ގއ. ކޮލަމާފުށީގައި އެއްވެސް އިމާރާތެއް ނުކޮށް ގިނަ އަހަރުތަކެއް ވެފައިވާ 12 ގޯތި އެ ރަށު ކައުންސިލުން އަތުލައިފި އެވެ.
ކޮލަމާފުށި ކައުންސިލުން ނިމުނު ހަފުތާގެ ހޯމައިގައި ގެޒެޓުކުރި އިއުލާނެއްގައި ވަނީ 2006 ގައި ކޮލަމާފުށިން ދޫކޮށްފައިވާ ގޯތީގެ އިންފާރު ނުރާނާ ހުރި ގޯތިތަކުގެ އިންފާރު ރާނައި، އަދި ގޯތި ތެރެ އާއި، ގޯތި ހިމެނޭ މަގުފަޅި ސާފުކުރުމަށް ތަކުރާރުކޮށް ކައުންސިލުން އެންގި ކަމަށެވެ.
ނަމަވެސް، އެގޮތަށް އަމަލުކޮށްފައިނުވާ 12 ގޯއްޗެއް، އެ ގޯތިތައް ދޫކޮށްފައިވާ މީހުންގެ ކިބައިން ވަކިކުރުމަށް ކޮލަމާފުށި ކައުންސިލުގެ އާންމު ބައްދަލުވުމުގައި ނިންމާފައިވާ ކަމަށެވެ.
މި އިއުލާނާއި ގުޅޭ ގޮތުން ކޮލަމާފުށި ކައުންސިލު މެމްބަރު ރިޔާޒް ހުސެއިން "އަދަދު" އަށް ވިދާޅުވީ، ކައުންސިލުން ނަގާފައިވާ 12 ގޯއްޗަކީ 3،000 އަދި 4،000 އަކަފޫޓުގެ ގޯތިތަކެއް ކަމަށެވެ. އަދި އެ ގޯތިތަށް ދޫކޮށްފައިވާތާ 18 ވަރަކަށް އަހަރު ވެފައިވާއިރު ވެސް އެއްވެސް މަސައްކަތެއް ކޮށްފައި ނުވާކަން ފާހަގަކުރެއްވި އެވެ.
މީގެ އިތުރުން ގޯތިތަށް އެ މީހުންގެ ކިބައިން ވަކި ކުރިކަން ވަކިވަކިން އެ މީހުންނަށް ސިޓީ ފޮނުވައި އެންގުމުގެ އިތުރުން ގެޒެޓުކުރުމުގެ މަގުސަދަކީ، ކައުންސިލުގެ ނިންމުމާ ދެކޮޅަށް ކޯޓަށް މައްސަލަ ހުށަހަޅަން ބޭނުންވާ މީހުންނަށް އެ ފުރުސަތު ދިނުން ކަމުގައި ރިޔާޒު ވިދާޅުވި އެވެ.
"ގާތްގަނޑަކަށް 3،000 އާ 4،000 އަކަފޫޓުގެ ގޯތިތަކެއް އެއީ. އަޅުގަނޑުމެން އެ މީހުންނަށް ގޯތި ވަކިކުރިކަން އަންގަން ސިޓީ ވެސް ފޮނުވިން. 18 ވަރަކަށް އަހަރު ވީއިރު އެއްވެސް މަސައްކަތެއް ކޮށްފައެއް ނެތް،" ރިޔާޒު ފާހަގަކުރެއްވި އެވެ.
ރާއްޖޭގެ ބިމާ ބެހޭ ގާނޫނުގައި ވާގޮތުން ބަންޑާރަ ގޯއްޗެއް ދޫކުރެވޭ ތާރީހުން ފެށިގެން ފަސް އަހަރު ދުވަހުގެ ތެރޭގައި އެ ގޯއްޗެއްގައި ދިރިއުޅެން ނުފަށައިފި ނަމަ، އެ ގޯއްޗެއް ދޫކޮށްފައިވާ މީހާގެ ކިބައިން ގޯތި ވަކިކުރުމުގެ އިހުތިޔާރު ކައުންސިލުތަކަށް ލިބިގެންވެ އެވެ.
