ލައިޕްޒިގް (ޖޫން 18) - މި ފަހަރުގެ ޔޫރޯ ފުޓްބޯޅަ މުބާރާތުގައި އެ ޓީމު ކުޅޭ ފުރަތަމަ މެޗުގައި ޕޯޗުގަލްއާ ދެކޮޅަށް ކުޅެ ކްރިސްޓިއާނޯ ރޮނާލްޑޯ ބަލިކުރުން އެއީ ޗެކް ރިޕަބްލިކް މުބާރާތުގައި ކުރިއަށް ދިޔުމަށް ލިބޭނެ މޯޓިވޭޝަނެއް ކަމަށް އެ ޓީމުގެ ކޯޗު އިވާން ހަސެކް ބުނެފި އެވެ.
މިރޭ ޕޯޗުގަލްއާ ދެކޮޅަށް ޗެކުން ނުކުންނައިރު, އެ ޓީމަށް ލިބޭނެ އެންމެ ބޮޑު މޯޓިވޭޝަން އަކީ ޕޯޗުގަލްގެ ކެޕްޓަން ރޮނާލްޑޯ ބަލިކުރުން ކަމަށް ހަސެކް ދެކެ އެވެ.
ޕޯޗުގަލް އިން މިފަހަރުގެ ޔޫރޯ އަށް ނުކުންނައިރު, މިއީ އެ ޓީމުގެ ރޮނާލްޑޯގެ ހަ ވަނަ ޔޫރޯ އެވެ. ރޮނާލްޑޯ މީގެ ކުރިން ދެ ޔޫރޯގެ ފައިނަލެއްގައި ކުޅެފައިވާއިރު, 2016 ވަނަ އަހަރު ޔޫރޯގެ ޗެމްޕިއަންކަން ހޯދި އެވެ. އަދި އޭނާ ވަނީ ޔޫރޯގައި 14 ގޯލު ޖަހައިފަ އެވެ. އެއާއެކު އޭނާ އަކީ ޔޫރޯގެ ތާރީހުގައި އެންމެ ގިނަ ގޯލު ކުޅުންތެރިޔާ އެވެ.
"އަހަރެން އަދި އަހަރެންގެ ކުޅުންތެރިން ވެސް ބޭނުންވަނީ ރޮނާލްޑޯ ބަލިކުރަން. އެއީ އެ ކުޅުންތެރިން އަދި ޗެކް އަށް ވެސް ތާރީހީ ކަމެއް. އަހަރެންގެ ކުޅުންތެރިންގެ ހަނދާނުން ނުފިލާނެ ކަމަކަށް އެކަން ވާނެ" ހަސެކް ބުންޏެވެ.
ނޫސްވެރިންގެ ބައްދަލުވުމެއްގެ ތެރެއިން ހަސެކް ވާހަަކަ ދައްކަނީ.
ހަސެކް ބުނީ މެޗު ނިންމާލާއިރު ރޮނާލްޑޯގެ ޓީމާ ދެކޮޅަށް ކުޅުނޭ ބުނަން ބޭނުންނުވާ ކަމަށާއި, އޭގެ ބަދަލުގައި ބުނަން ބޭނުންވަނީ ރޮނާލްޑޯގެ ޓީމު ބަލިކުރި ޓީމެއް ކަމަށެވެ.
އޭނާ ބުނީ ޕޯޗުގަލްގެ ވާހަކަ ދައްކާއިރު ގިނައިން ރޮނާލްޑޯގެ ވާހަކަ ދައްކަން ޖެހުމަކީ އެހެން ކުޅުންތެރިންގެ ފަރާތުން ކުރިމަތިވާނެ ނުރައްކާ ކުޑަވުމެއް ނޫން ކަމަށެވެ. އަދި ޕޯޗުގަލްގެ މުޅި ސްކޮޑަށް ބަލާއިރު، ވަރަށް ބޮޑަަށް ސަމާލުވާން ޖެހޭނެ ގިނަ ކުޅުންތެރިން ތިބި ކަމަށް ހަސެކް ވަނީ ބުނެފަ އެވެ.
"ދެން ތިބި ކުޅުންތެރިން ދައްކޮށްލަނީކީ ނޫން، ޕޯޗުގަލްގެ މުޅި ސްކޮޑުގައި ވެސް އެ އޮތީ ކޮލިޓީ. އަހަރެމެން މި ހުރިހާ ކަމަކަށް ސަމާލުވެގެން މި މެޗަށް ނުކުންނާނީ،" ޗެކޮސްލޮވާކިއާ އާއި ސްލޮވާކިއާ ގައުމީ ޓީމަށް ވެސް ކުޅެފައިވާ، ހަސެކް ބުންޏެވެ.
ޗެކް ރިޕަބްޕިކުން މި އަހަރުގެ ޔޫރޯ އަށް ނުކުންނައިރު، މިއީ އެ ޓީމުން ކުޅޭ 11 ވަނަ ޔޫރޯ އެވެ. އެ ޓީމުން ވަނީ 1996 ވަނަ އަހަރުގެ ޔޫރޯގެ ރަނަޕްކަން ހޯދައިފަ އެވެ. އަދި 2004 ވަނަ އަހަރުގެ ޔޫރޯގެ ސެމީ ފައިނަލަށް ދަތުރުކުރި އެެވެ.
ޕޯޗުގަލް އިން ވަނީ އެންމެ ފަހުން ޗެކް ރިޕަބްލިކާ ދެކޮޅަށް ކުޅުނު ހަތަރު މެޗުން ވެސް މޮޅުވެފަ އެވެ. މިރޭގެ މެޗު ފަށާނީ 12 ޖަހާއިރު އެވެ.
