މެންޗެސްޓާ (13 މެއި) - މެންޗެސްޓާ ޔުނައިޓެޑް އަތުުން އާސެލަން 1-0 ގެ ނަތީޖާ އަކުން މޮޅުވުމުން ލީގުގެ އިންތިޒާރު ފަހު މެޗަށް ކުރަން ޖެހިއްޖެ އެވެ.
ޔުނައިޓެޑްގެ ދަނޑުގައި ކުޅުނު މި މެޗުގެ 20 ވަނަ މިނެޓުގައި އާސެނަލުން ވަނީ ގޯލު ޖަހައި ލީޑު ނަގައިފަ އެވެ. ކައި ހަވާޓްސް ގެ އެހީތެރިކަމާއެކު މި ގޯލު އެ ޓީމަށް ޖަހައި ދިނީ ލިއެނާޑޯ ޓްރެސާޑް އެވެ. މި ގޯލާއެކު, ޔުނައިޓެޑުން ކުރިއަށްޖެހި, އާސެނަލްގެ ހާފަށް ބާރުބޮޑުކުރި އެވެ. އެގޮތުން ފުރަތަމަ ހާފު ނިމުމުގެ ކުރިން ގޯލެއް ޖެހޭތޯ ޔުނައިޓެޑުން ކުރި މަސައްކަތް ވަނީ ނާކާމިޔާބުވެފަ އެވެ.
ދެވަނަ ހާފު ފަށައިގެން އާސެނަލްގެ ގެބްރިއަލް މާޓެނަލީ ވަނީ ނުރައްކާތެރި ހަމަލާ އެއް ފޮނުވާލާފަ އެވެ. ޔުނައިޓެޑްގެ ދެ ކުޅުންތެރިން ކައިރިން ނައްޓާލުމަށް ފަހު މާޓެނަލީ ފޮނުވާލި ހަމަލާގެ ހުރަހަކަށްވީ ޔުނައިޓެޑްގެ ކީޕަރު އޮނާނާ އެވެ. އޭގެ ފަހުން ޑިކްލަން ރައިސް އޭރިއާ ބޭރުން ފޮނުވާލި ބާރު ހަމަލާވެސް ދިފާއު ކުރީ އޮނާނާ އެވެ.
މި ނަތީޖާ އާއެކު, އާސެނަލުން ލީގު ތާވަލުގެ އެއްވަނައިގައި އޮތީ ކުޅުނު 37 މެޗުން 86 ޕޮއިންޓް ހޯދައިގެންނެވެ. ދެވަނައިގައި މެންޗެސްޓާ ސިޓީ އޮތީ އެއް މެޗު މަދުން ކުޅެ 85 ޕޮއިންޓް ހޯދައިގެންނެވެ. އަދި ތިންވަނައިގައި އޮތް ލިވަޕޫލަށް 36 މެޗުން ލިބެނީ 78 ޕޮއިންޓެވެ. އާސެނަލަށް ލީގުގައި ބާކީ އޮތީ އެއް މެޗެވެ. އެހެންވެ, ލީގު ކަށަވަރުވާނީ އާސެނަލްގެ ފަހު މެޗަށްފަހުގަ އެވެ. އެކަމަކު ލީގު ކާމިޔާބުކުރުމުގެ އެޑްވާންޓޭޖް އާސެނަލަށްވުރެ ބޮޑަށް އޮތީ ސިޓީ އަށެވެ. އެއީ އެ ޓީމަށް ދެ މެޗު ބާކީ އޮތުމުންނެވެ.
