އެފްއޭއެމް ވެޓެރަންސް ލީގުގައި ދަ ގްރާންޑޭޭ ސްޕޯޓްސް ކްލަބުން ފަހު ވަގުތު 3-2 އިން މުއިވެޔޮ ބަލިކޮށް، މުބާރާތުގައި ދެ ވަނަ މޮޅު ހޯދައިފި އެވެ.
މިދިޔަ އަހަރުގެ ރަނަރަޕް، ކ. މާފުށްޓަށް ނިސްބަތްވާ ދަ ގްރާންޑޭ އިން ވަނީ ފުރަތަމަ މެޗުގައި މޯލްޑިވްސް ސޮކަ މޭޓްސް (އެމްއެސް މޭޓްސް) 2-1 އިން ބަލިކޮށްފަ އެވެ. ދެ ވަނަ މެޗުގައި މުއިވެޔޮ އަތުން މޮޅުވީ ފަހަތުން އަރަ އެވެ.
ހެންވޭރު ދަނޑުގައި އިއްޔެ ހަވީރު ކުޅުނު މެޗުގައި ލީޑުނެގީ، ހޫދު ނިޒާރު ޖެހި ގޯލުން ދަ ގްރާންޑޭ އިންނެވެ. އެކަމަކު، އަބްދުﷲ ސުޖާއު (ސުޖާ) ގޯލެއް ޖަހައި، މުއިވެޔޮ އަށް އެއްވަރުކޮށްދިނެވެ. އަދި ނައިބު ރައީސް ހުސެން މުހައްމަދު ލަތީފް (ސެމްބެ) ވެސް ކުޅުއްވާ، މުއިވެޔޮ އިން ވަނީ ގައުމީ ޓީމުގެ ކުރީގެ ފުލްބެކް، އަހުމަދު ސައީދު (އަންމަޓީ)ގެ ގޯލުން ލީޑުނަގައިފަ އެވެ.
ދަ ގްރާންޑޭ އިން އެއްވަރުކުރީ، މެޗުގެ ފުރިހަމަ ވަގުތު ހަމަވާން ފަސް މިނިޓަށް ވެފައި ހުއްޓައި، އިބްރާހިމް ޒައީމް ޖެހި ގޯލުންނެވެ. މެޗުގެ އިތުރު ވަގުތުގައި ޓީމު މޮޅުކޮށްދިން ގޯލު ޖެހީ ވެސް ޒައީމް އެވެ.
ގްރޫޕް ބީގެ އެއް ވަނައިގައި ކުޅުނު ދެ މެޗުން ވެސް މޮޅުވެގެން އޮތީ ހަ ޕޮއިންޓާ އެކު ދަ ގްރާންޑޭ އެވެ. މި ގްރޫޕްގައި ހިމެނޭ މުއިވެޔޮ އާއި ސޮކަ މޭޓްސް އަތުގައި ވެސް ތިން ޕޮއިންޓް އެބައޮތެވެ. ލެގޫންސް އާއި ސްޓެލްކޯ އަށް އަދި ޕޮއިންޓެއް ނުލިބެ އެވެ. މި ގްރޫޕުން ދެން އެންމެ އަވަހަށް ކުޅޭ މެޗުގައި ބައްދަލުކުރާނީ މި ދެ ޓީމެވެ.
ސާޅީސް އަހަރުން މަތީގެ ކުޅުންތެރިންނަށް ހާއްސަ މި ފަހަރުގެ ވެޓެރަންސް މުބާރާތުގައި 10 ޓީމު ކުޅޭއިރު، ކޮންމެ ޓީމެއްގައި ވެސް 35 އަހަރުން މަތީގެ ދެ ކުޅުންތެރިން ހިމެނޭނެ އެވެ. މުބާރާތުގައި މިއަދު ހަވީރު ކުޅޭ މެޗުގައި ބައްދަލުކުރަނީ، ހުއްރިއްޔާ (ހުރާ) އާއި ދިވެހި ސިފައިންގެ ކްލަބް އެވެ. މެޗު ފަށާނީ 16:30 ގަ އެވެ.
