ފަސޭހަކަމާ އެކު ސްޓެލްކޯ ކްލަބް 5-1 އިން ބަލިކޮށް، މުއިވެޔޮ ފްރެންޑްސް، އެފްއޭއެމް ވެޓެރަންސް ލީގުގެ ސެމީ ފައިނަލުގެ ޖާގައެއް ޔަގީންކޮށްފި އެވެ.
މި ނަތީޖާއާ އެކު ގްރޫޕް ބީން ސެމީ އަށް ދަތުރުކުރި ދެ ޓީމު މި ވަނީ ޔަގީންވެފަ އެވެ. މިއަދުގެ މޮޅާ އެކު، މުއިވެޔޮ ވަނީ ގްރޫޕް ސްޓޭޖުގައި ހަތަރު މެޗު ކުޅެ، ނުވަ ޕޮއިންޓް ހޯދައި، އެއް ވަނަ އަށް ޖެހިލައިފަ އެވެ. ދަ ގްރާންޑޭ ސްޕޯޓްސް ކްލަބް ވެސް ސެމީ ފައިނަލަށް ދަތުރުކޮށްފައިވާއިރު، އެ ޓީމަށް ތިން މެޗުން ވަނީ ނުވަ ޕޮއިންޓް ލިބިފަ އެވެ.
ދަ ގްރާންޑޭ އަށް ބާކީ އޮތް ސްޓެލްކޯ މެޗުން ޕޮއިންޓެއް ހޯދައިގެން ވެސް ގްރޫޕްގެ އެއް ވަނަ އަށް އެރޭނެ އެވެ.
ހެންވޭރު ދަނޑުގައި މިއަދު ހަވީރު ކުޅުނު މެޗުގައި މުއިވެޔޮ ޓީމުގެ އަހުމަދު ނިޔާޒް (ނިޔާ) ވަނީ ހެޓްރިކެއް ހަދައިފަ އެވެ.
މެޗުގެ 14 ވަނަ މިނިޓްގައި ކޯނަރަކުން އޭރިއާތެރެއަށް ހުރަސްވި ބޯޅައެއް ސްޓެލްކޯ ކުޅުންތެރިންނަށް ސަލާމަތްނުކުރެވިގެން އުޅެނިކޮށް، ނިޔާ ވަނީ ގޯލަށް ބޯޅަ ފޮނުވާލައިފަ އެވެ. އޭގެ ދެ މިނިޓް ފަހުން، ކައުންޓަ އެޓޭކުގައި އަބްދުﷲ ސުޖާއު (ސުޖާ) ދިން ބޯޅައަކުން، މުއިވެޔޮގެ ދެ ވަނަ ލަނޑު ޖެހީ، އިބްރާހިމް ލަތީފް އެވެ. ފުރަތަމަ ހާފު ނިމުމުގެ ކުރިން އޭރިއާ ރޮނގުކައިރިން ގޯލުގެ ތިރީ ކަނަށް ބޯޅަ ފޮނުވާލައިގެން، ނިޔާ ވަނީ މުއިވެޔޮ އަށް ތިން ވަނަ ލަނޑެއް ޖަހައިދީފަ އެވެ.
ދެ ވަނަ ހާފް ފެށިގެން ހަ މިނިޓް ތެރޭ ސުޖާ ވަނީ މުއިވެޔޮ އަށް ހަތަރު ވަނަ ލަނޑެއް ޖަހައިފަ އެވެ. އޭގެ ފަހުން، މުއިވެޔޮ އިން ލަނޑު ޖަހާނެ ގިނަ ހުސް ފުރުސަތުތަކެއް ނަގާލި އެވެ. ނިޔާ އާއި އަހުމަދު ސައީދު (އައްމަޓީ) އަދި ސުޖާ އަށް ހުސްކޮށް ލިބުނު ބޯޅަތަކުގައި އަމިއްލަ އަށް ފޮނުވާލަން އުޅެގެން ފުރުސަތު ގެއްލުނީ އެވެ.
މުއިވެޔޮ ފަހަތުން ފަސޭހަކޮށްލުމުގެ ފައިދާނަގައި، ސްޓެލްކޯ އިން ވަނީ ލަނޑެއް ޖަހައިފަ އެވެ. މި ލަނޑު ޖެހީ، އިބްރާހިމް އަރިސް އެވެ. އޭގެ ފަހުން، ނިޔާ އަށް ލިބުނު ފުރުސަތެއްގައި މުއިވެޔޮގެ ފަސް ވަނަ ލަނޑު ޖަހައި، އޭނާގެ ހެޓްރިކް ފުރިހަމަކުރި އެވެ.
ގްރޫޕް ބީގެ ތިން ވަނައިގައި އޮތީ ތިން މެޗުން ތިން ޕޮއިންޓް ހޯދައިފައިވާ މޯލްޑިވްސް ސޮކަ މޭޓްސް (އެމްއެސް މޭޓްސް) އެވެ. ލެގޫންސް ހަތަރު ވަނައިގައި އޮތީ ތިން މެޗުން އެއް ޕޮއިންޓާ އެކު އެވެ. ސްޓެލްކޯ ފުލުގައި އޮތީ ތިން މެޗުން ޕޮއިންޓަކާ އެކު އެވެ.
ވެޓެރަންސް މުބާރާތުގައި މާދަމާ ކުޅޭ މެޗުގައި ބައްދަލުކުރާނީ ވިލިމާލެ ޔުނައިޓެޑާއި ހުއްރިއްޔާ ވެޓެރަންސް (ހުރާ) އެވެ. މެޗު ފަށާނީ 16:30 ގަ އެވެ. މި މެޗުން މޮޅުވެގެން، ހުރާ އަށް ސެމީގެ އުންމީދު ދެމެހެއްޓޭނެ އެވެ.
