އިއްޒުއްދީން ސްކޫލުގެ އިމާރާތުގައި ބޮޑު ރެނދެއް ލުމާއި ގުޅިގެން ހަދަމުންދާ އެސެސްމަންޓަށް ފަހު އެ ސްކޫލު އެހެން ބަޔަކަށް ދޫކޮށްލަން ނިންމާފައިވާ ކަމަށް ބުނެ ދެކެވެމުންދާ ވާހަކަތައް އެޑިއުކޭޝަން މިނިސްޓްރީން ދޮގުކޮށްފި އެވެ.
ގްރޭޑް 10 އާ ހަމައަށް ކިޔަވައިދޭ މި ސްކޫލަކީ އެއް ދަންފަޅިއަށް ހިންގާ ސްކޫލެކެވެ. އެމްއީއެސް ސްކޫލު ހިންގި އިމާރާތުގައި އިއްޒުއްދީން ސްކޫލުގެ ނަމުގައި ކިޔަވައިދޭން ފެށީ ޖެނުއަރީ 2020, ގަ އެވެ.
"އިއްޒުއްދީން ސްކޫލުގެ ކުދިން އެހެން ތަނަކަށް ބަދަލު ކުރާނެތޯ ނުވަތަ ނުކުރާނެތޯ ނިންމާނީ ސްކޫލުގެ ކޮންޑިޝަން އިވެލުއޭޓް ކުރުމަށް ފަހު," އެޑިއުކޭޝަނުން މައުލޫމާތު ދިނެވެ.
އިއްޒުއްދީން ސްކޫލާ އިންވެގެން ހުންނަ ވިލާ ކޮލެޖަށް އެ އިމާރާތް ދިގު މުއްދަތަކަށް ދިނުމަށް މަޝްވަރާ ކުރަމުންދާ ކަމުގެ އަޑުތަކެއް ވަނީ ފެތުރިފަ އެވެ. ވިލާ ކޮލެޖަކީ މާމިގިލީ ދާއިރާގެ މެންބަރު ގާސިމް އިބްރާހިމްގެ އަމިއްލަ ކޮލެޖެކެވެ.
"ކޮންމެ ގޮތަކަށް ނިމުނަސް އެ ތަން އެހެން ބަޔަކަށް ނުދޭނެ. އަދި އެހެން ސްކޫލެއް ވެސް އެތަނުގައި ނުހިންގާނެ," އެޑިއުކޭޝަނުން މައުލޫމާތު ދިނެވެ.
ގާތްގަނޑަކަށް 600 އަށްވުރެ ގިނަ ދަރިވަރުން އެ ސްކޫލުގައި ތައުލީމް ހާސިލުކުރަމުންދެ އެވެ.
