ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ރައީސްގެ މަގާމަށް ތިން ވަނަ ދައުރަކަށް ކުރިމަތިލައްވަން އެ އެސޯސިއޭޝަންގެ މިހާރުގެ ރައީސް، އަލީ ރަޝީދު (އައްޔަ) ނިންމަަވައިފި އެވެ.
ޓީޓީ އެސޯސިއޭޝަން ކަޕުގެ ސިންގަލްސް ޗެމްޕިއަންކަމާއި ގައުމީ މުބާރާތުގެ ޑަބަލްސް އާއި ޓީމް ޗެމްޕިއަންކަން ހޯދާފައިވާ އައްޔަ އަންނަނީ 2006 ވަނަ އަހަރުން ކުޅުމުން ރިޓާޔަކުރި ފަހުން، އެސޯސިއޭޝަނަށް އެކި ގޮތްގޮތުން ހިދުމަތް ކުރަމުންނެވެ.
އެ ގޮތުން، 2006 އިން 2008 އަށް އެސޯސިއޭޝަންގެ އިދާރީ މަސައްކަތްތައް ކުރިއިރު، 2008 ވަނަ އަހަރުން ފެށިގެން އޭނާ އަކީ ޓީޓީގެ ނައިބް ރައީސް އެވެ. އަދި އެންމެ ފުރަތަމަ ރައީސަކަށް އިންތިހާބުވީ، ވާދަވެރިއަކު ނެތި، 2016 ވަނަ އަހަރު ބޭއްވި އިންތިހާބު ކާމިޔާބު ކުރައްވައިގެންނެވެ.
އެކަމަކު، އެންމެ ފަހުން، 2020 ވަނަ އަހަރު ބޭއްވި އިންތިހާބު ވާދަވެރިކޮށް ދިޔައިރު، އައްޔަ، ވަނީ ދެ ވަނަ ދައުރަކަށް އިންތިހާބުވެވަޑައިގެންފަ އެވެ.
މި އަހަރު ޓީޓީ އެސޯސިއޭޝަންގެ އިންތިހާބު އޮންނައިރު، "އަދަދު" އަށް އައްޔަ ވިދާޅުވީ، މިދިިޔަ ދައުރަށް ކަނޑައެޅި ގިނަ ކަންކަމާއި ހީނުކުރާ ބޮޑެތި ކަންކަން ހާސިލްވެފައިވުމުން، އިތުރު ދައުރަކަށް ކުރިމަތިލައްވަން ނިންމާފައިވާ ކަމަށެވެ.
"ހީނުކުރާ ކަހަލަ ކަންކަންވެސް ހާސިލްވެފައި އެބަހުރި. މިސާލަަކަށް އޮލިމްޕިކަށް ކޮލިފައިވުމާ މި ކަހަލަ ކަންކަން ވެސް. އައިއޯއައިޖީގެ މެޑަލްތައް ވެސް ދިފާއުކުރެވުނު. މެޑަލްތަކަށް ބަލާއިރު، މިދިޔަ ހަަަތަރު އަހަރު ތެރޭ، ހަތަރު ރަން މެޑަލް، އަށް ރިހި މެޑަލް، ދެން 13 ލޯ މެޑަލް، މި ތަނުން އެއް ލޯ މެޑަލް ވަރަށް ހާއްސަ، އެއީ އިސްލާމިކް ސޮލިޑާރިޓީ ގޭމްސް ކަހަލަ ބޮޑު މުބާރާތެއްގައި ލިބުނީމަ،" އައްޔަ ވިދާޅުވި އެވެ.
"ދެން، ޓެކްނިކަލް ސައިޑުން ބަލަންޏާ، އަހަރެމެންގެ އަމްޕަޔަރު ޔާމީނަށް ބްލޫ ބެޖް ލިބުން، މިއީ، އިންޑިއާ ފިޔަވައި މި ސަރަހައްދުން ބްލޫ ބެޖެއް ލިބުނު ފުރަަތަމަ ގައުމު،"
ރާއްޖޭގެ ކުޅިވަރުގައި މިދިޔަ އަށް ވަރަކަށް އަހަރަށް ބަލާއިރު އެންމެ ބޮޑު ކުރިއެރުމެއް ހޯދި ކުޅިވަރަކީ ޓީޓީ އެވެ. ބައިނަލްއަގުވާމީ މުބާރާތްތަކުގައި ރާއްޖޭގެ މެޑަލް ޖުމްލައިގެ ބޮޑު ހިއްސާއެއް ގުޅިފައި އޮތީ ޓީޓީއާ އެވެ.
ޓީޓީގެ ކުރިިއެރުމުގެ ދުވެލި ހުއްޓުނަނުދީ އިތުރަށް ފުޅާކުރުމުގެ ޒިންމާއާ ހަވާލުވެހުރި އެސޯސިއޭޝަނުން އެކަން ކުރަން މުހިންމު ނިންމުންތަކެއް ވެސް ނިންމި އެވެ.
"އިތުރު ފެސިލިޓީސްތަކަށް ބަލަންޏާ މިދިޔަ ހަތަރު އަހަރުގެ ތެރޭގައި ހުޅުމާލޭގައި ކުޅޭތަނެއް ހެދުނު، ފުވައްމުލަކުގައި ވެސް ތަނެއް ހެދުނު. އަނެއްހެން ބަލަންޏާ، ޑިވެލޮޕްމަންޓަށް ބަލައިފިއްޔާ، އެކެޑަމީސްތަކަށް މި ދެނީ ހޯލު ވެސް ހިލޭ ކުޅެން، ޕްރެކްޓިސް، މިއީ ރާއްޖޭގެ އެހެން ކުޅިވަރުތަކުން އަނެއްހެން ކޮށް ނުދޭ ކަމެއް،" އައްޔަ ވިދާޅުވި އެވެ.
މޯލްޑިވްސް ސްޕޯޓްސް އެވޯޑްސް އިން އެންމެ ފުރަތަމަ ހޮވި އެންމެ މޮޅު އެސޯސިއޭޝަންގެ މަގާމު ޓީޓީ އެސޯސިއޭޝަނަށް ލިބުނުއިރު، އައްޔަ ވިދާޅުވީ މިއީ ވެސް ގުޅިގެން ޓީމެއްގެ ގޮތުގައި އެސޯސިއޭޝަނުން ކުރި މަސައްކަތުގެ ނަތީޖާ ކަމަށެވެ.
"އަނެއްހެން ބަލަންޏާ މިހާރު މިއޮތް ހިންގާ ކޮމިޓީގެ ޓީމު ނިކުންނަ ގޮތަށް ހަމަ. މައިގަނޑު އެހީތެރިކަމެއް މި އިންނަނީ، ސްޕޯޓްސް މިނިސްޓްރީ އާއި އޮލިމްޕިކް ކޮމިޓީ، ދެން، ޗައިނާ އެމްބަސީ އާއި ސައުދީ އެމްބަސީ،" އައްޔަ ވިދާޅުވި އެވެ.
ޓީޓީ އެސޯސިއޭޝަންގެ އިންތިހާބު އަންނަ އޮގަސްޓްގެ ނިޔަލަށް ބާއްވަން ޖެހެ އެވެ.
