ރާއްޖޭގެ ބާސްކެޓްބޯޅަ އަށް ގިނަ އަހަރުތަކެއް ވަންދެން ހިދުމަތްތަކެއް ކޮށްދެއްވި، އަހުމަދު ހާފިޒް އަކީ، އެ ފަދަ ދެ ވަނައެއް ނެތް ފަދަ ކުޅިވަރުގެ ހިދުމަތްތެރިއެއް ކަމަށް މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އިން ހާމަކޮށްފި އެވެ.
ހާފިޒް، މިއަދު ވަނީ އަަވަހާރަވެފަ އެވެ.
ރާއްޖޭގެ ކުޅިވަރުގެ ބާނީއެއްގެ ގޮތުގައި މަޝްހޫރުވި މުހައްމަދު ޒާހިރު ނަސީރު އިސްނަންގަވައި، ބާސްކެޓްބޯޅަ އެސޯސިއޭޝަން އުފެއްދުމުގެ ކަންކަން ކުރެއްވުމަށް ފަހު، ހާފިޒް ހަމަޖެއްސީ ބާސްކެޓް އެސޯސިއޭޝަންގެ ޖެނެރަލް ސެކްރެޓަރީ އަކަށެވެ. އެއީ، ފުޓްބޯޅައިގެ ކަންކަމަށް ބަލާއިރު، ކްލަބް ވެލެންސިއާ އާއި ކުޅިވަރު ތެރޭގައި ހާފިޒްގެ މަސައްކަތް ބަލައިގަނެވޭތީ، ޒާހިރު ނިންމެވި ނިންމުމެކެވެ.
އޭގެ ފަހުން، 1991 އަހަރުން ފެށިގެން، އެސޯސިއޭޝަންގެ މަސައްކަތް ފަށައި، ބާސްކެޓް ހަރަކާތްތައް ހިންގެވުމުގައި ހާފިޒް އިސްކޮށް ހަރަކާތްތެރިވި އެވެ. އެ އަށް ފަހު، 2008 ގައި ކުޅިވަރު އެސޯސިއޭޝަންތަކުގެ އަސާސީ ގަވާއިދު އިސްލާހުކޮށް އިންތިހާބު އެންމެ ފުރަތަމަ ބާއްވަން ފެށިއިރު، ހާފިޒް ވަނީ އެންމެ ފުރަތަމަ އިންތިހާބުވި ބާސްކެޓްބޯޅަ އެސޯސިއޭޝަންގެ ރައީސްގެ މަގާމު ފުރުއްވައިފަ އެވެ. އޭގެ ކުރިން މިނިސްޓްރީގެ ފަރާތުން ހަމަޖައްސާ ފަރާތެއް އެސޯސިއޭޝަން ހިންގުމުގައި އުޅުނުއިރު، އެ މަސައްކަތްތަކުގައި ވެސް ހާފިޒް އިސްކޮށް ހުންނެވި އެވެ.
ދެ ވަނަ ދައުރަކަށް ހާފިޒް އިންތިހާބުވީ 2012 ވަނަ އަހަރު އެވެ. އޭގެ ފަހުން، 2016 ވަނަ އަހަރުގެ ޑިސެމްބަރު މަހުގެ 16އާ ހަމައަށް ބާސްކެޓްބޯޅައިގެ ރައީސެއްގެ ގޮތުގައި މަސައްކަތްތަކެއް ކުރެއްވި އެވެ. ޖުމްލަ ގޮތެއްގައި ބަލާއިރު، 1991 އިން ފެށިގެން 2016ގެ ޑިސެމްބަރާ ހަމައަށް ރާއްޖޭގެ ބާސްކެޓްބޯޅައިގެ ކަންްކަން ހިންގުމުގައި ހާފިޒްގެ ބައިވެރިވެވަޑައިގެންނެވުން އެންމެ މަތީ ފަންތީގައި އޮތެވެ.
ހާފިޒް ވަނީ، 2014 ވަނަ އަހަރު ސައުތު އޭޝިއަން ބާސްކެޓްބޯޅަ އެސޯސިއޭޝަން (ސާބާ)ގެ ރައީސް ކަމަށް އިންތިހާބުވެވަޑައިގެންފަ އެވެ. އެ މަގާމުގައި ހޭދަކުރެއްވި ދައުރުގައި ސަރަހައްދުގެ ބާސްކެޓްބޯޅައިގައި ވެސް މުހިންމު މަސައްކަތްތަކެް ކުރެއްވި އެވެ.
އެމްބީއޭ އާއި ސާބާގެ މިހާރުގެ ރައީސް އަހުމަދު އާދަމް (އެޑަމް)، ވިދާޅުވީ ހާފިޒަކީ އަބަދުވެސް ބާސްކެޓްބޯޅަ އާއިލާއާ ގުޅުން އޮންނަ ގާތްގުޅުމެއް ބަހައްޓަވާ ފަރާތެއް ކަމަށެވެ.
"ބޭރުގެ ވެސް އެކިއެކި ފެޑެރޭޝަންތަކާ ގުޅުން އޮވޭ ވަރަށް ފަހަކާ ޖެހެންދެން ވެސް. ހާފިޒަކީ އަސްލު ހަގީގަތުގައި މިއަދު މިދެކޭ ބާސްކެޓްބޯޅަ އެސޯސިއޭޝަން އުފެދިގެން އައިއިރުގައި އޭގެ އެއް ތަނބު. ހާފިޒް އޭރު ވެސް ވަރަށް ބޮޑަށް ޔޫތު ޑިވެލޮޕްމަންޓް ޕްރޮގްރާމާއި މި ކަހަލަ ކަންކަމަށް އަހައްމިއްޔަތުކަމެއް ދެއްވި،" އެޑަމް ވިދާޅުވި އެވެ.
"އެންމެ ފުރަތަމަ ސުޕުން (ސްރީ ލަންކާ ކޯޗު) ގެނެސް މަސައްކަތް ފެށީ ވެސް ހާފިޒް، އަންހެން ޓީމުން ފުރަތަމަ ބްރޮންޒް މެޑަލް ހޯދީ ވެސް ހާފިޒްގެ ލީޑަޝިޕްގައި، ފިިރިހެން ބާސްކެޓް ޓީމާއި ތުރީ އެކްސް ތުރީ އިން ވެސް މެޑަލް ގެނައި. ހާފިޒަކީ މި ހުރިހާ ގޮތަކުން ވެސް ބާސްކެޓްބޯޅަ އަށް ހިދުމަތްތަކެއް ކޮށްދެއްވި ފަރާތެއް،"
ހާފިޒް ވަނީ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ހިންގާ ކޮމިޓީގައި 2009-2013 އަށް ދައުރެއް ފުރިހަމަަ ކުރައްވައިފަ އެވެ.
ހާފިޒް، ރާއްޖޭގެ ކުޅިވަރަށް ކޮށްދެއްވި މުހިންމު މަސައްކަތްތަކުގެ އަގުވަޒަންކޮށް، ކުޅިވަރު އާއިލާގެ ގިނަ ބަޔަކު އަންނަނީ ޝުއޫރުފާޅުކުރަމުންނެވެ.
