ދައުލަތުގެ މާލީ ދަތިކަން ބޮޑުވެ، ހަރަދު ކުޑަކުރަން މަސައްކަތް ފަށާފައި ވަނިކޮށް، ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ، ބަދަލުވެވަޑައިގަތުމަށް މ. މުރައިދޫގެ މަރާމާތުކުރުމުގެ މަސައްކަތް ފަށާފައިވާ ކަމަށް އިއްޔެ ރިޕޯޓުކުރި އެވެ.
އެމްޑީޕީ ވެރިކަމުގެ ފުރަތަމަ ކޮޅު އެ ގެ ހުސްކޮށް ހުރުމަށް ފަހު، ރައްޔިތުންގެ މަޖިލީހުގެ އޭރުގެ ރައީސް މުހައްމަދު ނަޝީދު ދިރިއުޅުއްވުމަށް އެ ގެ ހާއްސަ ކުރީ، މެއި 6، 2021 ގައި އެ މަނިކުފާނު އަވަހާރަކޮށްލަން ދިން ބޮމުގެ ހަމަލާ ގުޅިގެންނެވެ.
ބޮމުގެ ހަމަލާގައި ލިބިވަޑައިގެންނެވި ޒަހަމްތަކަށް ފަރުވާ ހޯއްދެވުމަށް ފަހު ރާއްޖެވަޑައިގެން މުރައިދޫ ގޭގައި ނަޝީދު ދިރިއުޅުއްވަން ފެއްޓެވީ 2021 ވަނަ އަހަރު ނޮވެންބަރު މަހުން ފެށިގެންނެވެ. އެ މަނިކުފާނު މަޖިލީހުގެ ރައީސްކަމުން ދުރުކުރަން އެމްޑީޕީން ހުށަހެޅި މައްސަލައިގެ ނޯޓިހާ ގުޅިގެން ޖޫން 2023 ގައި މުރައިދޫގެއިން ނުކުމެވަޑައިގެންނެވި އެވެ.
ނަޝީދަށް ފަހު 19 ވަނަ މަޖިލީހުގެ ރައީސްއަކަށް އިންތިހާބު ކުރެއްވި ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މުރައިދޫގޭގައި ދިރިނޫޅުއްވަ އެވެ.
ނަމަވެސް މިހާރު ކުރިއަށްދާ 20 ވަނަ ރައްޔިތުންގެ މަޖިލީހުގެ ރައީސް ފޮނަދޫ ދާއިރާގެ ރައީސް އަބްދުއްރަހީމް އަބްދުﷲ ދިރިއުޅުއްވުމަށް އެ ގެ ހާއްސަ ކުރައްވައި، އެތަން މަރާމާތު ކުރުން މިހާރު ދަނީ ކުރިއަށެވެ.
"ވަރަށް އަވަހަށް އެތަނަށް ބަދަލުވެވަޑައިގެންނެވުމުގެ މަސައްކަތް ކުރައްވަމުން އެ ގެންދަނީ،" އެކަމުގެ މައުލޫމާތު އެނގޭ މީހަކު ބުންޏެވެ.
"ޖުލައި މަހުގެ ނިޔަލަށް މަރާމާތުގެ މަސައްކަތް ނިމޭނެ ކަމަށް މައުލޫމާތު ލިބިފައިވަނީ."
އަބްދުއްރަހީމް މުރައިދޫގެ އަށް ބަދަލުވެވަޑައިގަންނަވާ ވާހަކަ ރައްޔިތުންގެ މަޖިލީހުން ރަސްމީކޮށް އަދި ހާމައެއް ނުކުރެ އެވެ. އަދި މުރައިދޫގެ މަރާމާތު ކުރަން ހަރަދު ކުރަނީ ކިހާ ފައިސާއެއްކަން ވެސް ހާމައެއް ނުކުރެ އެވެ.
މިހާރު އެ މަނިކުފާނު ދިރިއުޅުއްވަމުން ގެންދަވަނީ، ރެހެންދި ފްލެޓުން ބައްލަވައިގެންނެވި އެޕާޓްމެންޓުގަ އެވެ.
ރައީސް އަބްދުﷲ ޔާމީންގެ ވެރިކަމުގައި މުރައިދޫގެ ކުއްޔަށް ދީފައި ހުރީ އެ މަނިކުފާނުގެ ބޭފުޅުން ދިރިއުޅުއްވުމަށެވެ.
