އެފްއޭއެމް ވެޓެރަންސް ލީގުގައި މޯލްޑިވްސް ސޮކަ މޭޓްސް (އެމްއެސް މޭޓްސް) އަތުން 2-1 އިން މޮޅުވެ، މުއިވެޔޮ މުބާރާތުގެ ސެމީ ފައިނަލުގެ އުންމީދު ބޮޑުކޮށްފި އެވެ.
ނައިބު ރައީސް ހުސެއިން މުހައްމަދު ލަތީފް (ސެމްބެ)ގެ ކެޕްޓަންކަމުގައި ކުޅެމުން އަންނަ މުއިވެޔޮ ޓީމުން ވަނީ މިހާތަނަށް ކުޅުނު ތިން މެޗުގެ ތެރެއިން ދެ މެޗުން މޮޅުވެފަ އެވެ. ބަލިވީ ދަ ގްރާންޑޭ ސްޕޯޓްސް ކްލަބް އަތުންނެވެ. މުއިވެޔޮ އަށް ބާކީ ދެން އޮތީ މި މަހު 28 ވަނަ ދުވަހު ސްޓެލްކޯއާ ބައްދަލުކުރާ މެޗެވެ.
ގްރޫޕް ބީގައި ދަ ގްރާންޑޭ އާއި މުއިވެޔޮ ވަނީ ހަ ޕޮއިންޓް ހޯދައިފަ އެވެ. ދަ ގްރާންޑޭ އިން ދެ މެޗު ކުޅުނުއިރު، މުއިވެޔޮ އިން ވަނީ ތިން މެޗު ކުޅެފަ އެވެ. ސޮކަ މޭޓްސް އިން ވަނީ ތިން މެޗު ކުޅެގެން ތިން ޕޮއިންޓް ހޯދައިފަ އެވެ. ސޮކަ މޭޓްސް ވަނީ ދަ ގްރާންޑޭ އާއި މުއިވެޔޮ އަތުން ބަލިވެފަ އެވެ. މޮޅުވީ، ސްޓެލްކޯ އަތުންނެވެ. ސްޓެލްކޯ އާއި ލެގޫންސް ވަނީ ޕޮއިންޓެއް ހޯދައިފަ އެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގެ ހަ ވަނަ މިނިޓްގައި، މުއިވެޔޮ އަށް ލީޑުނަގައިދިނީ އަބްދުﷲ ސުޖާއު (ސުޖާ) އެވެ. އަހުމަދު ސައީދު (އަންމަޓީ) އޭރިއާތެރެއަށް ނަގައިދިން ބޯޅަ ކޮންޓްރޯލް ކޮށްލުމަށް ފަހު، ސުޖާ ވަނީ ސޮކަ މޭޓްސްގެ ކީޕަރު، އިމްރާން މުހައްމަދު އަށް ފުރުސަތެއް ނުދީ ގޯލަށް ފޮނުވާލައިފަ އެވެ.
މެޗުގެ 12 ވަނަ މިނިޓްގައި މުއިވެޔޮގެ ދެ ވަނަ ގޯލު ޖެހީ ވެސް ސުޖާ އެވެ. މި ފަހަރު އަންމަޓީ މަތިމަތިން ގޯލަށް އޮއްސާލަން ފޮނުވާލި ބޯޅަ ކީޕަރު އިމްރާން އަތުގައި ޖެހި، ދަނޑީގައި ވެސް ޖެހިފައި ނުކުތް ވަގުތު، ރީބައުންސް ބޯޅަ ސުޖާ ވަނީ ގޯލަށް ވައްދާލައިފަ އެވެ.
މަޝްހޫރު ގިނަ ކުޅުންތެރިންތަކެއް ހިމެނޭ، ސޮކަ މޭޓްސް ޓީމުގެ ކެޕްޓަން، އައްސަދު އަބްދުލް ގަނީ ލަނޑެއް ޖެހޭތޯ ގިނަ އެޓޭކްތަކެއްގައި ބައިވެރިވި އެވެ. ސޮކަ މޭޓްސް އަށް ލަނޑެއް ޖެހުނީ މެޗުގެ ދެ ވަނަ ހާފުގަ އެވެ. މުއިވެޔޮ ކުޅުންތެރިން އޮފްސައިޑަށް އަތްނަގައިގެން ތިއްބައި، އެ މަޅިން ސަލާމަތްވެ، ސޮކަ މޭޓްސްގެ ލަނޑު ޖެހީ އަހުމަދު ނިޝާން (ކާނޫ) އެވެ. އޭނާ ވަނީ ހަމަޖެހިލައިފައި ތިރިތިރިން ގޯލަށް ބޯޅަ ފޮނުވާލައިފަ އެވެ.
އިތުރު ގޯލެއް ޖަހައި، ނަތީޖާ ހަމަހަމަ ކުރަން ސޮކަ މޭޓްސް އިން ކުރި މަސައްކަތް ކާމިޔާބެއްނުވި އެވެ.
މުބާރާތުގައި މިއަދު ހަވީރު، 16:30 ގައި ފަށާ މެޗުގައި ބައްދަލުކުރަނީ، އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކްލަބް އާއި ހުއްރިއްޔާ ސްޕޯޓްސް ކްލަބް (ހުރާ) އެވެ.
