ޑެންމާކުން މީގެ ކުރިން ނުވަ ފަހަރު ޔޫރޯ ފުޓްބޯޅަ މުބާރާތުގައި ވާދަކޮށްފައިވާއިރު، އެ ޓީމުން، މި ފަހަރުގެ މުބާރާތަށް ކޮލިފައިވެފައި މިވަނީ ކޮލިފައިން ގްރޫޕް ކާމިޔާބުކޮށްގެންެނެވެ. ޔޫރަޕްގެ ޗެމްޕިއަންކަން 1992 ވަނަ އަހަރު ހޯދި ޑެންމާކް ވަނީ އެންމެ ފަހުން ބޭއްވި މުބާރާތުގެ ސެމީ ފައިނަލަށް ދަތުރުކޮށްފަ އެވެ.
ކްރިސްޓިއަން އެރިކްސަން އަށް ދަނޑުމަތީގައި ދިމާވި ހާދިސާއާ ހެދި ޑެންމާކަށް ތަފާތު ރޫހެއްގައި ކުޅެލަން ލިބުނު މުބާރާތުގެ ސެމީ ފައިނަލުގައި ޑެންމާކް ވަނީ އިންގްލެންޑް އަތުން ބަލިވެފަ އެވެ. އެއީ މެޗުގެ އިތުރު ވަގުތުގެ ދެ ހާފް ކުޅެގެންނެވެ.
މި ފަަހަރުގެ ޔޫރޯ ފުޓްބޯޅަ މުބާރާތަށް ޑެންމާކް ކޮލިފައިވީ، ކޮލިފައިން ގްރޫޕް އެޗްގެ އެއް ވަނަ ހޯދައިގެންނެވެ. އެއީ ދެ ވަނައިގައި އޮތް ސްލޮވީނިއާއާ އެއްވަރަށް ޕޮއިންޓް ލިބުނު ނަމަވެސް، ހެޑް ޓު ހެޑް ގަވާއިދުން ކުރި ލިބޭތީ އެވެ. މި ފަހަރުގެ ޔޫރޯގައި ވެސް ޑެންމާކް ލައްވައިލީ ސްލޮވީނިއާއާ އެއް ގްރޫޕެއްގަ އެވެ. އެ ގްރޫޕްގައި ދެން އޮތީ، އިންގްލެންޑާއި ސާބިއާ އެވެ.
ޑެންމާކްގެ ކޯޗަކަށް ހުރީ އެންމެ ފަހުން ޔޫރޯ ފުޓްބޯޅަ މުބާރާތުގައި ވެސް އެ ޓީމަށް އިރުޝާދުދިން ކޯޗު ކެސްޕާ ހިއުލްމަންޑް އެވެ. ހިއުލްމަންޑް އަށް އެންމެ ފަހުގެ ޔޫރޯ ފުޓްބޯޅަ މުބާރާުތުގައި ޑެންމާކަށް ކޯޗުކޮށްދޭން ފުރުސަތު ލިބުނީ، ކޮވިޑް-19އާ ހެދި މުބާރާތް ލަސްވުމުން، ކުރިން ހުރި ކޯޗު، އާގެއި ހަރެއިޑްގެ ކޮންޓްރެކްޓް ހަމަވެ، އެ އާ ކުރަން އެއްބަސްނުވުމުންނެވެ.
ހިއުލްމަންޑްއާ އެކު ޑެންމާކަށް 2022 ވަނަ އަހަރުގެ ވޯލްޑް ކަޕްގައި އެންމެ އެކަށީގެންވާ ނަތީޖާތަކެއް ނުނެރެވުނެވެ. އެކަމަކު، މި ފަހަރުގެ ޔޫރޯ ފުޓްބޯޅަ މުބާރާތަށް ޑެންމާކުން ކުރިމަތިލަނީ ބޮޑު ކުރިއެރުންތަކަކާ އެކު އެވެ. ނޮކައުޓްގެ ޖާގަ އަކީ ޑެންމާކްގެ ފުރަތަމަ ޓާގެޓެވެ.
ޑެންމާކްގެ ތަރިންނަށް ބަލާއިރު، މެންޗެސްޓާ ޔުނައިޓެޑްގެ ދެ ކުޅުންތެރިން ކަމަށްވާ ރަސްމުސް ހޮއިލުންޑް އާއި ކްރިސްޓިއަން އެރިކްސަންގެ އިތުރުން ޓޮޓެންހަމްގެ އެމީލް ހޮއިބިއާ ހިމެނެ އެވެ.
