މެޑްރިޑް (ޖޫން 11) - އަންނަ އަހަރު ބާއްވާ ކުލަބް ވޯލްޑް ކަޕުގެ އާ ފޯމެޓްގެ ފުރަތަމަ މުބާރާތުގައި ޔޫރަޕްގެ ޗެމްޕިއަން ރެއާލް މެޑްރިޑް ފެނިގެންދާނެ ކަމަށް އެ ކުލަބުން ބުނެފި އެވެ.
ރެއާލުން މި ގޮތަށް ހާމަކޮށްފައި މި ވަނީ އެ ކްލަބްގެ ކޯޗު ކާލޯ އަންޗެލޮޓީ، އިޓަލީ މީޑިއާ އަކަށް ދިން އިންޓަވިއުއެއްގައި ރެއާލުން ކްލަބް ވޯލްޑް ކަޕްގެ ދައުވަތު ގަބޫލުނުކުރާނެ ކަމަށް ބުނެފައިވަނިކޮށެވެ.
ދާދި ފަހުން ރެއާލްގެ ކޯޗު ކާލޯ އެންޗޮލޮޓީ ވަނީ ކުލަބް ވޯލްޑް ކަޕުގެ އައު ފޯމެޓާ މެދު ހިތްހަމަ ނުޖެހުން ފާޅުކޮށް އެ މުބާރާތުގެ ދައުވަތު ރެއާލުން ގަބޫލު ނުކުރާނެ ކަމަށް ބުނެފަ އެވެ. އެކަމަކު މިއަދު ނެރުނު ބަޔާނެއްގައި ރެއާލުން ވަނީ އަންނަ އަހަރު އެމެރިކާގައި ބާއްވަން ނިންމާފައިވާ މުބާރާތުގައި ބައިވެރިވާނެ ކަމަށް ބުނެފަ އެވެ.
"ރެއާލުން އަންނަ އަހަރު ކުރިއަށްދާ ކުލަބް ވޯލްޑް ކަޕުގައި ބައިވެރިވުމަށް ވަނީ ނިންމާފައި. އަދި މި މުބާރާތުގައި ބައިވެރިވުން މިއީ ރެއާލަށް ލިބޭ ފަހުރެއް. ރެއާލުގެ އަމާޒަކީ އައު ތައްޓަކާއެކު ދުނިޔޭގެ އެކި ކަންކޮޅުތަކުގައި ތިބި ރެއާލުގެ ސަޕޯޓަރުން އުފާކޮށްދޭން." ރެއާލުން ނެރުނު ބަޔާނުގައި ބުނެފައިވެ އެވެ.
ކުލަބް ވޯލްޑް ކަޕުގެ އާ ފޯމެޓާމެދު އަންޗެލޮޓީ ހިތްހަމަ ނުޖެހުން ފާޅުކުރީ ގިނަ މެޗުތަކެއް ކުޅެން ޖެހޭތީ އެވެ. އަންޗޮލޮޓީ ބުނީ އައު ފޯމެޓުގައި ކުލަބް ވޯލްޑް ކަޕް ކުޅޭނަމަ ގާތް ގަނޑަކަށް 72 މެޗު ކުޅުންތެރިން ކުޅެން ޖެހޭނެ ކަމަށާއި, އަދި މިއީ ކުޅުންތެރިންގެ ސިއްހަތައް އޭގެ އަސަރު ކުރާނެ ކަމެއް ކަމަށެވެ.
އަންޗެލޮޓީ ފަހުން ބުނީ، އޭނާ ދެއްކި ވާހަކަ މީޑިއާ އިން ގެނައީ އޮޅުން އަރާ ގޮތަށް ކަމަށެވެ. އަދި ހަގީގަތުގައި އޭނާ ދެއްކި ވާހަކަ އަކީ މި މުބާރާތް ގެންދަން ޖެހޭނީ މި އަށް ވުރެ ރަނގަޅު ރޭވުންތެރިކަމަކާ އެކު ކަމަށެވެ.
ރެއާލުން ކުލަބް ވޯލްޑް ކަޕުގެ ފުރުސަތު ދޫކޮށްލައިފިނަމަ ފީފާ އިން އެ ފުރުސަތު ސްޕެއިންގެ ޓީމަކަށް ދޭން ނިންމީ ވާދަވެރި ބާސެލޯނާ އަށެވެ. ރިޕޯޓްތައް ބުނާ ގޮތުން ރެއާލުން މި ނިންމުން ނިންމީ ބާސެލޯނާ އަށް އެ ފުރުސަތު ނުދޭށެވެ.
ފީފާ ކޮންފަޑެރޭޝަން ކަޕްގެ ބަދަލުގައި ކްލަބްތަކަށް ކޮންމެ ހަތަރު އަހަރުން އެއް އަހަރަކު ބާއްވާ މުބާރާތެއް ގޮތަށް ކްލަބް ވޯލްޑް ކަޕް ފޯމެޓް ރޭވީ 24 ޓީމު ކުޅޭގޮތަށް 2021 ގައި ޗައިނާގައި ފުރަތަމަ މުބާރާތް ބާއްވާށެވެ. އެކަމަކު، އޭރު ކޮވިޑް-19ގެ ދުވަސްވަރު ކަމަށްވާތީ ފީފާ އަށް ޖެހުނީ މުބާރާތް ފަސްކުރާށެވެ. ފީފާ އިން ދައުވަތު ދޭ 24 ޓީމެއް ފުރަތަމަ ކްލަބް ވޯލްޑް ކަޕްގައި ކުޅޭ ގޮތަށް، އާ ފޯމެޓްގެ އަލަތު މުބާރާތް އޮންނާނީ އަންނަ އަހަރު އެމެރިކާގަ އެވެ.
