރެކްޓަރު އިބްރާހިމް ޝިއުރީ އާއި މަޓީގެ ސެކްރެޓަރީ ޖެނެރަލް އަހްމަދު ނަޒީރު އިންޑިއާ ޓީމަށް މަރުހަބާ ވިދާޅުވެފައިވާ ކަން ވެސް އެ ބަޔާނުގައި ފާހަގަކޮށްފައިވެ އެވެ.
މިއީ އިންޑިއާގެ ފަތުރުވެރިން ރާއްޖެއައުން މަދުވެފައިވާ ދުވަސްވަރެއްގައި، އެ މާކެޓު އަލުން ހޯދުމަށް ކުރެވޭ މަސައްކަތެއް ކަމުގައި ބެލެވެ އެވެ. ބަޔާނުގައި ބުނެފައިވަނީ މި ދައުވަތުން ރާއްޖެއާއި އިންޑިއާއާ ދެމެދު އޮތް ޒަމާންވީ ގާތް ގުޅުން ފާހަގަވާނެ ކަމަށެވެ.
މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން އައި އިންޑިއާ މިހާރު އޮތީ ހަ ވަނައިގަ އެވެ. އެ ގައުމުން މިދިޔަ އަހަރުގެ ފުރަތަމަ ހަ މަހު ރާއްޖެ އައި ފަތުރުވެރިންނަށްވުރެ މި އަހަރުގެ ފުރަތަމަ ހަ މަހު އައި ފަތުރުވެރިންގެ އަދަދު 40،000 އާ ގާތްކުރާ އަދަދަކުން ވަނީ ދަށްވެފަ އެވެ.
އިންޑިއާ ފަތުރުވެރިން އައުން ދަށްވެފައި މިވަނީ މި ސަރުކާރު އައުމަށްފަހު އެ ގައުމާއެކު އޮތް ހާރިޖީ ގުޅުން ގޯސްވުމަށްފަހު އެވެ. އެގޮތުން ސަރުކާރުގެ ތިން ނައިބު ވަޒީރަކު އިންޑިއާގެ ބޮޑުވަޒީރު ނަރެންދުރަ މޯދީއަށް ސޯޝަލް މީޑިއާގައި މަލާމަތް ކުރުމާ ގުޅިގެން ރާއްޖެ ބޮއިކޮޓު ކުރުމުގެ ބޮޑު ކެމްޕޭނެއްވެސް އިންޑިއާގައި ކުރިއަށް ގެންދިޔަ އެވެ.
