އަންނަ މަހުގެ އަށެއްގައި ބައިނަލްއަގުވާމީ ގޮތުން ފާހަގަކުރާ ކަނޑުތަކުގެ ދުވަސް ގައުމީ ފެންވަރުގައި ފާހަގަކުރުމުގެ ގޮތުން ގިނަ ހަރަކާތްތަކެއް ހިންގުމަށް ރާވާފައިވާ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓްރީން ބުނެފި އެވެ.
އެ މިނިސްޓްރީގެ ސޯޝަލް މީޑިއާގައި އެ ދުވަހު އަދި ދުވަހާ ގުޅިގެން ހިންގާ ހަރަކާތްތައް ހިއްސާކޮށްފައިވާއިރު، މިނިސްޓްރީން މީޑިއާތަކަށް ދިން މައުލޫމާތުގައި ބުނެފައިވަނީ ރާއްޖޭގެ ހުރިހާ ރަށެއްގައިވެސް ކަނޑުތަކުގެ ދުވަސް ފާހަގަކުރާނެ ކަމަށެވެ.
އެގޮތުން، "އެންމެން މޫދަށް" ގެ ނަމުގައި ރަށްރަށުގައި ވީހާވެސް ގިނަބަޔަކު ބައިވެރިވާ ހަރަކާތްތަކެއް ޖޫން މަހުގެ 8 ވަނަ ދުވަހު ކުރިއަށް ގެންދިއުމަށް މަސައްކަތް ކުރަމުންދާ ކަމަށާއި މި ހަރަކާތް ރަށްރަށުގައި ހިންގުމަށް ކައުންސިލްތަކާއި މުއައްސަސާތަކާ ގުޅިގެން މަސައްކަތް ކުރަމުންދާ ކަމަށް މިނިސްޓްރީން ބުންޏެވެ.
އޭގެއިތުރުން، ރާއްޖޭގެ ހުރިހާ ސްކޫލަކަށް ހުޅުވާލައިގެން އިނާމު ދޭގޮތަށް މަޒުމޫނު މުބާރާތްތަކެއް ބޭއްވުމާއި، މިނިސްޓްރީގެ މީސް މީޑިއާ މެދުވެރިކޮށް ޖޫން 1-8 އަށް ކޮންމެ ދުވަހަކުވެސް ރާއްޖޭގެ ކަނޑުފަޅާ ބެހޭ އާންމު މައުލޫމާތު ހިއްސާކުރުމުގެ ހަރަކާތެއްވެސް ކުރިއަށްދާނެ ކަމަށްވެ އެވެ.
މިނިސްޓްރީން ރާވާފައިވާ އިތުރު ހަރަކާތްތަކުގެ ތެރޭގައި ސޯޝަލް މީޑިއާ މެދުވެރިކޮށް ބާއްވާ ކުއިޒް މުބާރާތަކާއި، މާލެ ސަރަހައްދުގެ ސުކޫލުތަކުގެ ދަރިވަރުންނަށް އަމާޒުކޮށްގެން ދުވަހާ ގުޅޭ މައުލޫމާތު ސެޝަނެއް ކުރިއަށް ގެންގޮސް ސެޝަންގައި ބައިވެރިވާ ދަރިވަރުން، މޫދަށް އަޅާ ކުނި މަދު ކުރުމަށް ގަރާރެއްގައި ސޮއި ކުރުންވެސް ހިމެނެ އެވެ.
މީގެއިތުރުން، މާލެ ސަރަހައްދުގައި ކުޑަކުދިންނަށް ކަނޑު އަޑީގެ މަންޒަރުތައް ދެއްކުމަށް ހާއްސަ ޑައިވް ސެޝަނެއް ބޭއްވުމުގެ އިތުރުން، ދުވަހާ ގުޅުވާ ް "ކަނޑުރޯދި އުފާ ފެސްޓިވަލް"ގެ ނަމުގައި ކުޑަކުދިންގެ ހަވީރެއްވެސް ބާއްވާނެ ކަމަށް ކަނޑުތަކާ ބެހޭ ވުޒާރާއިން ބުނެފައިވެ އެވެ.
