ބެންޖަމިން ސެސްކޯ

ބެންޖަމިން ސެސްކޯ

20 އަހަރު

ފޯވާޑް

ސްލޮވީނިއާ / އާރްބީ ލައިޕްޒިގު

ސްލޮވީނިއާ ފުޓްބޯޅައިގައި 21 ވަނަ ގަރުނުގައި އެންމެ ބޮޑަށް މަޝްހޫރުކަން ހޯދީ ދެ ގޯލްކީޕަރުން ކަމަށްވާ، ސާމިރު ހަންޑަނޯވިޗާއި ޔެން އޮބްލަކް އެވެ. އެކަމަކު، މި ފަހަރުގެ ޔޫރޯ ފުޓްބޯޅަ މުބާރާތުގައި އެކަން ބަދަލުވެގެންދާނެ އެވެ. އެއީ، އާރްބީ ލައިޕްޒިގަށް ކުޅެމުން އަންނަ ސްލޮވީނިއާގެ ފޯވާޑް، ބެންޖަމިން ސެސްކޯ އަކީ މި ވަގުތު އެންމެ ފޯމުގައި ކުރިއަރަމުން އަންނަ ޒުވާން ސްޓްރައިކަރެވެ.

ރެޑްބުލް ސަލްޒްބާގުން ވިދާލުމާ އެކު، ލައިޕްޒިގުން ވަނީ ޔޫރަޕްގެ ވަރުގަދަ އެހެން ކްލަބްތަކާ ވާދަކޮށް ސެސްކޯގެ ސޮއި ހޯދައިފަ އެވެ. ލައިޕްޒިގުގައި މި ސީޒަނުގައި ކުޅުނު 31 މެޗުން ސެސްކޯ ވަނީ 14 ލަނޑު ޖަހައިފަ އެވެ. އަދި ސްލޮވީނިއާ ގައުމީ ޓީމަށް މިހާތަނަށް ކުޅުނު 28 މެޗުން އޭނާ ވަނީ 11 ލަނޑު ޖަހައިފަ އެވެ.

ޖަރުމަނުގައި މި ފަހަރުގެ ޔޫރޯ ފުޓްބޯޅަ މުބާރާތް އޮތުމާ އެކު، އެންމެ ބޮޑަށް އޭގެ ފައިދާ ކުރާނެ ކުޅުންތެރިންގެ ތެރޭގައި ސެސްކޯ ހިމެނެ އެވެ. އެއީ ޖަރުމަނު ފުޓްބޯޅަ ސީޒަނަށް ބަލާއިރު އެންމެ ރަނގަޅު ފޯމެއްގައި ހުރި އެއް ކުޅުންތެރިއަކީ އޭނާ ކަމަށް ވުމެވެ.

ޔޫރޯ އަށް ފަހު، ޓްރާންސްފާ ބާޒާރުގައި، ޑިމާންޑް އަރައިގެންދާނެ އެއް ކުޅުންތެރިއެއްގެ ގޮތުގައި ބެލެވޭ ސެސްކޯ ފެނުނީ، ޔޫރޯ ކޮލިފައިންގައި ވެސް ސްލޮވީނިއާގެ މުހިންމު ކުޅުންތެރިއެއްގެ ގޮތުގަ އެވެ. އެ ގޮތުން، ސެސްކޯ ވަނީ ކޮލިފައިންގައި ފަސް ގޯލު ޖަހައިފަ އެވެ.

ޔޫރޯގައި ސްލޮވީނިއާގެ އެޓޭކިން ގޭމްޕްލޭނުގެ ބޮޑުބައެއް ބަރޯސާވާނީ ސެސްކޯ އަށެވެ.