މިހާރު ކުރިއަށްދާ އެފްއޭއެމް ވެޓެރަންސް ލީގު 2024ގައި ހުއްރިއްޔާ ސްޕޯޓްސް ކްލަބް (ކ.ހުރާ) އާއި ދިވެހި ސިފައިންގެ ކްލަބް 1-1 އިން އެއްވަރުވެއްޖެ އެވެ.
މި މެޗަށް އައިއިރު، މި ދެ ޓީމު ވެސް ވަނީ ފުރަތަމަ ކުޅުނު މެޗުން މޮޅުވެފަ އެވެ. ހުރާ އިން 3-0 އިން ޕޮލިސް ކްލަބް ބަލިކުރިއިރު، ވިލިމާލެ ޔުނައިޓެޑް އަތުން ސިފައިން މޮޅުވީ، 6-0 އިންނެވެ. އެހެންވެ، އިއްޔެގެ މެޗަށް ނުކުތްއިރު ހުރާ އާއި ސިފައިން އޮތީ ރަނގަޅު ފޯމު ދަމަހައްޓަން ކެތްމަދުވެފަ އެވެ.
ހެންވޭރު ދަނޑުގައި ކުރިއަށްދާ މި ފަހަރުގެ ވެޓެރަންސް ލީގުގައި އިއްޔެ ހަވީރު ފުރަތަމަ ލީޑުނެގީ ހުރާ އިންނެވެ. އެ ޓީމުން ލަނޑު ޖެހީ ދެ ވަނަ ހާފުގެ ކުޅުން ފެށިގެން ދެ ވަނަ މިނިޓްގަ އެވެ. މިއީ ހިލޭ ޖެހުމެއްގައި އާދަމް ލަރީފް (ރޮނާ) ނެގި ބޯޅައަކަށް އަރައި، ހުރާގެ ކެޕްޓަން، މައުސޫމް އަބްދުލް ގަފޫރު (މާސޭ) ޖެހި ގޯލެކެވެ.
ލީޑުފުޅާކުރަން ހުރާގެ ފޯވާޑް އަލީ ޝިހާމް (އައްޔަ) އާއި ރޮނާ އަށް ރަނގަޅު ބޯޅަތަކެއް ލިބި އެންމެ ރަނގަޅަށް ބޭނުމެއް ނުކުރެވުނެވެ.
ސިފައިން ނަތީޖާ ހަމަހަމަކުރީ މެޗު ނިމެން، ދެ މިނިޓަށް ވެފައި ވަނިކޮށެވެ. އޭރިއާ ރޮނގުކައިރިން ސިފައިންގެ ޓީމުގެ އަބްދުލް ސަމަދު ޖެހި ބޯޅަ އަމާޒުވީ ގޯލުގެ މަތީ ކަނަށެވެ.
މުބާރާތުގައި މިއަދު ހަވީރު 16:30 ގައި ފަށާ މެޗުގައި ބައްދަލުކުރާނީ ލެގޫންސް ސްޕޯޓްސް ކްލަބާއި ސްޓެލްކޯ ކްލަބް އެވެ.
