މިހާރު ކުރިއަށްދާ އެފްއޭއެމް ވެޓެރަންސް ލީގު 2024 ގައި، ނައިބު ރައީސް ހުސެއިން މުހައްމަދު ލަތީފް (ސެމްބެ)ގެ ގޯލާ އެކު، މުއިވެޔޮ އިން ލެގޫންސް ސްޕޯޓްސް ކްލަބްގެ މައްޗަށް 3-1 އިން ކުރިހޯދައިފި އެވެ.
ހެންވޭރު ދަނޑުގައި މި ފަހަރުގެ ވެޓެރަންސް މުބާރާތް ކުރިއަށްދާއިރު، އިއްޔެ ހަވީރު ކުޅުނު މެޗުގައި ފުރަތަމަ ލީޑުނެގީ، ދެ ވަނަ މިނިޓްގައި ލެގޫންސް އިންނެވެ. އެ ޓީމުގެ ލަނޑު ޖެހީ މުހައްމަދު އަރީފް އެެވެ.
ފުރަތަމަ ހާފު ނިމުމުގެ ކުރިން، އަހުމަދު ސައީދު (އަންމަޓީ) ވަނީ މުއިވެޔޮ އަށް އެއްވަރުކޮށްދީފަ އެވެ. އަދި ދެ ވަނަ ހާފުގައި މުއިވެޔޮ އިން ލީޑުނެގީ ވެސް އަންމަޓީ ޖެހި ގޯލުންނެވެ. މުއިވެޔޮ ޓީމުގެ ފަހު ގޯލަކީ، ޕެނަލްޓީ އަކުން އެ ޓީމުގެ ކެޕްޓަން، ހުސެއިން ކާމިޔާބުކުރި ގޯލެކެވެ.
ހުސެއިން އަކީ މުއިވެޔޮ ޓީމާ އެކު މީގެ ކުރިން އެކުގައި ގިނަ ފަހަރުތަކެއް މަތިން ކުޅެފައިވާ ކުޅުންތެރިއެކެވެ. ކްލަބް އީގަލްސްގެ ޗެއާމަންގެ މަގާމު އަދާކުރި ހުސެއިން ވަނީ އެފްއޭއެމްގެ ސީނިއާ ވައިސް ޕްރެޒިޑެންޓްގެ މަގާމު ވެސް އަދާކޮށްފަ އެވެ.
ތިރީސް ފަސް އަަހަރުން މަތީގެ ކުޅުންތެރިންނަށް ހާއްސަ ވެޓެރަންސް މުބާރާތުގައި މި ފަހަރު 10 ޓީމަކުން ވާދަކުރެ އެވެ. މުއިވެޔޮ ހިމެނެނީ ގްރޫޕް ބީގަ އެވެ. ގްރޫޕް ބީ ގައި ހިމެނެނީ، ދަ ގްރާންޑޭ ސްޕޯޓްސް ކްލަބް، އެމްއެސް މޭޓްސް، މުއިވެޔޮ، ލެގޫންސް ސްޕޯޓްސް ކްލަބް އަދި ކްލަބް ސްޓެލްކޯ އެވެ. މި ގްރޫޕްގެ ފުރަތަމަ މެޗުން ދަ ގްރާންޑޭ އިން ވަނީ އެމްއެސް މޭޓްސް ބަލިކޮށްފަ އެވެ.
