ގައުމީ އަންހެން ވޮލީބޯޅަ ޓީމުގެ ކޯޗަކަށް ސޮފްވާން އަހުމަދު (ސޮއްޕެ)، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ހަމަޖައްސައިފި އެވެ.
ވީއޭއެމް އިން ރޭ ވަނީ ގައުމީ އަންހެން އަދި ޖޫނިއާ ޓީމުގެ ކޯޗުންގެ ޓީމު އެކުލަވާލާ ކޯޗުންނާ އެކު, އެކަމުގެ އެއްބަސްވުމުގައި ސޮއިކޮށްފަ އެވެ.
އަންހެން ގައުމީ ވޮލީ ޓީމުގެ ކޯޗަކަށް ހަމަޖެއްސި ސޮފްވާން ވަނީ ވޮލީބޯލް ޔޫތު ނިއު ޖެނަރޭޝަން ގޮވައިގެން ގައުމީ މުބާރާތުގެ ފައިނަލުގައި ކުޅެފަ އެވެ.
މީގެ ކުރިން ގައުމީ އަންހެން ޓީމުގެ އެސިސްޓަންޓް ކޯޗަކަށް ވެސް މަސައްކަތްކުރި ސޮފްވާން ފާހަގަވެގެން އައީ ޒުވާން ކުޅުންތެރިންނަށް ފުރުސަތުދީ އެ ކުޅުންތެރިން ގޮވައިގެން މަސައްކަތް ކުރާ ކޯޗެއްގެ ގޮތުގަ އެވެ.
އަންހެން ގައުމީ ޓީމާ ހަވާލުވުމަށް ފަހު ސޮފްވާން "އަދަދު" އާ ވާހަކަ ދައްކަމުން ބުނީ ވޮލީ ކޯޗުކަމަށް ނުކުތީއްސުރެ އެއް އަޒުމެއް އޮންނަ ކަމަށާއި އެއީ ގައުމީ ޓީމާ އެކު, ކާމިޔާބީ އެއް ހޯދުން ކަމަށެވެ.
"ވޮލީ ކޯޗިން އަށް ނުކުތީއްސުރެ އެއް އަޒުމް ކަނޑައަޅައިގެން މި ހުންނަނީ. ގައުމީ ޓީމާ އެކު, ކާމިޔާބު ހޯދުން. އެކަން އިރާދަކުރެއްވިއްޔާ ކުރެވޭތޯ މަސައްކަތް ކުރާނަން. ދެން ވޮލީގައި ގިނައިން މި އުޅެވެނީ އަންހެން ޓީމުތަކާ އެކީ. އެންމެ ފުރަތަމަ ޓާގެޓަކީ, މި އަހަރު ރާއްޖޭގައި މި އޮންނަ ކާވާ މުބާރާތުގެ ފައިނަލް ކުޅުން." ސޮފްވާން ބުންޏެވެ.
ގައުމީ ސީނިއާ އަދި ޖޫނިއާ އަންހެން ވޮލީބޯޅަ ޓީމަށް ހަމަޖައްސާފައިވާ ކޯޗުން.
އޭނާ ބުނީ އެންމެ ފަހުން ނިމުނު ކާވާ ސެންޓްރަލް ޒޯން މުބާރާތުގެ ނަތީޖާއާ އެކު, ރާއްޖެ ރޭންކު ކޮށްފައިވަނީ ހަތަރު ވަނައިގަ ކަމަށެވެ. އެކަމަކު، މި އަހަރު އަމިއްލަ ފަސްގަނޑުގައި އޮންނަ މުބާރާތުން އެއްކޮޅުން ފައިނަލް ކުޅުން އެއީ ޓާގެޓެއް ކަމަށް ސޮއްޕެ ބުންޏެވެ.
ސޮފްވާންއާ އެކު, އެސިސްޓަންޓް ކޯޗެއްގެ ގޮތުގައި މަސައްކަތް ކުރާނީ އަހުމަދު އަދީލް (ބޭބެ) އެވެ.
މީގެ އިތުރުން މިއަދު ވަނީ ރާއްޖޭގެ 20 އަހަރުން ދަށުގެ ގައުމީ ޓީމުގެ ކޯޗަކަށް ޕޮލިސް ކުލަބްގެ ކުރީގެ ކޯޗު ފަތުހުالله ވަހީދު (ފައްލޮ) ހަމަޖައްސައިފަ އެވެ. ގައުމީ އަންހެން ޓީމުގެ ހެޑްކޯޗުކަން ވެސް ކޮށްފައިވާ ފައްލޮއާ އެކު އެ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތް ކުރާނީ އިސްމާއިލް ޖިނާހް އެވެ. އަދި ޖޫނިއާ ޓީމުގެ ޓްރެއިނާ އެއްގެ ގޮތުގައި މަސައްކަތް ކުރާނީ މަރިޔަމް ހަލީމް އެވެ.
