އެފްއޭއެމް ވެޓެރަންސް ލީގުގައި ލެގޫންސް ސްޕޯޓްސް ކްލަބް އަތުން 5-0 އިން މޮޅުވެ، މޯލްޑިވްސް ސޮކަ މޭޓްސް (އެމްއެސްއެމް) އިން މޮޅަކާ އެކު މި ފަހަރުގެ މުބާރާތް ނިންމައިލައިފި އެވެ.
ސޮކަ މޭޓްސް، 2022 ވަނަ އަހަރުގެ ވެޓެރަންސް ލީގުގެ ފައިނަލުގައި 1-0 އިން ހުޅުމާލެ ވެޓެރަންސް އަތުން ބަލިވިއިރު، މިދިޔަ އަހަރުގެ ސެމީގައި އެ ޓީމުން ވަނީ ވެޓެރަންސް ލީގުގެ ސެމީގައި ވާދަކޮށްފަ އެވެ. ސެމީގައި ވެސް ބަލިވީ، ހުޅުމާލެ ވެޓެރަންސް އަތުންނެވެ. މި ފަހަރުގެ، ވެޓެރަންސް ލީގުގައި ސޮކަ މޭޓްސް މި ވަނީ ގްރޫޕް ސްޓޭޖުން ކަޓައިފަ އެވެ.
ގްރޫޕް ބީގައި މި ފަހަރުގެ މުބާރާތުގައި ވާދަކުރި ސޮކަ މޭޓްސް ނިންމާލީ ހަތަރު މެޗުން ހަ ޕޮއިންޓާ އެކު އެވެ. މި ގްރޫޕުން ސެމީގެ ފުރުސަތު ހޯދީ، އެއް ވަނައިގައި އޮތް މުއިވެޔޮ ފްރެންޑްސް އާއި ދެ ވަނައިގައި އޮތް ދަ ގްރާންޑޭ ސްޕޯޓްސް ކްލަބް އެވެ. ދެ ޓީމަށް ވެސް ވަނީ ތިން މެޗުން ނުވަ ޕޮއިންޓް ލިބިފަ އެވެ. ސޮކަ މޭޓްސް ހަ ޕޮއިންޓާ އެކު ތިން ވަނައިގައި އޮތްއިރު، ހަތަރެއްގައި އޮތް، ސްޓެލްކޯ އާއި ފުލުގައި އޮތް ލެގޫންސް އަށް ވަނީ ޕޮއިންޓެއް ލިބިފަ އެެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގެ ފުރަތަމަ ހާފުގައި ސޮކަ މޭޓްސް އިން ދެ ގޯލު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގެ ފަހުކޮޅުގަ އެވެ.
މެޗުގެ 14 ވަނަ މިނިޓްގައި ސޮކަ މޭޓްސް އަށް ލީޑުނަގައިދިނީ، އަހުމަދު ނިޝާން (ކާނޫ) އެވެ. އޭގެ ހަތަރު މިނިޓް ފަހުން، މުހައްމަދު މައުސޫމް ގޯލެއް ޖަހައި، ލީޑުފުޅާކޮށްދިނެވެ. ސޮކަ މޭޓްސް އިން ތިން ވަނަ ލަނޑު ޖެހީ، މެޗުގެ 59 ވަނަ މިނިޓްގައި، މުހައްމަދު ނިހާން ނަސީރު އެވެ. އިތުރު ވަގުތުގައި އަނެއް ދެ ލަނޑު ޖެހީ، ކާނޫ އާއި މޫސާ ހަސަން (މޫޗީ) އެވެ.
ވެޓެރަންސް މުބާރާތުގައި މިއަދު ހަވީރު ކުޅޭނީ، ގްރޫޕް އޭގެ ފަހު މެޗެވެ. ސެމީގެ ޖާގަ ޔަގީންކޮށްފައިވާ އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކުޅޭނީ ދިވެހި ސިފައިންގެ ކްލަބާ އެވެ. މި މެޗުން ސިފައިން ޕޮއިންޓެއް ހޯދައިފިނަމަ އެ ޓީމަށް ސެމީގެ ޖާގަ ލިބޭނެ އެވެ. ސިފައިން ބަލިވެއްޖެނަމަ، ހުރިއްޔާ ވެޓެރަންސް (ހުރާ) ސެމީގެ ފުރުސަތު ހޯދާނެ އެވެ.
