ރައްޔިތުންގެ މަޖިލީހުގެ ރައީސްގެ މަގާމަށް ފޮނަދޫ ދާއިރާގެ މެންބަރު އަދި ވެރިކަންކުރާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ އިންތިހާބުކުރި ވޯޓުގައި، މަޖިލީހުގައި ސަރުކާރުގެ މެންބަރުން ތިބި އަދަދަށް ވޯޓު ލިބިވަޑައިނުގަތެވެ.
ވިހި ވަނަ މަޖިލީހުގެ ފުރަތަމަ ޖަލްސާގައި ނެގި ސިއްރު ވޯޓުގައި ބައިވެރިވީ، ޖުމްލަ 93 މެންބަރުންގެ ތެރެއިން 92 މެންބަރުންނެވެ. ވޯޓު ނުލައްވަނީ ރިޔާސަތުގައި އިންނެވި މީދޫ ދާއިރާގެ މެންބަރު އަހުމަދު ސިޔާމް މުހައްމަދު އެވެ.
ވޯޓުގެ ނަތީޖާއިން ފެންނަ ގޮތުގައި އަބްދުއްރަހީމް ރައީސް ކަމަށް ގެންނަން ވޯޓު ދެއްވީ 71 މެންބަރުންނެވެ. އެމަނިކުފާނާ ވާދަކުރެއްވި އެމްޑީޕީގެ، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް އަށް ވޯޓު ދެއްވީ 14 މެންބަރުންނެވެ. ބާތިލުވީ ހަތް މެންބަރުންގެ ވޯޓެވެ.
މަޖިލީހުގައި ޕީއެންސީގެ 75 މެންބަރުން ތިއްބަވަ އެވެ. އޭގެ އިތުރުން ސަރުކާރާ އެއްކޮށް މަސައްކަތް ކުރާ ތިން ޕާޓީގެ ހަތަރު މެންބަރުންނާއެކު ސަރުކާރު މެންބަރުންގެ އަދަދު 79 އަކަށް އަރަ އެވެ. އޭގެ ތެރޭގައި ވޯޓުގައި ބައިވެރިވެ ނުލައްވާ ސިޔާމް ވެސް ހިމެނޭތީ، ވޯޓުގައި ބައިވެރިވީ ސަރުކާރުގެ 78 މެންބަރުންނެވެ.
އެހެންކަމުން، އަބްދުއްރަހީމް މަޖިލީހުގެ ރައީސް ކަމަށް ގެންނަން ނެގި ވޯޓުގައި، އެމަނިކުފާނަށް ލިބިފައިވާ ސަރުކާރުގެ ޖުމްލަ މެންބަރުންނަށްވުރެ ހަތް މެންބަރުން މަދު އަދަދެއްގެ ވޯޓެވެ.
އަބްދުއްރަހީމް މަޖިލީހުގެ ރައީސް ކަމަށް ގެންނަން، ޕީއެންސީގެ ފަރާތުން އެމަނިކުފާނުގެ ނަން ހުށަހަޅަން ނިންމެވީ ސީދާ ރައީސް ޑރ. މުހައްމަދު މުއިއްޒުގެ އެންގެވުމަށެވެ.
ނަމަވެސް އަބްދުއްރަހީމާ ދެކޮޅަށް ސަރުކާރުގެ މެންބަރުންތަކެއް ވޯޓު ދީފައިވުން މިއަދުގެ ނަތީޖާއިން ވަނީ ދޭހަވެފަ އެވެ. މިކަމާ ގުޅިގެން މިހާތަނަށް އަބްދުއްރަހީމް އަދި ޕީއެންސީގެ ބަހެއްވެސް ލިބިފައެއް ނުވެ އެވެ.
