މިހާރު ކުރިއަށްދާ އެފްއޭއެމް ވެޓެރަންސް ލީގުގައި ލެގޫންސް ސްޕޯޓްސް ކްލަބުން ލީޑުނަގާފައިވަނިކޮށް ސްޓެލްކޯ ކްލަބުން 1-1 އިން އެއްވަރުކޮށްފި އެވެ.
މި މެޗަށް ނުކުތްއިރު، ލެގޫންސް އާއި ސްޓެލްކޯ ވަނީ ކުޅުނު ފުރަތަމަ މެޗުން ބަލިވެފަ އެވެ. ސްޓެލްކޯ ބަލިވީ މޯލްޑިވްސް ސޮކަ މޭޓްސް (އެމްއެސް މޭޓްސް) އަތުންނެވެ. ލެގޫންސް ވަނީ މުއިވެޔޮ ފްރެންޑްސް އަތުން ބަލިވެފަ އެވެ.
ހެންވޭރު ދަނޑުގައި އިއްޔެ ކުޅުނު މެޗުގެ ފުރަތަމަ ހާފު ނިމިގެންދިޔައިރު، ސްޓެލްކޯ އާއި ލެގޫންސް ތެރެއިން އެއްވެސް ޓީމަކަށް ގޯލެއް ޖެހިފައިނުވެ އެވެ. ދެ ޓީމަށް ވެސް ލަނޑު ޖަހާނެ މާ ހުސް ފުރުސަތުތަކެއް ތަނަވަސްކުރެވޭ ގޮތެއްނުވި އެވެ.
މެޗުގައި ލީޑުނެގީ، ދެ ވަނަ ހާފުގައި ލެގޫންސް އިންނެވެ. އެ ޓީމުގެ ލަނޑު މެޗުގެ 42 ވަނަ މިނިޓްގައި ޖެހީ، އަބްދުﷲ ހަސަން (އައްޅޯ) އެވެ. އޭނާ މި ގޯލު ޖެހީ، ކޯނަރެއްގައި އޭރިއާތެރެއަށް ހުރަސްވި ބޯޅައެއް ސްޓެލްކޯ ކުޅުންތެރިންނަށް ސަލާމަތްނުކުރެވިދިޔަ ވަގުތުގައި ފުންމައިގެން އަރައި ބޮލުން ގޯލަށް ފޮނުވާލައިގެންނެވެ.
ސްޓެލްކޯ އިން އެއްވަރުކުރީ މެޗުގެ ފުރިހަމަ ވަގުތު ހަމަވާން ތިން މިނިޓަށް ވެފައި ވަނިކޮށެެވެ. ކައުންޓަ އެޓޭކެއްގައި ތަނަަވަސްވި ފުރުސަތެއްގައި ސްޓެލްކޯގެ މި ލަނޑު ޖަހައިދިނީ، އަހުމަދު ޝިޔާން އެވެ. އޭނާ ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ.
ސާޅީސް އަހަރުން މަތީގެ ކުޅުންތެރިންނަށް ހާއްސަކޮށް ކުޅޭ މި ފަހަރުގެ ވެޓެރަންސް މުބާރާތުގައި، ކޮންމެ ޓީމެއްގައި ވެސް 35 އަހަރުން މަތީގެ ދެ ކުޅުންތެރިން ހިމެނުމުގެ ފުރުސަތު އޮވެ އެވެ.
މުބާރާތުގައި މިއަދު ހަވީރު ކުޅޭ މެޗުގައި ބައްދަލުކުރާނީ ފުރަތަމަ ދެ މެޗުން ބަލިވެފައި އޮތް ވިލިމާލެ ޔުނައިޓެޑާއި ޕޮލިސް ކްލަބް އެވެ. މެޗު ފަށާނީ 16:30 ގަ އެވެ.
