ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބަލަން ހެދި ކޮމިޝަނުން ބަލަން ފެށި ގިނަ މައްސަލަތައް ނުނިމެނީސް، އެ ކޮމިޝަނުގެ މަސައްކަތް ނިމިފައިވާ ކަމަށް ބުނެ ރައީސް ޑރ. މުހައްމަދު މުއިއްޒު އެ ކޮމިޝަން މިއަދު އުވާލައިފި އެވެ.
ކުރީގެ ރައީސް އިބްރާހިމް މުހައްމަދު ސޯލިހު އުފެއްދެވި މަރު ކޮމިޝަނުން 27 މައްސަލައެއް ބަލަން ފެށި އެވެ. ނަމަވެސް ތަހުގީގު ނިންމައި ރައީސް އޮފީހަށް ފޮނުވުނީ އޭގެ ތެރެއިން 10 އަކަށްވުރެ މަދު މައްސަލަ އެވެ.
އެކަމަކު މަރު ކޮމިޝަން އުވާލައި ރައީސް މުއިއްޒު މިއަދު ނެރުއްވި ރިޔާސީ ގަރާރުގައި ވިދާޅުވެފައި އޮތީ އެ ކޮމިޝަން އުވާލަނީ އެ ކޮމިޝަންއާ "މަތިކޮށްފައިވާ މަސައްކަތް އެ ކޮމިޝަނުން ނިންމާފައިވީ ހިނދު" ކަމަށެވެ.
މަރު ކޮމިޝަނުން ބަލައި ނިންމި ބައެއް މައްސަލަތަކުގެ ތެރޭގައި ހިމެނެނީ ގެއްލުވައި މަރާލި ނޫސްވެރިޔާ ރިލްވާން އަބްދުﷲ ގެ މައްސަލަ އާއި ބަންގްލަދޭޝްގައި މަރުވި ރައުދާ އާތިފްގެ މައްސަލަ އާއި ކުރީގެ މެންބަރު އަފްރާޝީމް އަބްދުﷲ ގެ މައްސަލަ އާއި ޖަލުގައި މަރުވި ހަސަން ޒަރީރުގެ މައްސަލަ އާއި ގޭންގު ހަމަލާއެއްގައި މަރާލި ފާތިރު މުހައްމަދުގެ މައްސަލަ ހިމެނެ އެވެ.
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައއް ތަހުގީގު ކުރުމަކީ ކުރީގެ ރައީސް ސޯލިހުގެ ރިޔާސީ ވައުދެކެވެ. އެ ކޮމިޝަން އުފެއްދީ އެމަނިކުފާނު ވެރިކަމާ ހަވާލުވެވަޑައިގަތުމަށްފަހު އެއް ދުވަސް ފަހުން ނޮވެމްބަރު 18، 2018، ގަ އެވެ.
