މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރުމަށް އެކުލަވާލި ރިޔާސީ ކޮމިޝަނުން ކުރިއަށް ގެންދިޔަ ތަހުގީގުތަކުގެ ހޯދުންތަކާ ގުޅޭގޮތުން ގާނޫނީ ގޮތުން އުނިކުރަން ޖެހޭ ބައެއް މައުލޫމާތުތައް އުނިކުރުމަށް ފަހު އެކުލަވާލާ ރިޕޯޓުތައް ހާމަކުރުމަށް ރައީސް އޮފީހުގައި އެދޭނެ ކަމަށް އެ ކޮމިޝަނުން ބުނެފި އެވެ.
ތަހުގީގުތަކުގެ ރިޕޯޓުތަކާއި ހޯދުންތައް ރައީސް އޮފީހުގެ ހުއްދަ ނެތި އެއްވެސް ބަޔަކާ ހިއްސާ ނުކުރުމަށް އެ ކޮމިޝަނަށް ރައީސް އޮފީހުން ވަނީ އަންގާފަ އެވެ. އެކަމާ ގުޅިގެން ކަންބޮޑުވުން ފާޅުކޮށް މަރު ކޮމިޝަނުން ބަލަމުންދާ މައްސަލަތަކުގައި އިންސާފު ނުލިބި ތިބި އާއިލާތަކާއި ބައެެއް މަދަނީ ޖަމިއްޔާތައް ގުޅިގެން މިއަދު ބަޔާނެއް ނެރުނެވެ.
އެ ބަޔާނުގައި ވަނީ ތަހުގީގުގައި ބަޔާންދިން ހެކިވެރިންގެ މައުލޫމާތުތައް ރައްކާތެރި ކުރުމަށް ބައިބައި އުނިކޮށްފައިވާ ރިޕޯޓެއް އާއިލާތަކާ ހިއްސާކުރާނެ ކަމުގެ ޔަގީންކަން ދިން ކަމަށާއި ނަމަވެސް އެންމެ ފަހު ވަގުތު އެ ނިންމުން ބަދަލުކޮށްފައިވާ ކަމަށެވެ. މަރު ކޮމިޝަނުގެ މުއްދަތު މި މަހުގެ ނިޔަލަށް ހަމަވާނެ އެވެ.
"މި ރިޕޯޓުތަކުގައި އެކުލެވޭ ގިނަ މައުލޫމާތުތަކަކީ ވަރަށް ހައްސާސީ އަދި ސިއްރު މައުލޫމާތުތަކެއް. ކޮމިޝަނުގެ އަމާޒަކީ އެ ބައިބައި އުނިކުރުމަށް ފަހު އެކުލަވާލާ ރިޕޯޓުތައް 31 މެއިގެ ކުރިން ނިންމާލުމަށް. ރިޔާސީ ކޮމިޝަނުގެ ގާނޫނުގައި އޮތީ ހުރިހާ ރިޕޯޓެއް ވެސް ހުށަހަޅަން ޖެހޭނީ ރައީސުލްޖުމްހޫރިއްޔާއަށް ކަމަށް," މިއަދު ނެރުނު ބަޔާނެއްގައި ރިޔާސީ ކޮމިޝަނުން މައުލޫމާތު ދިނެވެ.
އެ ރިޕޯޓުތައް ނިންމުމަށް ހާއްސަ އިސްކަމެއް ދެމުންދާ ކަމަށާއި އެ ރިޕޯޓުތައް ހާމަކުރުމަށް ރައީސްގެ އަރިހުން އެދޭނެ ކަމަށް ވެސް މަރު ކޮމިޝަނުން ވަނީ ބުނެފަ އެވެ. ތަހުގީގުގެ ބޭނުމަށް އެއްކުރި ހުރިހާ މައުލޫމާތަކާއި ތަކެއްޗެއް ރައީސް އޮފީހާ ހަވާލުކުރުމަށް ވެސް ކޮމިޝަން ތައްޔާރުވެފައިވާ ކަމަށް އެ ބަޔާނުގައި ބުނެފައިވެ އެވެ.
"ވީހާވެސް ހާމަކަން ބޮޑުކޮށް ކޮމިޝަނުގެ ކަންކަން ކުރިއަށް ގެންގޮސް މެންޑޭޓުގައި ކަނޑައަޅާފައިވާ ވަރުގެ ތަހުގީގުތަކެއް ކުރުމަށް ކޮމިޝަނުންނާއި, ބޭރުގެ ޕާޓްނަރުން ގުޅިގެން ގިނަ މަސައްކަތްތަކެއް ކުރެވިފައިވޭ. މި ކުށްތަކަށް އިންސާފު ގާއިމުކޮށް ޖަވާބުދާރީ ކުރުމަށް ގެންގުޅެފައިވާނީ ވިކްޓިކް ސެންޓާޑް އެޕްރޯޗެއް," އެ ބަޔާނުގައި ބުނެފައިވެ އެވެ.
ރިޔާސީ ކޮމިޝަންތަކުގެ ގާނޫނުގެ ދަށުން އެ މައުލޫމާތުތައް ހާމަނުކުރެވޭނެ ހުރަހެއް އޮތް ކަމަށް ގަބޫލުނުކުރާ ކަމަށް އާއިލާތަކުން ބުނެ އެވެ. ގާނޫނުގެ ދަށުން މައުލޫމާތު ހާމަނުކުރެވޭ ގޮތަށް އޮތް މާއްދާއާ ގުޅޭގޮތުން ސުވާލު ކުރުމުން އެ ކަމަށް މަރު ކޮމިޝަނުން އިޖާބަ ދީފައި ނުވާ ކަމަށް އާއިލާތަކުންނާއި ޖަމިއްޔާތަކުން ބުނެފައިވެ އެވެ.
މަރު ކޮމިޝަންގެ ފަރާތުން ނޫސްވެރިޔާ އަހުމަދު ރިލްވާންގެ މައްސަލައިގައި ވަނީ ރިޕޯޓެއް ނެރެފަ އެވެ. އެ ރިޕޯޓުގައި ހިމަނާފައި ވަނީ ފުލުހުން ކުރިން ހޯދާފައިވާ ގިނަ މައުލޫމާތުތަކެކެވެ. ޔާމީންގެ މަރުގެ މައްސަލައިގައި ކޮމިޝަނުން ރިޕޯޓެއް ނުނެރެ އެވެ.
މި މައްސަލަތަކާ ގުޅިގެން މިދިޔަ ސަރުކާރުގައި ތިން މީހުން ހައްޔަރުކުރި އެވެ. އެ މީހުންގެ މައްޗަށް ޓެރަރިޒަމްގެ ދައުވާތަކެއް އުފުލުމަށް ފަހު ގިނަ ދުވަސްތަކެއް ވަންދެން ބަންދުގައި ބޭތިއްބުމަށް ފަހު މަދަނީ މިންގަނޑުން މައްސަލަތައް ކުރިއަށް ނުގެންދެވޭނެ ކަމަށް ކަނޑައަޅައި އެ މައްސަލަތައް ކޯޓުން ބަލާފައި ނުވެ އެވެ.
