މިއުނިކް (ޖޫން 25) - ޔޫރޯ ފުޓްބޯޅަ މުބާރާތުގައި މިރޭ ޑެންމާކާ ދެކޮޅަށް ކުޅޭ މެޗަށް ސާބިއާ އިން ތައްޔާރުވަނީ ތާރީހު ބަދަލުކޮށްލަން ކަމަށް އެ ޓީމުގެ ކޯޗު، ޑްރަގަން ސްޓޮޖްކޯވިޗް ބުނެފި އެވެ.
ސާބިއާ ވަނީ މިހާތަނަށް ޑެންމާކާ ދެކޮޅަށް ކުޅުނު ތިން މެޗުން ވެސް ބަލިވެފަ އެެވެ. ސްޓޮޖްކޯވިޗް ބުނީ، މި ފަހަރުގެ ޔޫރޯ އަށް އައިއިރު ވެސް އެންމެ ބޮޑު އަހައްމިއްޔަތުކަމެއް ދިން އެއް ކަަމަކީ، ޑެންމާކާ ދެކޮޅަށް ސާބިއާގެ ތާރީހު ބަދަލުކުރުން ކަމަށެވެ.
"އަހަރެމެންނަށް އެނގޭ އިންގްލެންޑާއި ސްލޮވީނިއާ މެޗުތަކަކީ ވެސް މުހިންމު މެޗުތަކެއްކަން. އެކަމަކު، އެންމެ މުހިންމުކޮށް ވިސްނީ ޑެންމާކް މެޗަށް. އެއީ އަހަރެމެން ދެކޭގޮތުގައި މިއީ ޑެންމާކާ ދެކޮޅަށް ތާރީހު ބަދަލުކޮށްލަން ޖެހޭ ވަގުތު،" ސްޓޮޖްކޯވިޗް ބުންޏެވެ.
އިންގްލެންޑުން، ގްރޫޕް ސީގެ އެއް ވަނައިގައި އޮތީ ދެ މެޗުން ހަތަރު ޕޮއިންޓާ އެކު އެވެ. ދެ ވަނައިގައި އޮތް ޑެންމާކާއި ތިން ވަނައިގައި އޮތް ސްލޮވީނިއާ އަށް ދެ ޕޮއިންޓް ލިބިފައިވާއިރު، ފުލުގައި އޮތް ސާބިއާގެ އޮތީ އެއް ޕޮއިންޓެވެ.
ސާބިއާ އަށް ޑެންމާކްގެ މައްޗަށް ކުރިހޯދިއްޖެނަމަ ގަދަ 16 އިން ފުރުސަތު ހޯދޭނެ އެވެ. ސްޓޯޖްކޯވިޗް ބުނީ ވިސްނުން ބަހައްޓަނީ ވެސް މޮޅަކަށް ކަމަށާއި އެކަން ކުރެވޭނެ ކަމަށެވެ.
"އަހަރެމެން މި ތިބީ އުންމީދުތަކަކާ އެކީ ރަނގަޅު މޫޑެއްގައި. ކީއްވެ އަހަރެމެންނަށް ކުރިއަށް ނުދެވޭންވީ، މިއީ ފުޓްބޯޅައިގެ ކާނިވަލެއް. އަހަރެމެންގެ ވެސް އުންމީދުތަކެއް އެބަހުރި،" ކުރިން ޔޫގޯސްލާވިއާ ޓީމަށް ކުޅުނު ސްޓޮޖްކޯވިޗް ބުންޏެވެ.
ސާބިއާ ޓީމުގައި ވަރުގަދަ ބެންޗެއް އެބައޮތް ކަމަށާއި މި މެޗުގައި ބަދަލުތަކެއް ފެންނާނެ ކަމަށް ސްޓޮޖްކޯވިޗް ވަނީ ބުނެފަ އެވެ.
ޑެންމާކާއި ސާބިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
