ފަލަސްތީނު މީހުންނާ ދެކޮޅަށް ބޮޑު ގަތުލުއާއްމެއް ހިންގާތީ، އިޒްރޭލު ޕާސްޕޯޓުގައި ރާއްޖެއަށް މީހުން އެތެރެވުން ހުއްޓުވުމުގައި ސިޔާސީ ޕާޓީތަކުގެ ހިޔާލުތަފާތުުުވުންތައް އެއްފަރާތްކުރަން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމު މިއަދު ގޮވައިލައްވައިފި އެވެ.
އިޒްރޭލު ޕާސްޕޯޓް މަނާކުރުމަށް ޓަކައި މީކާއީލް ހުށަހެޅުއްވި ބިލު، މިއަދުގެ ޖަލްސާގައި މަޖިލީހަށް ތައާރަފު ކުރައްވަމުން އޭނާ ވިދާޅުވީ އެ ބިލުގެ މަގުސަދަކީ ދިވެހިރާއްޖޭން ވެސް އިޒްރޭލާ ދެކޮޅަށް ފެންހިފޭ ފިޔަވަޅުތަކެއް އެޅުން ކަމަށެވެ. އެއީ އޭނާ ވިދާޅުވި ގޮތުގައި އިޒްރޭލުގެ އަނިޔާވެރިކަން ދެނެގަނެ، ބައިނަލް އަގުވާމީ މުޖުތަމައުން ވެސް އެކަން ފާހަގަކުރަމުން ގެންދާތީ އެވެ.
"އަަޅުގަނޑު އުއްމީދުކުރަން މި ބިލަކީ ދިވެހިރާއްޖޭގައި މި ހިމެނޭ ސިޔާސީ ޕާޓީތަކުގެ މެދުގައި އެކެއް އަނެކަކަށް ސިޔާސީބޯޅަ ޖެހުމާއި ގުދޯގުދޯ ގޮވުމުގެ ބަދަލުގައި އަަޅުގަނޑުމެންނަށް ހުރިހާ ޕާޓީއެއް އެކުވެ، ރަނގަޅު މަސައްކަތެއް، ބައިޕާޓީޝަން [ސިޔާސީ ތަފާތުތައް އެއްފަރާތްކޮށްފައި ކުރާ] މަސައްކަތެއް ކުރެވޭނެ ބިލެއްގެ ގޮތުގައި މި ބިލު ވެގެން ދިއުން،" މީކާއީލް ވިދާޅުވި އެވެ.
މަޖިލީހުގެ ހުރިހާ މެންބަރުން ވެސް ތާއީދުކުރައްވައި ވީހާ ވެސް އަވަހަކަށް އެ ބިލުގެ މަސައްކަތް ކުރިއަށް ގެންދަން އޭނާ ގޮވައިލެއްވި އެވެ.
އިޒްރޭލު މީހުން ރާއްޖެއަށް އެތެރެވުން ހުއްޓުވުމަށް ޓަކައި މީކާއީލް ހުށަހެޅުއްވި ބިލުގައި އޮތީ އިމިގްރޭޝަން ގާނޫނަށް އަކުރެއް އިތުރުކޮށް، އިޒްރޭލުގެ ޕާސްޕޯޓް އޮންނަ މީހުންނާއި އިޒްރޭލު ޕާސްޕޯޓާއި އެކު އެހެން ގައުމެއްގެ ޕާސްޕޯޓް އޮންނަ މީހުންނަށް ވެސް ރާއްޖެއަށް އެތެރެނުވެވޭ ގޮތަށް އެ ގާނޫނު ބަދަލުކުރުމަށެވެ.
އިބްތިދާއީ ބަހުސް ނިމުމުން ބިލު ބަލައިގަތުމާ މެދު ގޮތެއް ނިންމާނެ އެވެ. އެ ވޯޓުން ތަޅުމަށް ބިލު ބަލައިގަންނަން ފާސްވެއްޖެ ނަމަ ބިލު ދިރާސާ ކުރުމަށް ކަމާބެހޭ ކޮމެޓީއަށް ފޮނުވާނެ އެވެ.
އެ ބިލު މަޖިލީހުގެ 241 ކޮމިޓީއަށް ފޮނުވުމަށް ޕީއެންސީގެ ޕީޖީ ލީޑަރު އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ ހުށަހަޅާފަ އެވެ. ބިލު ފާސްކޮށް ގާނޫނަށް އިސްލާހު ގެނައުމަށް ވޯޓަށް އަހާނީ ކޮމެޓީ މަރުހަލާ ނިމުމުންނެވެ.
އިޒްރޭލު ޕާސްޕޯޓު މަނާކުރަން ރާއްޖެއިން ނިންމުމުން ދުނިޔޭގެ އެކި ކަންކޮޅުގައި ދިރިއުޅޭ އެކި ގައުމުތަކުގެ އާންމުން ވަނީ ރާއްޖެއަށް ތައުރީފުކޮށްފަ އެވެ. ނަމަވެސް އެކަމާ ގުޅިގެން ބައެއް ފަރާތްތަކުގެ ނުރުހުން ވެސް ރާއްޖެއަށް އަމާޒުވެފައިވެ އެވެ.
