ރައީސް މުހައްމަދު މުއިއްޒުގެ ރިޔާސީ ވައުދާ އެއްގޮތަށް މިފްކޯއަށް ކަޅުބިލަމަސް ގަންނަ އަގު 20 ރުފިޔާއަށް ވުރެ ކުޑަނުވާނެ ގޮތް ހެދޭނެ ތާރީހެއް ފިޝަރީޒް މިނިސްޓަރު އަހުމަދު ޝިޔާމަށް ވިދާޅެއްނުވެވުނެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޝިޔާމް ވިދާޅުވީ، ސަރުކާރުން މަސައްކަތް ކުރަމުންދަނީ ރިޔާސީ ވައުދު ފުއްދަން ކަމަށެވެ. އަދި "އަޅުގަނޑުމެން މި ދަނީ އެ ދިމާލަށް" ކަމަށް ވެސް މިނިސްޓަރު ވިދާޅުވި އެވެ.
"އިރާދަކުރެއްވިއްޔާ އަޅުގަނޑުމެން މި ދަނީ އެ [މަހުގެ އަގު ބޮޑު ކުރުމާ] ދިމާލަށް. ފުރަތަމަ ކަމަކަށް އަޅުގަނޑުމެން ބެލީ ބަރާބަރަށް މަސްވެރިން ބާނާ މަހަށް، މިފްކޯއަށް ކިރާ މަހަށް މަސްވެރިންނަށް ފައިސާ ދެވޭތޯ،" ޝިޔާމް ވިދާޅުވި އެވެ.
މަސްވެރިކަމާ ބެހޭ މިނިސްޓަރު ވިދާޅުވީ، ވެރިކަމާ ހަވާލުވުމަށްފަހު ސަރުކާރުން ބެލީ ފިޝަރީޒް އިންޑަސްޓްރީގައި ހަރަކާތްތެރިވާ ފަރާތްތަކަށް އެ މަސައްކަތުގައި ތިބެވޭނެ މަގު ތަނަވަސްކޮށްދިނުމަށް ކަމަށެވެ.
"އަޅުގަނޑުމެން ބެލީ ފުރަތަމަ ދިވެހިރާއްޖޭގެ މުޅި ސިނާއަތުގައި ހަރަކާތްތެރިވާ ފަރާތްތައް، އެއްވެސް ފަރާތެއް މި ސިނާއަތުން ބޭރުވިޔަ ނުދީ، ޕްރައިވެޓް ކުންފުނިތަކަށް ވެސް މި ސިނާއަތުގައި ތިބެވޭނެ މާހައުލެއް އުފައްދަން،" އޭނާ ވިދާޅުވި އެވެ.
ރައީސް މުއިއްޒު ވެރިކަމާ ހަވާލުވެވަޑައިގެންނެވި އިރު މަހުގެ އަގު އުޅެނީ 25 ރުފިޔާގަ އެވެ. އެކަމަކު، ޖޫން، 2024، ގައި ރައީސް ސަރުކާރުން ވަނީ މަހުގެ އަގުން 36 ޕަސެންޓު ކަނޑާލައިފަ އެވެ. މިހާރު އެންމެ ބޮޑުކޮށް ވެސް މިފްކޯއަށް ކަޅުބިލަމަސް ގަންނަނީ 16 ރުފިޔާ އަށެވެ.
ވައުދާ ހިލާފަށް މަހުގެ އަގު ތިރިކޮށްފައިވާތީ ޑިސެމްބަރު، 2024، ގައި ބޭއްވި ބައްދަލުވުމެއްގައި ވެސް ކެޔޮޅުން ވަނީ ޝަކުވާކޮށްފަ އެވެ. މަސްވެރިންގެ ޝަަކުވާތަކަށް ހައްލެއް ހޯދަން މަސައްކަތް ކުރައްވާނެ ކަމަށް ރައީސް އެއިރު ވެސް ވިދާޅުވި އެވެ. ނަމަވެސް މަސް ގަންނަ އަގު ބޮޑު ކުރައްވާނެ ކަމަށް ސީދާ ވިދާޅެއްނުވެ އެވެ.
އޮކްޓޯބަރު، 2024، ގައި ރައްޔިތުންގެ މަޖިލީހުގައި ވާހަކަ ދައްކަވަމުން ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ ސަރުކާރުން މަހުގެ އަގު ތިރި ކުރީ ހެޔޮ ނިޔަތުގައި ކަމަށެވެ. އަދި ވިދާޅުވީ މަހުގެ އަގު ކަނޑައަޅަންޖެހޭނީ ދުނިޔޭގެ ބާޒާރުގައި އަގު ހުންނަ ގޮތަށް ބަލާފައި ކަމަށެވެ.
"އިރާދަކުރެއްވިއްޔާ މަސްވެރިންނަށް ބަރާބަރަށް ފައިސާ ދެމުން މި ސަރުކާރުން މި ދަނީ. މަހުގެ އަގު އެއީ ދުނިޔޭގެ ބާޒާރާ ގުޅިގެން ކަނޑައެޅޭ އަގަކަށް ވާންޖެހޭނެ. އެހެން ނޫނިއްޔާ ދެމެހެއްޓެނިވި ގޮތެއްގައި ދިވެހިރާއްޖޭގައި މަސްވެރިކަމުގެ ސިނާއަތެއް ނޯންނާނެ. މަހުގެ އަގަށް އެއިރު ބަދަލު އަޅުގަނޑުމެން ނުގެނައިނަމަހީ ދިވެހިރާއްޖޭގައި މި ސިނާއަތެއް ނޯންނާނެ، މިފްކޯ ކިޔާ ކުންފުންޏެއް، [ހިންގަން] ދިވެހި ރައްޔިތުންގެ ހުރިހާ ޓެކްސް ފައިސާއެއް މިފްކޯ ހިންގަން ހޭދަކޮށްގެން އަޅުގަނޑުމެން ތިބެންޖެހޭނީ،" ޝިޔާމް ވިދާޅުވި އެވެ.
މަހުގެ އަގު ދަށް ނުކުރައްވާނެ ކަމަށް ރިޔާސީ އިންތިހާބުގެ ކެމްޕެއިނުގައި މަދުވެގެން ފަސް ފަހަރު ރައީސް މުއިއްޒު ވައުދުވެވަޑައިގެންނެވި އެވެ. ހުރިހާ ފަހަރަކު ވެސް ވިދާޅުވެފައި ވަނީ މަސް ގަންނަ އަގު 20 ރުފިޔާއަށް ވުރެ ދަށް ނުކުރައްވާނެ ކަމަށެވެ. މަސްވެރި ރަށްރަށަށް ވަޑައިގެން ހާއްސަކޮށް އެ ވާހަކަ ދެއްކެވި އެވެ. އެގޮތުން މ. ދިއްގަރާއި ޅ. ނައިފަރާއި ކ. ގާފަރުގައި ރައީސް އެ ވައުދުވެވަޑައިގެންނެވި އެވެ.
