ލައިޕްޒިގު (ޖޫން 19) - ބަދަލަކަށް ކުޅެން އެރިތާ ކުޑައިރުކޮޅެއްގެ ތެރޭގައި ފްރާންސިސްކޯ ކޮންސެސާއޯ ޖެހި ގޯލުން ޕޯޗުގަލް އިން 2-1 އިން ޗެކް ރިޕަބްލިކް ބަލިކޮށް ޔޫރޯ ފުޓްބޯޅަ މުބާރާތް މޮޅަކުން ފަށައިފި އެވެ.
ލައިޕްޒިގު އެރީނާގައި މިރޭ ކުޅުނު މެޗު ފަށައިގެން ޕޯޗުގަލް އިން ދިޔައީ އެ ޓީމުގެ އެންމެ ކުރިއަށް ކުޅެމުންދިޔަ ޓީމުގެ ކެޕްޓަން، ކްރިސްޓިއާނޯ ރޮނާލްޑޯ އަށް ބޯޅަ ދީގެން އެޓޭކް ކުރެވޭތޯ ބަލަމުންނެވެ. ރޮނާލްޑޯ، 39، ކެރިއަރުގައި ހަ ވަނަ ޔޫރޯ ފުޓްބޯޅަ މުބާރާތުގައި ކުޅެ، ރެކޯޑެއް ހެދި މި މެޗުގެ ފުރަތަމަ ހާފުގައި އޭނާ އޭރިއާތެރެއިން ޖެހި ބޯޅައެއް، ޗެކް ރިޕަބްލިކްގެ ކީޕަރު، ޔިންޑްރިކް ސްޓަނެކް ވަނީ މަތަކޮށްފަ އެވެ.
ޕޯޗުގަލްގެ ރަފައެލް ލެއާއޯ އާއި ބްރޫނޯ ފެނާންޑޭސް ވެސް ވަނީ ދުރުން ޝޮޓްތަކެއް ފޮނުވާލައި ގޯލު ޖެހޭތޯ ބަލައިފަ އެވެ. އެކަމަކު، ކީޕަރު ސްޓަނެކް ހާސްކޮށްލެވޭ ވަރަށް ގޯލާ ސީދާކޮށް ވެސް ފޮނުވާނުލެވުނެވެ.
ފުރަތަމަ ހާފެކޭ އެއްގޮތަށް ދެ ވަނަ ހާފުގައި ވެސް ޕޯޗުގަލް އިން ބޯޅަ ހިފަހައްޓައިގެން ކުޅެ، ގޯލެއް ޖެހޭތޯ މަސައްކަތްކުރަމުންދިޔަ އެވެ.
ޕޯޗުގަލްގެ ކެޕްޓަން ރޮނާލްޑޯ ބޮލުން ބޯޅަ ފޮނުވާލަނީ.
ދެ ވަނަ ހާފުގައި ޗެކް ރިޕަބްލިކުން ކުޅުން ރަނގަޅުކޮށް، ބަދަލުތަކެއް ގެނެސް އެޓޭކްކުރަމުން އައި ގޮތަށް ބަދަލުތަކެއް ގެނަ އެވެ. ނަތީޖާ އަކަށްވީ ޕޯޗުގަލް ސިއްސުވާލައި ޗެކް ރިޕަބްލިކުން ލީޑުނެގުމެވެ. މެޗުގެ 62 ވަނަ މިނިޓްގައި މި ލަނޑު ޖެހީ އޭރިއާބޭރުން ފޮނުވާލި ޝޮޓަކުން ލޫކަސް ޕްރޮވޮޑް އެވެ. މިއީ މެޗުގައި ޗެކް ރިޕަބްލިކުން ގޯލާ ސީދާކޮށް ޖެހި ފުރަތަމަ ޝޮޓް އެވެ.
ޕޯޗުގަލް އިން ލަސްތަކެއް ނުވެ ނަތީޖާ ހަމަހަމަކުރި އެވެ. މެޗުގެ 69 ވަނަ މިނިޓްގައި ޕޯޗުގަލް އިން ޖެހި މި ލަނޑަކީ ޗެކް ރިޕަބްލިކްގެ ރޮބިން ރަނަކް އަތުން ބައިކޮޅަށް ވަން ގޯލެކެވެ. މިއީ ޕޯޗުގަލްގެ ނޫނޯ މެންޑޭޒް ބޮލުން ޖައްސާލި ބޯޅައެއް ކީޕަރު ސްޓަނެކް ޕަންޗުކޮށްލަން އުޅުމުގެ ތެރޭގައި ރަނަކް ފައިގައި ޖެހިފައި ވަން ގޯލެކެވެ.
އޭގެ ފަހުން، ޕޯޗުގަލްގެ މިޑްފީލްޑަރު، ވިޓީނިއާ އޭރިއާބޭރުން ޖެހި ބޯޅަ ކީޕަރު ސްޓަނެކް ވަނީ ހުއްޓުވައިފަ އެވެ.
ރޮނާލްޑޯ ފޮނުވާލާ ޝޮޓެއް ބްލޮކްކުރަން ޗެކް ރިޕަބްލިކުން މަސައްކަތްކުރަނީ
ކައުންޓަ އެޓޭކުގައި މެޗުގެ 81 ވަނަ މިނިޓްގައި ޗެކް ރިޕަބްލިކުން ރަނގަޅު ހަމަލާއެއް ފޮނުވާލި އެވެ. އެ ޓީމުގެ ކެޕްޓަން، ތޯމަސް ސޯޝެކް އޭރިއާބޭރުން ޖެހި ބޯޅަ ދިޔައީ ދަނޑިކައިރިން ބޭރުންނެވެ.
ޕޯޗުގަލް އިން ވަނީ މެޗުގެ 87 ވަނަ މިނިޓްގައި ލަނޑެއް ޖަހައިފަ އެވެ. ރޮނާލްޑޯ ބޮލުން ޖެހި ބޯޅައެއް ދަނޑީގައި ޖެހިފައި އައި ވަގުތު ޑިއޯޯޯގޯ ޖޮޓާ ވަނީ ބޮލުން ގޯލަށް ފޮނުވާލައިފަ އެވެ. އެކަމަކު، ރޮނާލްޑޯ ބޯޅަ އަށް އެރިއިރު، އޮފްސައިޑްގައި ހުރި ކަމަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމުމުން ރެފްރީ ވަނީ އެ ގޯލު ކެންސަލްކޮށްލައިފަ އެވެ.
އެކަމަކު، އިތުރު ވަގުތު ކައިރިވެފައިވަނިކޮށް ޕޯޗުގަލް އިން ބަދަލަކަށް އެރުވި، 21 އަހަރުގެ ކޮންސެސާއޯ އާއި ޕެޑްރޯ ނެޓޯ ގުޅިގެން ކުރި އެޓޭކެއްގައި ލަނޑު ޖަހައި ޕޯޗުގަލް މޮޅުކޮށްދިނެވެ. ނެޓޯ ނެގި ބޯޅައެއްގައި، އޭރިއާތެރެއިން ކޮންސެސާއޯ އަށް ލިބުނު ފުރުސަތުގައި އޭނާ ވަނީ ގޯލަށް ބޯޅަ ފޮނުވާލައިފަ އެވެ. ކޮންސެސާއޯ އަކީ، ޕޯޗުގަލްގެ ކުރީގެ ފޯވާޑް ސާޖިއޯ ކޮންސެސާއޯގެ ދަރިފުޅެވެ.
ޕޯޗުގަލް އިން މި ވަނީ ޖެހިޖެހިގެން ފަސް މެޗުން ޗެކް ރިޕަބްލިކް ބަލިކޮށްފަ އެވެ.
