ޗެކް ރިބަޕްލިކުން 11 ވަނަ ޔޫރޯ ފުޓްބޯޅަ މުބާރާތުގައި ވާދަކުރަން ނުކުންނައިރު، މީގެ ކުރިން އެ ޓީމުން، ތިން ފަަހަރު ވާދަކުރީ ޗެކޮސްލޮވާކިއާގެ ނަމުގަ އެވެ. އޭރު ދެ ފަަހަރު ތިން ވަނަ ހޯދައި، އެއް ފަހަރު ތަށި އުފުލާލި އެވެ. އޭގެ ފަހުން، ހަތް ފަހަރު ޗެކް ރިޕަބްލިކް ނަމުގައި ކުޅުނުއިރު، 2004 ވަނަ އަހަރުގެ ޔޫރޯގައި ސެމީ ފައިނަލަށް ދަތުރުކުރި އެވެ.
އެންމެ ފަހުން ޔޫރޯ ފުޓްބޯޅަ މުބާރާތުގައި ޗެކް ރިޕަބްލިކް ކެޓީ ކުއާޓާ ފައިނަލުންނެވެ. އިންގްލެންޑާއި ކްރޮއޭޝިއާއާ އެއް ގްރޫޕެއްގައި ހިމެނުނު ޗެކް ރިޕަބްލިކް، ނޮކައުޓް ބުރަށް ދިޔައީ، އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރެއިންނެވެ. ގަދަ 16 ބުރުގައި ނެދަލެންޑްސް އަތުން ޗެކް ރިޕަބްލިކް މޮޅުވި ނަމަވެސް، ކުއާޓާ ފައިނަލުގައި ޑެންމާކް އަތުން ބަލިވެ ކެޓީ އެވެ.
ޗެކް ރިޕަބްލިކް މި ފަހަރުގެ ޔޫރޯ އަށް ކޮލިފައިވީ، ކޮލިފައިން ގްރޫޕް އީގެ ދެ ވަނަ ޓީމުގެ ގޮތުގަ އެވެ. މި ގްރޫޕްގެ އެއް ވަނަ ހޯދި އަލްބޭނިއާ އަށް ވެސް ޕޮއިންޓް ލިބުނީ ޗެކް ރިޕަބްލިކެކޭ އެއްވަރަށް، އަށް މެޗުން 15 ޕޮއިންޓެވެ. ކޮލިފައިންގައި، ޗެކް ރިޕަބްލިކް ހަމައެކަނި ބަލިވީ، އަލްބޭނިއާ އަތުންނެވެ.
ޗެކޮސްލޮވާކިއާ އާއި ސްލޮވާކިއާ ގައުމީ ޓީމަށް ވެސް ކުޅެފައިވާ، އިވާން ހަސެކް، ޗެކް ރިބަޕްލިކް ޓީމާ ހަވާލުވީ، މި އަހަރުގެ ޖެނުއަރީ މަހުގަ އެވެ. ޗެކް ރިޕަބްލިކް، ޔޫރޯ އަށް ކޮލިފައިކޮށްދިނުމަށް ފަހު، ކުރީގެ ކޯޗު، ޔަރޯސްލާވް ސިލްހަވީ، އެ ޓީމުން އިސްތިއުފާ ދޭން ނިންމީ ޓީމުގެ ސަޕޯޓަރުންނާއި ކުޅުންތެރިންތަކަކާ އުފެދުނު ހިޔާލުތަފާތުވުންތަކެއްގެ ސަބަބުންނެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ޗެކް ރިޕަބްލިކުން ބަރޯސާވާނެ ކުޅުންތެރިންނަކީ ބަޔާ ލެވަކޫސަންގެ ފޯވާޑް ޕެޓްރިކް ޝިކް އާއި ޓީމުގެ ކެޕްޓަން، ވެސްޓް ހޭމް ޔުނައިޓެޑަށް ކުޅޭ ތޯމަސް ސޫޝެކް އެެވެ.
ޗެކް ރިބަޕްލިކަށް، ތުރުކީ އާއި ޕޯޗުގަލް އަދި ޖޯޖިއާއާ ވާދަކޮށް ގްރޫޕް ފަހަނައަޅައިދެވިދާނެ އެވެ.
