މައިނާ ހަންޏާސް ކަޕް 2024ގެ ފައިނަލުގައި މަގުކޮޅު ސްޕޯޓްސް ކުލަބް ބަލިކޮށް އެންމެ ފަހުގެ ޗެމްޕިއަން ލަކުޑިން މުބާރާތުގެ ޗެމްޕިއަންކަން ދިފާއު ކޮށްފި އެވެ.
ހަންޏާމީދޫ ފުޓްސަލް ދަނޑުގައި ކުރިއަށްދިޔަ ފައިނަލް މެޗު ލަކުޑިން ކާމިޔާބުކުރީ 3-1 ގެ ނަތީޖާ އަކުންނެވެ. މީގެ ކުރިން ގްރޫޕް ސްޓޭޖުގައި މި ދެ ޓީމު ބައްދަލުކުރި މެޗުވެސް ލަކުޑިން ކާމިޔާބުކުރީ 3-1 ގެ ނަތީޖާ އަކުންނެވެ.
މި މެޗުގެ ދެވަނަ މިނެޓުގައި އާދަމް ފަހުމާން ގޯލު ޖަހާ ލަކުޑި އަށް ލީޑު ނަގައިދިނެވެ. އަދި ފުރަތަމަ ހާފު ނިމުމުގެ ކުރިން ފަހުމާން ވަނީ އިތުރު ގޯލެއް ޖަހާ ލަކުޑީގެ ލީޑު ފުޅާކޮށްފަ އެވެ. އަދި ފުރަތަމަ ހާފު ނިމެން ހަތަރު މިނެޓަށް ވެފައި ވަނިކޮށް ފަހުމާން ވަނީ އިތުރު ގޯލެއް ޖަހާ އޭނާގެ ހެޓްރިކް ފުރިހަމަ ކޮށްފަ އެވެ.
އެކަމަކު މެޗުގެ ދެވަނަ ހާފު ފަށައިގެން މިނެޓެއްގެ ތެރޭގައި އަހުމަދު ބައްސާމް މުހައްމަދު ނައީމް ޖަހައިދިން ގޯލުން މަގުކޮޅު ސްޕޯޓްސް އިން ފަރަގު ކުޑަކުރި އެވެ. މި ގޯލަށްފަހު ވެސް މަގުކޮޅު ސްޕޯޓްސް އިން ވަނީ ގިނަ ހަމަލާތަކެއް އުފައްދާ ގޯލެއް ޖެހޭތޯ މަސައްކަތް ކޮށްފަ އެވެ.
މަގުކޮޅު ސްޕޯޓްސް އާއި ލަކުޑި ބައްދަލުކުރި ފައިނަލް މެޗުގެ ތެތެއިން - ފޮޓޯ: އަތޫފް އާތިފް / އަދަދު
މި މުބާރާތުގެ އެންމެ މޮޅު ފަސް ކުޅުންތެރިންނަކީ ލަކުޑީގެ އަބްދުالله މިދުހަތް ފަހުމީ (ބިޗަޑް), ސުއައިދު ސައީދު, އަބްދުالله ޔާމީން, މަގުކޮޅު ސްޕޯޓްސްގެ ނިޝާމް މުހައްމަދު ރަޝީދު އަދި ބައްސާމް އެވެ. އެންމެ ގިނަ ލަނޑު ޖެހި ކުޅުންތެރި އަކީ ލަކުޑީގެ ބިޗަޑް އަދި ފަހުމާން އެވެ. މި މުބާރާތުގެ ކިންގް އޮފް ދި ޓޯނަމެންޓަކީ ލަކުޑީގެ ބިޗަޑް އެވެ.
