ހެމްބާގް (ޖޫން 22) - ޔޫރޯ ފުޓްބޯޅަ މުބާރާތުގައި މިރޭ ޖޯޖިއާ އާއި ޗެކް ރިޕަބްލިކް ބައްދަލުކުރި މެޗު 1-1 އިން އެއްވަރުވެ، މޮޅުވުން މަޖުބޫރު މެޗަކުން ދެ ޓީމުން ވެސް ޕޮއިންޓަކުން ފުއްދާލަން ޖެހިއްޖެ އެވެ.
ފުރަތަމަ މެޗުން ދެ ޓީމު ވެސް ބަލިވެފައި އޮތުމުން، ޖޯޖިއާ އާއި ޗެކް ރިޕަބްލިކުން މި މެޗަށް ނުކުތީ ވަރަށް ބޮޑަށް އެޓޭކަށް ވިސްނައިގެންނެވެ. އެކަމަކު، ދެ ޓީމަށް ވެސް ލިބުނު ޕޮއިންޓާ އެކު މި ވަނީ ފަހު މެޗުގެ ނަތީޖާ އަށް ބަލާށެވެ. މި ގްރޫޕްގައި މިރޭ ތުރުކީ އާއި ޕޯޗުގަލް ކުޅޭނެ އެވެ. ފަހު މެޗުތަކަށް ބަލާއިރު، ޖޯޖިއާ އިން ޕޯޗުގަލްއާ ކުޅޭއިރު، ޗެކް ރިޕަބްލިކް ބައްދަލުކުރާނީ ތުރުކީއާ އެވެ.
އެ ގޮތުން، މެޗުގެ 22 ވަނަ މިނިޓްގައި ޗެކް ރިޕަބްލިކުން ވަނީ ލަނޑެއް ޖަހައިފަ އެވެ. އެ ގޮތުން އޭރިއާތެރެއަށް ޗެކް ރިޕަބްލިކްގެ ފުލްބެކް، ވްލަޑިމީރް ސޯފާލް އެއްލި ބޯޅައެއް އެ ޓީމުގެ ފޯވާޑް، އެޑަމް ހްލޯޒެކަށް ލިބި އޭނާ ފޮނުވާލި ބޯޅަ ކީޕަރު، ޖިއޯޖީ މަަމަޑާޝްވިލީ ގައިގައި ޖެހިފައި އަލުން ހްލޯޒެކް ގައިގައި ޖެހިފައި ގޯލަށް ވަނެވެ. ޗެކް ރިޕަބްލިކް ކުޅުންތެރިން އުފާފާޅުކުރި ފަހުން، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ނިންމީ ބޯޅަ ގޯލަށް ވަނީ ހްލޯޒެކް އަތުގައި ޖެހިފައި ކަމަށްވާތީ އެ ގޯލު ބަލައިނުގަންނާށެވެ.
އޭގެ ފަހުން، ޗެކް ރިޕަބްލިކުން ކުރި އެޓޭކްތަކެއްގައި ވެސް ޖޯޖިއާގެ ކީޕަރު މަމަޑާޝްވިލީ ވަނީ ރަނގަޅު ހަމަލާތަކެއް ހުއްޓުވައިފަ އެވެ.
ޖޯޖިއާ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ.
ޗެކް ރިޕަބްލިކުން ރަނގަޅަށް ކުޅެމުން ދަނިކޮށް ޖޯޖިއާ އިން ވަނީ ފުރަތަމަ ހާފުގެ އިތުރު ވަގުތުގައި ޕެނަލްޓީ އަކުން ލީޑުނަގައިފަ އެވެ. މިއީ އޭރިއާތެރެއަށް ހިލޭ ޖެހުމެއްގައި އައި ބޯޅައެއްގައި، ޗެކް ރިޕަބްލިކްގެ ރޮބިން ހްރަންކް އަތްލުމުން ވީއޭއާރް އިން އަންގައިގެން، ދަނޑުގައި ހުރި މޮނީޓަރުން ބަލައިފައި ރެފްރީ ދިން ޕެނަލްޓީ އެކެވެ. އެ ޕެނަލްޓީ ވައްދާލީ، ޖޯޖެސް މިކައުޓްޒޭ އެވެ.
ފުރަތަމަ ހާފު ނިމުމުގެ ކުރިން، ޗެކް ރިޕަބްލިކަށް އެއްވަރުކޮށްދޭން އެ ޓީމުގެ ފޯވާޑް، ޕެޓްރިކް ޝިކް ފޮނުވާލި ޝޮޓް ވެސް ޖޯޖިއާ ކީޕަރު މަމަޑާޝްވިލީ ވަނީ މަތަކޮށްފަ އެވެ. މިއީ ފުރަތަމަ ހާފުގައި އޭނާ ހުއްޓުވި ހަތް ވަނަ ހަަމަލާ އެވެ.
ޖޯޖިއާ އިން ދެ ވަނަ ހާފް ފަށައިގެން ކައުންޓަ އެޓޭކުގައި ފުރުސަތުތަކެއް ހޯދޭތޯ ބަލަމުން ދިޔައިރު، އެ ޓީމުގެ ތަރި ކްވިޗާ ކްރަވަޝްކޭލިއާ ދިން ބޯޅައަކުން، އަންޒޯރް މެކްވަބިޝްވިލީ ޖެހި ބޯޅަ ދިޔައީ ބޭރުންނެވެ.
ޗެކް ރިޕަބްލިކުން އެއްވަރުކުރީ މެޗުގެ 59 ވަނަ މިނިޓްގައި ޝިކް ޖެހި ލަނޑުންނެވެ. މިއީ ކޯނަރެއްގައި ހުރަސްވި ބޯޅައަކުން ޗެކް ރިޕަބްލިކްގެ އޮންދްރޭއި ލިންގާ ބޮލުން ޖެހި ބޯޅަ ދަނޑީގައި ޖެހިފައި ނުކުތް ވަގުތު ރަނގަޅު ތަނުގައި ހުރެ ޝިކް ކާމިޔާބުކުރި ގޯލެކެވެ.
އޭގެ ފަހުން، އިތުރު ލަނޑެއް ޖެހޭތޯ ޗެކް ރިޕަބްލިކުން ގިނަ މަސައްކަތްތަކެއް ކުރި ނަމަވެސް ކާމިޔާބެއްނުވި އެވެ.
މެޗުގެ އިތުރު ވަގުތުގެ ގޮތުގައި ދެއްކި ފަސް މިނިޓްގެ ތެރެއިން ފަހު ސިކުންތުގައި ކައުންޓަ އެޓޭކުގައި ޖޯޖިއާ އަށް ލިބުނު ރަނުގެ ފުރުސަތުގެ ބޭނުމެއް ނުހިފުނެވެ. ޖޯޖިއާގެ ބަދަލަކަށް ކުޅެންއެރި ސަބާ ލޮބްޖަނިޑްޒޭ އަށް އޭރިއާތެރެއިން ލިބުނު ފުުރުސަތުން ޖެހި ޝޮޓް ދިޔައީ ހުރަސްދަނޑިމަތިންނެވެ.
