ރާއްޖޭގައި މަސައްކަތް ކުރާ ބިދޭސީ މަސައްކަތްތެރިންގެ ފީގެ ގޮތުގައި ދައުލަތަށް ދައްކަން ޖެހޭ 1.7 ބިލިއަން ރުފިޔާ ނުދައްކައި އެބަ އޮތް ކަމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީއިން ބުނެފި އެވެ.
ހޯމް މިނިސްޓްރީން މިއަދު ކުރި އިއުލާނެއްގައި ބުނެފައިވަނީ، 10،619 ވަޒީފާދޭ ފަރާތުގެ ނަންމަތީގައި ރަޖިސްޓަރީ ކުރެވިފައިވާ 102،807 ބިދޭސީ މަސައްކަތްތެރިންގެ ފީ ދައުލަތަށް ލިބިފައި ނުވާކަން ފާހަގަކުރެވިފައިވާ ކަމަށެވެ.
މި މަސައްކަތްތެރިންގެ ފީގެ ގޮތުގައި ނުދައްކާވާ ފައިސާގެ ޖުމްލަ އަދަދަކީ 1،765،704،400 (އެއް ބިލިއަން ހަތްސަތޭކަ ފަސްދޮޅަސް ފަސް މިލިއަން ހަތްލައްކަ ހަތަރުހާސް ހަތަރުސަތޭކަ) ރުފިޔާ ކަމަށް ހޯމް މިނިސްޓްރީގެ އިއުލާނުގައި ބުންޏެވެ.
މީގެ ތެރޭގައި ޖޫރިމަނާތައްވެސް ހިމެނޭއިރު މި ފައިސާ ޖޫން 18، ގެ ކުރިން ދެއްކުމަށްވެސް މިނިސްޓްރީން ގެޒެޓުކުރި އިއުލާނުގައި އިލްތިމާސްކޮށްފައިވެ އެވެ.
އަދި، އެ މުއްދަތުގައި ފައިސާ ނުދައްކާ ފަރާތްތަކުގެ މައުލޫމާތު އާންމުކޮށް އިއުލާނު ކުރާނެ ކަމަށާއި އެކްސްޕެޓް ސިސްޓަމް މެދުވެރިކޮށް އެފަރާތްތައް ސަސްޕެންޑްކޮށް އައު ހުއްދަތައް ދޫކުރުން މެދުކަނޑައިލާނެ ކަމަށްވެސް އެ އިއުލާނުގައި ބުންޏެވެ.
ރާއްޖޭގައި މަސައްކަތް ކުރާ ބިދޭސީ މަސައްކަތްތެރިންގެ މައްސަލަ ހައްލުކުރުމަށް ސަރުކާރުން ގެންދަނީ ގިނަ މަސައްކަތްކެއް ކުރަމުންނެވެ. އެގޮތުން، މަސައްކަތްތެރިންގެ ގޮތުގައި އައިސް ގަވާއިދާ ހިލާފަށް ވިޔަފާރިކުރާ ބިދޭސީން ބަންދުކޮށް 48 ގަޑިއިރުގެ ތެރޭގައި ޑިޕޯޓު ކުރަން ފަށާފައިވާ ކަމަށް މެއި މަހުގެ ފުރަތަމަ ދުވަހު ރައީސް ޑރ. މުހައްމަދު މުއިއްޒު ވިދާޅުވި އެވެ.
މަސައްކަތްތެރިންގެ ދުވަހާ ގުޅިގެން ރައީސް މުއިއްޒު އެދުވަހު ދެއްވި ހިތާބުގައި ވިދާޅުވީ ގަވާއިދާ ހިލާފަށް ބިދޭސީން ވިޔަފާރި ކުރަމުންދާ މައްސަލައަށް ހައްލެއް ލިބޭނީ ގިނަދުވަސްތަކެއް ވަންދެން، ހުއްޓުމެއް ނެތި ގާނޫނު ތަންފީޒު ކޮށްގެން ކަމަށެވެ.
