ހަތަރު ވަނަ އިންޓަނޭޝަނަލް ކޮންފަރެންސް އޮން ސްމޯލް އައިލެންޑް ޑިވެލޮޕިން ސްޓޭޓްސް (ސިޑްސް) ގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އާއެކު އެންޓިގުއާ އެންޑް ބާބިއުޑާއަށް ދިޔަ ދިވެހި ވަފުދާއެކު އެމެރިކާއިން ރާއްޖެއަށް ކަނޑައަޅާފައި ހުންނަ ސަފީރު ހޫގޯ ޔޫ-ހޯ ޔޮން ހަރަކާތްތެރިވި ސަބަބު ހާމަކުރަން ސަރުކާރުން ދެކޮޅު ހަދައިފި އެވެ.
ސިޑްސްގައި ބައިވެރިވުމަށް އެމެރިކާ ސަފީރު އެންޓިގުއާ އަށް ދަތުރުކުރެއްވީ ދިވެހި ވަފުދާއެކުކަން މިހާތަނަށް އެނގިފައި ނުވެ އެވެ. ނަމަވެސް، ދިވެހި ވަފުދާއެކު ބައެއް އިވެންޓުތަކުން ސަފީރު ފެނުނެވެ.
އެގޮތުން އެ ކޮންފަރެންސްގެ ހަވާސާގައި ރާއްޖެއިން ބޭއްވި "ފްރޮމް އެމްބިޝަންސް ޓު ޕްރެކްޓިސް: އެޑްވާންސިން ސިޑްސް ފޯ ގޯލްސް ތުރޫ ދަ ސީއެސްއާރުއައި އިނީޝިއޭޓިވް" އިވެންޓުގައި ދިވެހި ވަފުދާއެކު ސަފީރު ބައިވެރިވި ފޮޓޯ ރައީސް އޮފީހުން ވަނީ ސޯޝަލް މީޑިއާގައި ޕޯސްޓުކޮށްފަ އެވެ.
އޭގެއިތުރުން، ސިޑްސް ކޮންފަރެންސްގެ ހަވާސާގައި އެންވާރަމަންޓު މިނިސްޓަރު ތޯރިގު އިބްރާހިމް އާ ސަފީރު އަދި އެމެރިކާ ސަރުކާރުގެ އޮފިޝަލުން ބައްދަލުކުރެއްވި ކަމަށް އެ މިނިސްޓްރީންވެސް ބުނެފައިވެ އެވެ.
މިކަމާ ގުޅިގެން "އަދަދު" އިން އިއްޔެ ސުވާލު ކުރުމުން، ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވީ، ދިވެހި ވަފުދާއެކު ސަފީރު ބައިވެރިވި ސަބަބު ޖެހޭނީ ބަލައިލަން ކަމަށެވެ.
ސިޑްސްގެ ހަވާސާ އިވެންޓެއްގައި ދިވެހި ވަފުދާއެކު އެމެރިކާ ސަފީރު -ފ ޮޓޯ: ރައީސް އޮފީސް
"އެހެންނަމަވެސް، އަޅުގަނޑުމެންގެ ޓީމުގެ ތެރޭގަ ހަމަ ހިމެނެނީ މިކަމާ ގުޅުންހުރި ހުރިހާ ދާއިރާއެއްގެ ބޭފުޅުންކަން ހަމަ ފާހަގަކޮށްލަން،" ހީނާ ވިދާޅުވި އެވެ.
ރައީސްގެ އިތުރުން ސިޑްސްގައި ބައިވެރިވި ވަފުދުގައި ފޮރިން މިނިސްޓަރު މޫސާ ޒަމީރާއި ތިމާވެއްޓާ ބެހޭ މިނިސްޓަރު ތޯރިގު އިބްރާހިމް އާއި ހައުސިން މިނިސްޓަރު ޑރ. އަލީ ހައިދަރު އަހްމަދު ހިމެނިވަޑައިގަންނަވަ އެވެ. އޭގެ އިތުރުން, އެޗްޑީސީގެ މެނޭޖިން ޑިރެކްޓަރު އިބްރާހިމް ފަަޒުލް ރަޝީދާއި ކްލައިމެޓް ޗޭންޖު އެންވޯއި އަލީ ޝަރީފާއި ފޮރިން މިނިސްޓްރީގެ އެމްބެސެޑާ އެޓް ލާޖު އަލީ ނަސީރު އަދި ޕްރޮޓޮކޯލް ހެޑް މުހައްމަދު ޝަހުދީ ވެސް ބައިވެރިވެވަޑައިގެންނެވަ އެވެ.
އދ. ގެ 37 ގައުމު ގައިވާ މި ކޮންފަރެންސަކީ ކޮންމެ 10 އަހަރަކުން އެއްފަހަރު ކުރިއަށްގެންދާ ކޮންފަރެންސަކަށް ވާއިރު، ކޮންފަރެންސްގައި ސިޑްސްގެ ހަރަކާތްތައް މުސްތަގުބަލުގައި ކުރިއަށްގެންދާނެ ގޮތެއް ވެސް އެކަށައަޅާނެ އެވެ.
ކުދި ޖަޒީރާ ގައުމުތަކުގެ ފުރަތަމަ ކޮންފަރެންސް 1989 ވަނަ އަހަރު ރާއްޖޭގައި ބޭއްވުމަށްފަހު ރާއްޖެއިން ވަނީ ކުދި ޖަޒީރާ ގައުމުތައް އެކުލެވޭ ޖަމާއަތެއް އުފެއްދުމުގެ މަސައްކަތް ބާރަށް ކުރިޔަށްގެންގޮސްފަ އެވެ.
