ބިދޭސީ މަސައްކަތްތެރިން ގެނައުމުގެ މަސައްކަތްތައް ކުރެވޭ ނިޒާމު ހަރުދަނާ ކުރުމަށް މަސައްކަތްތަކެއް ކުރަމުންދާތީ، އެކަމާ ގުޅޭ ހިދުމަތްތައް ދިނުމުގައި ލަސްކަމެއް އަތުވެދާނެ ކަމަށް ހޯމް މިނިސްޓްރީން ބުނެފި އެވެ.
އެ މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ، ބިދޭސީ މަސައްކަތްތެރިން ރާއްޖެއަށް ގެނައުމާއިގުޅޭ އުސޫލުތައް މުރާޖައާކުރުމުގެ މަސައްކަތް ކުރަމުންދާ ކަމަށެވެ.
އެ ނިޒާމުގައި ހުރި މައްސަލަތައް ދެނެގަނެ، އަލަށް ގާއިމުކުރާ ނިޒާމަކީ ފަސޭހަ އަދި އަވަސް ހިދުމަތްތަކެއް ފޯރުކޮށްދެވޭނެ، އަދި ހިދުމަތް ލިބިގަންނަ ފަރާތްތައް ޖަވާބުދާރީ ކުރެވޭނޭ ނިޒާމަކަށް ހެދުމަށް މަސައްކަތް ކުރަމުން އަންނަ ކަމަށް ވެސް އެ އިއުލާނުގައި ބުންޏެވެ.
"ވިމާ، މި މަސައްކަތްތަކުގެ ސަބަބުން ދިވެހިރާއްޖޭގައި މަސައްކަތްކުރުމަށް ބިދޭސީން ގެނައުމަށް އެދޭ ހުއްދަތަކުގެ ތެރެއިން ދޫކުރެވޭ ކޯޓާ، ވޯކް ޕަރމިޓް، ޑިޕޮޒިޓް ރީފަންޑް އަދި މި ނޫންވެސް ހިދުމަތްތައް ފޯރުކޮށްދިނުމުގައި އާންމު ގޮތެއްގައި ހިދުމަތް ދެވޭ މުއްދަތަށްވުރެ ލަސްވުމަކީ އެކަށީގެންވާކަމެއް ކަމުގައި ދެންނެވިން،" އިއުލާނުގައި ބުނެފައިވެ އެވެ.
މި ލަސްވުމާ ގުޅިގެން ކުރިމަތިވާނެ ދަތިތަކަށް މައާފަށް އެދޭ ކަމަށާއި ބިދޭސީ މަސައްކަތްތެރިންނާ ގުޅޭ މަސައްކަތްތައް ވީ އެންމެ އަވަސް މުއްދަތެއްގެ ތެރޭގައި ނިންމުމަށް މަސައްކަތް ކުރަމުންގެންދާނެ ކަމަށް ވެސް އިއުލާނުގައި ހޯމް މިނިސްޓްރީން ބުންޏެވެ.
ހޯމް މިނިސްޓްރީން މިއަދު ކުރި އެހެން އިއުލާނެއްގައި، ބުނީ ބިދޭސީ މަސައްކަތްތެރިން ގެ ފީގެ ގޮތުގައި ދައުލަތަށް ދައްކަން ޖެހޭ 1.7 ބިލިއަން ރުފިޔާ ނުދައްކައި އެބަ އޮތް ކަމަށެވެ. އެގޮތުން 10،619 ވަޒީފާދޭ ފަރާތުގެ ނަންމަތީގައި ރަޖިސްޓަރީ ކުރެވިފައިވާ 102،807 ބިދޭސީ މަސައްކަތްތެރިންގެ ފީ އަދި ޖޫރިމަނާގެ ގޮތުގައި ޖުމްލަ 1،765،704،400 ރުފިޔާ ދައްކަން ޖެހޭ ކަމަށް ވެސް ބުންޏެވެ.
ރާއްޖޭގައި މަސައްކަތް ކުރާ ބިދޭސީ މަސައްކަތްތެރިންގެ މައްސަލަ ހައްލުކުރުމަށް ސަރުކާރުން ގެންދަނީ ގިނަ މަސައްކަތްކެއް ކުރަމުންނެވެ. އެގޮތުން ބިދޭސީ މަސައްކަތްތެރިން ރެގިއުލަރައިޒް ކުރުމުގެ ގައުމީ މަސައްކަތެއް ހޯމް މިނިސްޓްރީން މިދިޔަ މަހު ފަށާފައިވެ އެވެ.
