މިދިޔަ މަހަކީ ދޮޅު އަހަރު ދުވަހުގެ ތެރޭގައި ރާއްޖެ އަށް އެންމެ މަދުން ޓޫރިސްޓުން އައި މަސް ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފި އެވެ.
ކޮންމެ އަހަރަކު ވެސް ރާއްޖެ އަށް އެންމެ މަދުން ޓޫރިސްޓުން އަންނަނީ މޭ އަދި ޖޫން މަހު އެވެ. މިދޔަ މަހަކީ، 2022 ގެ ސެޕްޓެމްބަރު މަހަށްފަހު ރާއްޖެ އަށް އެންމެ މަދުން ޓޫރިސްޓުން އައި މަހެވެ. ސެޕްޓެމްބަރު މަހު އައީ 111,986 ޓޫރިސްޓުންނެވެ. ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިދިޔަ މަހު ރާއްޖެ އައިސްފައިވަނީ 119,875 ޓޫރިސްޓުންނެވެ. މިދިޔަ އަހަރުގެ މޭ މަހު ރާއްޖެ އައީ 120,959 ޓޫރިސްޓުންނެވެ.
ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި މިއަހަރުގެ ފުރަތަމަ ފަސް މަސް ދުވަހުގެ ތެރޭގައި 895,764 ޓޫރިސްޓުން ވަނީ ރާއްޖެ އައިސްފަ އެވެ. އެއީ މިދިޔަ އަހަރުގެ ފުރަތަމަ ފަސް މަސް ދުވަހު އައި ޖުމްލަ ޓޫރިސްޓުންގެ އަދަދަށްވުރެ 10.2 ޕަސެންޓް އިތުރު އަދަދެކެވެ.
ތަފާސް ހިސާބުތަކުން ފެންނަން އޮތް ގޮތުގައި، މިދިޔަ އަހަރުގެ ފުރަތަމަ ފަސް މަސް ދުވަހާ އަޅާބަލާއިރު، މި އަހަރުގެ ފުރަތަމަ ފަސް މަސް ދުވަހުގެ ތެރޭގައި އިންޑިޔާ އިން އައި ޓޫރިސްޓުންގެ އަދަދު 42 ޕަސެންޓް ދަށްވެ ޗައިނާ އިން އައި ޓޫރިސްޓުންގެ އަދަދު ވަނީ 59 ޕަސެންޓް އިތުރުވެފަ އެވެ. މޭ މަހުގެ ނިޔަލަށް ޗައިނާއިން 101،202 ޓޫރިސްޓުން އައިސްފައިވާއިރު، އިންޑިޔާ އިން އައިސްފައިވަނީ 53،852 ޓޫރިސްޓުންނެވެ. ރާއްޖެ އަށް މިހާރު އެންމެ ގިނައިން ޓޫރިސްޓުން އަންނަނީ ޗައިނާ އިންނެވެ.
