އެފްއޭއެމް ވެޓެރަންސް ލީގުގައި ވިލިމާލެ ޔުނައިޓެޑް އަތުން ޕޮލިސް ކްލަބުން 5-0 އިން ފަސޭހަ މޮޅެއް ހޯދައިފި އެވެ.
މި ނަތީޖާއާ އެކު ފުރަތަމަ ކުޅުނު ތިން މެޗުން ބަލިވެ، ވިލިމާލެ ޔުނައިޓެޑް ވަނީ މުބާރާތުން ކަޓައިފަ އެވެ. ފުރަތަމަ މެޗުން ހުޅުމާލެ ވެޓެރަންސް އަތުން ވިލިމާލެ ޔުނައިޓެޑް ބަލިވީ 7-0 އިންނެވެ. ދެ ވަނަ މެޗުން، ވިލިމާލެ ޔުނައިޓެޑް ވަނީ ދިވެހި ސިފައިންގެ ކްލަބް އަތުން، 5-0 އިން ބަލިވެފަ އެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި، ފުރަތަމަ ހާފުގައި ޕޮލިހަށް ލީޑުނަގައިދިނީ، 14 ވަނަ މިނިޓްގައި މުހައްމަދު ނާފިއު އެވެ. އޭގެ ތިން މިނިޓް ފަހުން، ޕޮލިހުގެ އަހުމަދު ސައީދު ވަނީ ލަނޑެއް ޖަހައި ލީޑުފުޅާކޮށްދީފަ އެެވެ.
ދެ ވަނަ ހާފުގައި ވެސް ސިފައިންގެ ފުރަތަމަ ލަނޑު ޖަހައިދިނީ ނާފިއު އެވެ. އޭގެ ފަހުން، އަހުމަދު ސައީދު އާއި ހުސެއިން ސިފާޒް ވަނީ ގޯލެއް ޖަހައިފަ އެވެ.
ސާޅީސް އަހަރުން މަތީގެ ކުޅުންތެރިންނަށް މި ފަހަރުގެ ވެޓެރަންސް މުބާރާތް ހާއްސަކޮށްފައިވާއިރު، ގްރޫޕް އޭ ގައި ހިމެނެނީ، އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކްލަބްގެ އިތުރުން، ވިިލިމާލެ ޔުނައިޓެޑާއި، ޕޮލިސް ކްލަބް، ހުއްރިއްޔާ (ހުރާ) އަދި ދިވެހި ސިފައިންގެ ކްލަބް އެވެ. ހުޅުމާލެ ވެޓެރަންސް ހަ ޕޮއިންޓް ހޯދާފައިވާއިރު، ސިފައިންނާއި ހުރާ އަށް ވަނީ ހަތަރު ޕޮއިންޓް ލިބިފަ އެވެ. ޕޮލިހަށް ތިން ޕޮއިންޓް ލިބިފައިވާއިރު، ވިލިމާލެ ޔުނައިޓެޑަށް އަދި ޕޮއިންޓެއް ނުލިބެ އެވެ.
މުބާރާތުގައި މިއަދު ހަވީރު ކުޅޭ މެޗުގައި މޯލްޑިވްސް ސޮކަ މޭޓްސް (އެމްއެސް މޭޓްސް) ކުޅޭނީ މުއިވެޔޮ ފްރެންޑްސްއާ އެވެ. މެޗު ފަށާނީ 16:30 ގަ އެވެ.
