ފޮރިން މިނިސްޓަރު މޫސާ ޒަމީރު ރަސްމީ ދަތުރެއްގައި ގަތަރަށް ވަޑައިގެންފި އެވެ.
ފޮރިން މިނިސްޓްރީން ބުނީ މި މަހުގެ 11 އިން 13 އަށް ކުރައްވާ އެ ދަތުރުގައި ދެ ގައުމުގެ ގުޅުން ވަރުގަދަ ކުރުމަށްޓަކައި، ގަތަރުގެ ބޮޑުވަޒީރު އަދި ފޮރިން މިނިސްޓަރު ޝެއިޚް މުހައްމަދު ބިން އަބްދުއްރަހްމާން ބިން ޖާސިމް އަލް ތާނީއާއެކު މަތީ ފަންތީގެ މަޝްވަރާތަކެއް ޒަމީރު ކުރައްވާނެ ކަމަށެވެ.
ރާއްޖެ އާއި ގަތަރާ ދެމެދު ސިޔާސީ ގުޅުން ގާއިމުކުރެވުނުތާ 40 އަހަރު، މި އަހަރު ފުރޭނެ އެވެ.
ބޮޑުވަޒީރާ ބައްދަލު ކުރެއްވުމުގެ އިތުރު ގަތަރު ސަރުކާރުގެ އިސް ބޭފުޅުންނާ ބައްދަލު ކުރައްވައި، އެކި ދާއިރާތަކުން އެއްބާރުލުން އިތުރު ކުރުމުގެ ފުރުސަތުތަކާ ގުޅޭ ގޮތުން ވެސް މަޝްވަރާކުރައްވާނެ ކަމަށް ފޮރިން މިނިސްޓްރީން ބުންޏެވެ.
މިނިސްޓަރު ޒަމީރުއާއެކު މި ދަތުރުގައި ބައިލެޓަރަލްގެ ސެކްރެޓަރީ ޑރ. ހާލާ ހަމީދު، އެމްބެސެޑަރު އެޓް ލާޖް ޑރ. ފަޒީލް ނަޖީބު އަދި އެސިސްޓެންޓް ޑިރެކްޓަރު ލަމްހާ ސަލީމް ބައިވެރިވެވަޑައިގަންނަވަ އެވެ.
