އެފްއޭއެމް ވެޓެރަންސް ލީގު 2024 ގައި މިއަދު ހަވީރު ޕޮލިސް ކްލަބް އަތުން 4-0 އިން ފަސޭހަ މޮޅެއް ހޯދައި، އެންމެ ފަހުގެ ޗެމްޕިއަން ހުޅުމާލެ ވެޓެރަންސް އިން އެ ޓީމުގެ ރަނގަޅު ފެށުން ދަމަހައްޓައިފި އެވެ.
އެންމެ ފަހުން ދެ ފަހަރު ވެސް ތަށި އުފުލާލި ހުޅުމާލެ ވެޓެރަންސް ޓީމުން މި ފަހަރުގެ މުބާރާތް ފެށީ ވިލިމާލެ ޔުނައިޓެޑް އަތުން 7-0 އިން ކުރިހޯދައިގެންނެވެ.
މިއަދު ވެސް ކޮޅަށް ގޯލަށް ވަނަނުދީ ހުޅުމާލެ ވެޓެރަންސް އިން ހޯދީ ފުރިހަމަ މޮޅެކެވެ.
ހެންވޭރު ދަނޑުގައި ކުރިއަށްދާ މި ފަހަރުގެ މުބާރާތުގައި މިއަދު ކުޅުނު މެޗުގެ ފުރަތަމަ ހާފުގައި ހުޅުމާލެ ވެޓެރަންސް އިން ވަނީ ލީޑުނަގައިފަ އެވެ. އެ ޓީމަށް ގޯލު ހުޅުވާލައިދިނީ، މެޗުގެ 22 ވަނަ މިނިޓްގައި މުހައްމަދު ޒިޔާދު ޖެހި ގޯލުންނެވެ.
ހުޅުމާލެ ވެޓެރަންސް ޓީމުގެ ކޮކީ ބޯޅަ ހިފައިގެންދަނީ.--- ފޮޓޯ: އަބްދުﷲ އަބީދު
ދެ ވަނަ ހާފުގައި ކުޅެން ނުކުމެ، ލިބުނު ޕެނަލްޓީ އަކުން އަހުމަދު މަމްދޫހު ވަނީ ހުޅުމާލެ ވެޓެރަންސް ޓީމަށް ދެ ވަނަ ލަނޑެއް ޖަހައިދީފަ އެވެ. ދެ ވަނަ ގޯލު ޖެހިތާ ދެ މިނިޓް ފަހުން، ހުޅުމާލެ ވެޓެރަންސް ޓީމުން ތިން ވަނަ ގޯލު ޖެހި އެވެ. މި ލަނޑު ޖަހައިދިނީ އާފިއު މުހައްމަދު ހާމިދު އެވެ.
މެޗުގައި ހުޅުމާލެ ވެޓެރަންސް ޓީމުގެ ފަހު ގޯލު ޖެހީ، އަލީ ޝަމީމް (ކޮޔަރު އައްޔަ) އެވެ.
މި މެޗުގައި ހުޅުމާލެ ވެޓެރަންސް ޓީމަށް އިތުރު ގޯލު ޖަހާނެ ފުރުސަތުތަކެއް ލިބިގެންދިޔަ ނަމަވެސް ބޭނުމެއް ނުކުރެވުނެވެ.
މުބާރާތުގައި މާދަމާ ހަވީރު ކުޅޭ މެޗުގައި ބައްދަލުކުރާނީ މުއިވެޔޮ އާއި ދަ ގްރާންޑޭ ސްޕޯޓްސް ކްލަބް އެވެ. ދަ ގްރާންޑޭ އިން ފުރަތަމަ މެޗުގައި ސޮކަ މޭޓްސް އަތުން މޮޅުވިއިރު، މުއިވެޔޮ އިން ފުރަތަމަ މެޗުގައި ލެގޫންސް ސްޕޯޓްސް ކްލަބްގެ މައްޗަށް ވަނީ ކުރިހޯދައިފަ އެެވެ. މުއިވެޔޮ އާއި ދަ ގްރާންޑޭ ކުޅޭ މެޗު ފަށާނީ މާދަމާ ހަވީރު 16:30 ގަ އެވެ.
