ފްރޭންކްފަޓް (ޖުލައި 1) - ޔޫރޯ ފުޓްބޯޅަ މުބާރާތުގެ ގަދަ 16 ގައި ޕޯޗުގަލްއާ ދެކޮޅަށް ސްލޮވީނިއާ މިރޭ ނުކުންނައިރު، ޕޯޗުގަލް އަށް ލިބޭ އެންމެ ބޮޑު ފައިދާއަކީ އެ ޓީމުގެ ސްކޮޑް ވަރުގަދަވުން ކަމަށް ސްލޮވީނިއާގެ ކޯޗު މަޓްޖަޒް ކެކް ބުނެފި އެވެ.
މި މުބާރާތުގެ ގަދަ 16ގެ ބުރަށް ޕޯޗުގަލް ކޮލިފައިވީ ގުރޫޕް ކުޅުނު ފުރަތަމަ ދެ މެޗުން މޮޅުވެ، ލިބުނު ހަ ޕޮއިންޓާއެކު އެވެ. އެހެންކަމުން، ގުރޫޕްގެ ފަހު މެޗުގައި ޕޯޗުގަލްގެ ކޯޗު ރޮބާޓޯ މާޓިނޭޒް ފުރަތަމަ 11 އަށް ގިނަ ބަދަލުތަކެއް ގެނަ އެވެ. ޖޯޖިއާއާ ދެކޮޅަށް ކުޅުނު ފަހު މެޗުން ޕޯޗުގަލް ވަނީ ބަލިވެފަ އެވެ.
ސްލޮވީނިއާ ގަދަ 16 އިން ޖާގަ ހޯދީ ގުރޫޕް ސްޓޭޖުގައި ކުޅުނު ތިން މެޗު ވެސް އެއްވަރުވެ، ލިބުނު ތިން ޕޮއިންޓާ އެކު އެވެ. އޭގެ ތެރޭގައި އިންގްލެންޑް އަތުން ހޯދި ޕޮއިންޓްވެސް ހިމެނެއެވެ.
މިއީ ސްލޮވީނިއާ ބައިނަލްއަޤްވާމީ މުބާރާތެއްގެ ނޮކްއައުޓް މެޗެއްގައި ވާދަކުރާ ފުރަތަމަ ފަހަރެވެ. މިއީ ސްލޮވީނިއާގެ މިނިވަން ދައުލަތެއް މީގެ 32 އަހަރު ކުރިން އުފެދުނު ފަހުން، ސްލޮވީނިއާ ބައިނަލްއަޤްވާމީ މުބާރާތެއްގައި ވާދަކުރާ ހަތަރު ވަނަ ފަހަރެވެ.
މި މެޗުގެ ކުރިން ސްލޮވީނިއާގެ ކޯޗު މަތިޔާޒް ކެކްގެ ކަންބޮޑުވުމަކަށްވީ ދެ ޓީމުގެ ސްކޮޑުގައި ހުރި ތަފާތެވެ. ސްކޮޑް ވަރުގަދަުވުމަކީ ޕޯޗުގަލްއަށް ލިބޭ އެންމެ ބޮޑު ފައިދާކަމަށް އޭނާ ބުންޏެވެ.
"ޕޯޗުގަލްގެ ލިސްޓް ފެނުނަސް އަހަރެމް ބޮލުގައި ރިއްސާ. ބޭނުން ގޮތަކަށް ޓީމު ބަދަލުކޮށްަލައިގެން އެމީހުންނަށް ކުޅެވިދާނެ،" ކެކް ބުންޏެވެ.
ކެކް ބުނީ ޕޯޗުގަލްއަކީ މުބާރާތުގެ ފޭވަރިޓެއް ކަމަށެވެ. އެކަމަކު ސްލޮވީނިއާ އިން އެ ޓީމު ދެކެ ބިރު ނުގަންނާނެ ކަމަށެވެ.
"ޕޯޗުގަލްއަކީ މުބާޜާތުގެ ފޭވަރިޓެއް. ގުރޫޕްގައިވެސް ސްލޮވީނިއާއަކީ ފޭވަރިޓެއް ނޫން. މާދަމާ (މިރޭގެ މެޗުގައި)ވެސް ސްލޮވީނިއަކީ ފޭވަރިޓެއް ނޫން،" ކެކް ބުންޏެވެ.
"ޕޯޗުގަލް އަކީ މޮޅު ޓީމެއް. އެކަމަކު، އަހަރަމެން އެ ޓީމު ދެކެ ބިރެއްނުގަނޭ."
ޕޯޗުގަލާއި ސްލޮވީނިއާ ބައްދަލުކުރާ މެޗު ފަށާނީ މިރޭ 12 ޖަހާއިރު އެވެ.
