މިއުނިކް (ޖޫން 20) - ވާދަވެރި މެޗަކަށް ނުކުމެ އިދިކޮޅު ޓީމަށް މާ ބޮޑަށް އިހުތިރާމްކޮށްގެން ކުޅެން އުޅުމަކީ ކާމިޔާބު ހޯދަން އޮތް ހުރަހެއް ކަމަށް ސާބިއާގެ ކޯޗު، ޑްރަގަން ސްޓޮޖްކޯވިޗް ބުނެފި އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ސާބިއާ ކުޅުނު ފުރަތަމަ މެޗުގައި ވަނީ 1-0 އިން އިންގްލެންޑް އަތުން ބަލިވެފަ އެވެ. އެ މެޗުގައި އިންްގްލެންޑާ ދެކޮޅަށް ދިމާވީ މާ ބޮޑަށް އެ ޓީމަށް އިހުތިރާމް އާދަކޮށްގެން ކުޅެން އުޅުމުގެ މައްސަލަ ކަމަށާއި ސްލޮވީނިއާއާ ދެކޮޅަށް އެކަން ސާބިއާ އިން ނުކުރާނެ ކަމަށް ކޯޗު ސްޓޮޖްކޯވިޗް ވަނީ ބުނެފަ އެވެ.
"އިންގްލެންޑާ ދެކޮޅަށް އަހަރެމެން ކުޅެން ފެށީ އެ މީހުންނަށް ވަރަށް އިހުތިރާމް ދީގެން، ހީވަނީ އެ މީހުންނަކީ އެހެން ޕްލެނެޓަކުން އައިސްތިބި ބައެއް ހެން،" ސްޓޮޖްކޯވިޗް ބުންޏެވެ.
"އަހަރެމެން އިންގްލެންޑް މެޗުގެ ފަހުކޮޅުގައި ކުޅުނީ ހަގީގަތުގައި ކުޅެން ޖެހޭ ގޮތަށް، އެއީ އަހަރެމެން ސްލޮވީނިއާއާ ދެކޮޅަށް ކުޅެން ޖެހޭނެ ގޮތަކީ ވެސް،"
މި ގްރޫޕްގެ ފުލުގައި މި ވަގުތު ސާބިއާ އޮތްއިރު، މި މެޗުން ސްލޮވީނިއާ އަތުން ބަލިވެއްޖެނަމަ، ސާބިއާ އަށް މުބާރާތުގައި ކުރިއަށް ދިއުމަށް ހުރަސްތަކެއް ކުރިމަތިވާނެ އެވެ. ސްޓޮޖްކޯވިޗް ބުނީ، މި މެޗަށް ނުކުންނަނީ މިއީ ކިހާ މުހިންމު މެޗެއްކަން ދަނެގެން ކަމަށެވެ.
"އަހަރެމެންނަށް ކުރެވެން ހުރި ހުރިހާ ކަމެއް ކޮށްގެން ވެސް މޮޅުވާން ބޭނުން މި މެޗުން، އަހަރެމެން ދެން އޮތް ކޮންމެ މެޗަކުން ވެސް މޮޅުވާން ޖެހޭނެ. ނޫނީ ވައިކިންގްސް އަންނާނެ ނޯތުން، ޑޭންސް އިން، އަހަރަމެން ޖެހޭނެ އެންމެން ބަލިކުރަން،" ސްޓޮޖްކޯވިޗް ބުންޏެވެ.
އޭނާ ބުނީ، ޖަރުމަނުގައި ބައެއް ކަންކަން ހަމަޖެހިފައި ހުރި ގޮތުން އޭނާ އަށް އުނދަގޫތަކަކާ ކުރިމަތިލާން ޖެހޭ ކަމަށެވެ. އެ ގޮތުން، އެކްރެޑިޓޭޝަން ފާހުގައި ފޮޓޯ ހުރި ގޮތުން، ކޮންމެ ފަހަރަކު ގޭޓަކުން ވަންނައިރު، ލަސްތަކެއް ވަމުން އަންނަކަން ސްޓޮޖްކޯވިޗް ފާހަގަކުރި އެވެ.
"ކޮންމެ ފަހަރަކު އަހަރެން ދޮރަކުން ވަންނަން ދާއިރު ތަފާތު ގޮތަކަށް ފާސް އެބަޖެހޭ ސްކޭން ކުރަން، ހީވާ ކަހަލަ މި ވަދެވެނީ ނާސާގެ ޖައްވީ ސްޓޭޝަނަކަށޭ، ސްޓޭޑިއަމަކަށް ނޫނޭ. އަހަރެން ހެވިފައި ނުފެންނަ ސަބަބަކީ އެއީ ކަމަށްވެދާނެ،" ސްޓޮޖްކޯވިޗް ބުންޏެވެ.
ސާބިއާގެ ފިލިޕް ކޮސްޓިޗަށް ފުރަތަމަ މެޗުގައި ލިބުނު އަނިޔާއާ ހެދި ދެން އޭނާ މި މުބާރާތުގައި ނުފެންނާނެ ކަމަށް އެ ޓީމުން ވަނީ ބުނެފަ އެވެ.
ސާބިއާ އާއި ސްލޮވީނިއާ ވަނީ އަށް ފަހަރު ބައްދަލުކޮށްފަ އެވެ. ހަ މެޗު އެއްވަރުވިއިރު، ކޮންމެ ޓީމެއް ވަނީ އެއް މެޗުން މޮޅުވެފަ އެވެ. މިއަދު މި ދެ ޓީމު ކުޅޭ މެޗު ފަށާނީ 6 ޖަހާއިރު އެވެ.
