ސާބިއާ އިން ވަނީ މީގެ ކުރިން ޔޫގޯސްލާވިއާގެ ނަމުގައި ހަތަރު ފަހަރު ޔޫރޯގައި ވާދަކޮށް ދެ ފަހަރު ފައިނަލުގައި ކުޅެ އެއް ފަހަރު ސެމީ ކުޅެފަ އެވެ. އަދި އެއް ފަހަރު ގްރޫޕް ސްޓޭޖުން ކެޓި އެވެ. ސާބިއާ އެންޑް މޮންޓަނެގްރޯގެ ނަމުގައި، 2000 ވަނަ އަހަރު ވާދަކޮށް، ކުއާޓާ ފައިނަލަށް ދަތުރުކުރި އެވެ.
މި ފަހަރުގެ ޔޫރޯ އަކީ، ސާބިއާގެ ނަމުގައި ވާދަކުރަން ފެށި ފަހުން، އެ ޓީމު ޔޫރޯ އަށް ކޮލިފައިވި ފުރަތަމަ ފަހަރެވެ. ސާބިިއާގެ ނަމުގައި ކުޅެން ފެށި ފަހުން، ޔޫރޯގެ ފަސް މުބާރާތަށް އެ ޓީމު ކޮލިފައިނުވެ ދިޔަ އެވެ.
ސާބިއާ، މި ފަހަރުގެ ޔޫރޯ އަށް ކޮލިފައިވީ، ކޮލިފައިން ގްރޫޕް ޖީގެ ދެ ވަނަ ޓީމުގެ ގޮތުގަ އެވެ. އެ ގްރޫޕްގެ އެއް ވަނަ ހޯދީ ހަންގޭރީ އެވެ. ސާބިއާ އިން ވަނީ ކޮލިފައިންގައި ކުޅުނު އަށް މެޗުގެ ތެރެއިން ހަތަރު މެޗުން މޮޅުވެފަ އެވެ. ބަލިވީ ދެ މެޗުންނެވެ.
މަޝްހޫރު ގިނަ ކުޅުންތެރިންތަކެއް ހިމެނޭ ސާބިއާ ޓީމުގެ ކޯޗަކަށް ހުރީ، ޑްރަގަން ސްޓޮޖްކޯވިޗް އެވެ. ސާބިއާ ޓީމާ، ސްޓޮޖްކޯވިޗް ހަވާލުވީ 2021 ވަނަ އަހަރު އެވެ. ސްޓޮޖްކޯވިޗްގެ ކޯޗުކަމުގައި، ސާބިއާ ވަނީ 2022 ވަނަ އަހަރު ގަތަރުގައި ބޭއްވި ފީފާ ވޯލްޑް ކަޕްގައި ވާދަކޮށްފަ އެވެ. އެ މުބާރާތުގައި ލިބުނު ތަޖުރިބާގެ އަލީގައި ސާބިއާ މި ފަހަރުގެ ޔޫރޯ ކޮލިފައިންގައި ފެނުނީ ވަރުގަަދަ ކޮށެވެ.
ސާބިއާ ޓީމުގައި ހިމެނޭ މަޝްހޫރު ކުޅުންތެރިންނަށް ބަލާއިރު، އެ ޓީމުގެ ކެޕްޓަނަކީ، ފެނަބާޗޭ އަށް ކުޅޭ ޑޫސާން ޓަޑިޗް އެވެ. އެ ޓީމުން އެެޓޭކުގައި އެންމެ ބޮޑަށް ބަރޯސާވާނީ، ސައުދީ އަރަބިއްޔާގެ އަލް ހިލާލް އަށް މި ވަގުތު މޮޅު ކުޅުމެއް ދައްކަމުން އަންނަ ފޯވާޑް، އަލެކްސަންޑަ މިޓްރޮވިޗް އެވެ. މިޓްރޮވިޗަކީ އެ ޓީމުގެ ވައިސް ކެޕްޓަން އެވެ.
މިފަހަރު ސާބިއާ ހިމެނޭ ގްރޫޕުން އެ ޓީމަށް ކުރިއަށްދިއުމުގެ ފުރުސަތު އެބައޮތެވެ. އެ ގްރޫޕްގައި އޮތީ، ސްލޮވީނިއާ، ޑެންމާކް އަދި އިންގްލެންޑް އެވެ.
