މިއުނިކް (ޖޫން 26) - ސާބިއާއާ 0-0 އިން އެއްވަރުވެ، ޑެންމާކުން އެ ގައުމުގެ ފުޓްބޯޅަ ތާރީހުގައި ފުރަތަމަ ފަހަރަށް ޖެހިޖެހިގެން ދެ ޔޫރޯ ފުޓްބޯޅަ މުބާރާތުގެ ގަދަ 16 (ނޮކައުޓް ބުރަށް) ދަތުރުކޮށްފި އެވެ.
މީގެ ކުރިން އެއް ފަހަރު ޔޫރޯގެ ޗެމްޕިއަކަން ހޯދި ޑެންމާކް ވަނީ އެންމެ ފަހުން ފަހަރު ސެމީގައި ކުޅެފަ އެވެ. އެ ފަހަރު ޑެންމާކުން ސެމީ އަށް ދިޔައީ ގްރޫޕް ސްޓޭޖުގެ ތިން މެޗުގެ ތެރެއިން އެއް މެޗުން މޮޅުވެގެންނެވެ. މި ފަހަރު ޑެންމާކުން ނޮކައުޓަށް މިދިޔައީ، ގްރޫޕްގެ ތިން މެޗު ވެސް އެއްވަރުކޮށްގެންނެވެ.
ގްރޫޕްގެ އެއް ވަނަ ހޯދި އިންގްލެންޑަށް ފަސް ޕޮއިންޓް ލިބުނުއިރު، ޑެންމާކް ދެ ވަނަ ހޯދީ ތިން ވަނަ އަށް ދިޔަ ސްލޮވީނިއާއާ އެއްވަރަށް ތިން ޕޮއިންޓް ހޯދައިގެންނެވެ. އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރެއިން ގަދަ ހަަތަރު ޓީމަށް ލިބޭ ފުރުސަތެއްގައި ސްލޮވީނިއާ އަށް ވެސް ނޮކައުޓްގެ ޖާގަ ވަނީ ލިބިފަ އެެވެ.
ގްރޫޕްގެ ފުލަށް ގޮސް މުބާރާތުން ކެޓި ސާބިއާ އަށް ވެސް ދެ ޕޮއިންޓް ލިބުނެވެ.
މިިއުނިކްގެ އަލިއާންޒް އެރީނާގައި ކުޅުނު މިރޭގެ މެޗަށް ނުކުތްއިރު ދެ ޓީމުން ވެސް ވަނީ ފުރަތަމަ އެގާރަ އަށް ބަދަލުތަކެއް ގެނެސްފަ އެވެ. ދެ ޓީމުން ވެސް ބޯޅަ ހިފަހައްޓައިގެން، އެޓޭކްކުރެވޭތޯ ފުރަތަމަ މިނިޓުން ފެށިގެން މަސައްކަތް ފެށި އެވެ.
މެޗުގެ 16 ވަނަ މިނިޓްގައި ޑެންމާކްގެ ޔަކީމް މޭލާ ނެގި ހުރަހަަކަށް އަރައި އަލެކްސަންޑަ ބާ ޖެހި ބޯޅަ ދިޔައީ ސީދާނުވެ އެވެ. އޭގެ ފަހުން، ޑެންމާކްގެ ކްރިސްޓިއަން އެރިކްސަން އާއި ރަސްމުސް ހޮއިލަންޑް ފޮނުވާލި ހަމަލާތައް ސާބިއާ ކީޕަރު ޕެޑްރަގް ރަޖްކޯވިޗް ވަނީ މަތަކޮށްފަ އެވެ.
ސާބިއާ އިން ފުރަތަމަ ހާފުގައި އެކަށީގެންވާ އެޓޭކްތަކެއް ނުކުރެވިގެން ދެ ވަނަ ހާފުގައި ކުޅެން ނުކުތީ ޑޫސާން ޓަޑިޗް އާއި ލޫކަ ޖޯވިޗް ކުޅެން އަރުވައިގެންނެވެ.
ދެ ވަނަ ހާފް ފެށިގެން ނުވަ ވަނަ މިނިޓްގައި ޓަޑިޗް އާއި ޖޯވިޗް ގުޅިގެން ކުރި އެޓޭކެއްގައި، ޑެންމާކްގެ ޖަނިކް ވެސްޓެގާޑް އަތުން ބައިކޮޅަށް ވަން ގޯލު ބަލައިނުގަންނަން ވީޑިއޯ އެސިސްޓަންޓް ރެފްރީ (ވީއޭއާރް) އިން ނިންމީ، ޖޯވިޗް އޮފްސައިޑް ވުމުންނެވެ.
މެޗުގެ 80 ވަނަ މިނިޓްގައި ސާބިއާގެ ފޯވާޑް، ޑޫސާން ވްލާހޮވިޗްގެ މަސައްކަތުން ރަނގަޅު ފުރުސަތެއް ތަނަވަސްކުރި އެވެ. އޭރިއާތެރެއިން ވްލާހޮވިޗް ހޯދައިދިން ބޯޅައަކުން ސާބިއާގެ އަލެކްސަންޑަ މިޓްރޮވިޗް ޖެހި ޝޮޓް ދިޔައީ ދަނޑިކައިރިން ބޭރުންނެވެ.
ސާބިއާ އިން މި ފަހަރުގެ މުބާރާތް ވެސް ނިންމައިމިލީ މޮޅެއް ނުލިބި އެވެ. ބޮޑެތި މުބާރާތްތަކުގައި އެންމެ ފަހުން އެ ޓީމު ކުޅުނު އަށް މެޗުން ވެސް މޮޅެއް ނުލިބެ އެވެ. ފަސް މެޗުން ބަލިވިއިރު، ތިން މެޗު ވަނީ އެއްވަރުވެފަ އެވެ.
ޑެންމާކުން ގަދަ 16 ބުރުގައި ކުޅޭނީ މުބާރާތުގެ ހޯސްޓް ޖަރުމަނާ ދެކޮޅަށެވެ.
