މެޑްރިޑް (މާޗް 16) - ރެއާލް މެޑްރިޑަށް ކުޅެމުން އަންނަ ބްރެޒިލް ފޯވާޑް ވިނީޝިއުސް ޖޫނިއާ އަށް ނަސްލީ ގޮތުން ދިމާ ކުރާ މައްސަލަ އެ ޓީމުން އެންމެ ފަހުން ފުލުހަށް ހުށަހަޅައިފި އެވެ.
މީގެ ކުރިންވެސް އެކި ފަހަރު މަތިން ވިނީޝިއުސްއާ ނަސްލީ ގޮތުން ދިމާ ކުރާ މައްސަލަ އެކި ފަހަރު މަތިން ފެންމަތިވި އެވެ. މި ފަހަކަށް އައިސް މި މައްސަލަ ދިމާވީ މި ހަފުތާގައި އެތުލެޓިކޯ އާއި އިންޓަ މިލާން ބައްދަލުކުރި މެޗު ފެށުމުގެ ކުރިން ސަޕޯޓަރުން ވިނީޝިއުސް އާ ނަސްލީ ގޮތުން ދިމާ ކުރާ ވީޑިއޯ އެއް ވަނީ އާންމުވެފަ އެވެ. މީގެ އިތުރުން ބާސެލޯނާ އާއި ނަޕޯލީ ބައްދަލުކުރި މެޗުގައި ވެސް ވިނީޝިއުސްއާ ނަސްލީ ގޮތުން ބާސެލޯނާގެ ސަޕޯޓަރުން ދިމާކުރާ ވީޑިއޯ އެއް ވަނީ އާންމުވެފަ އެވެ.
މިކަމާ ގުޅިގެން ރެއާލުން ނެރުނު ބަޔާނެއްގައި ބުނީ އެ ޓީމުން މި މައްސަލަ ކަމާބެހޭ އިދާރާތަކުގައި ރިޕޯޓުކުރާނެ ކަމަށެވެ.
"މިކަހަލަ ނަފްރަތު އުފެދޭ ބަސްތައް ރެއާލްގެ ކުޅުންތެރިންނާ ދިމާލަށް ބުނެ މަޖާކޮށް ހަދަން މި ކުލަބުން ފުރުސަތެއް ނުދޭނަން. މިކަން އެޓާނީ ޖެނެރަލް އޮފީހަށް ހުށަހަޅާނަން" ރެއާލްގެ ބަޔާނުގައި ބުނެފައިވެ އެވެ.
މިކަމާ ގުޅިގެން އެކްސްގައި ކުރި ޕޯސްޓެއްގައި، ވިނީޝިއުސް ބުނީ އެ ކުލަބުތަކާ ދެކޮޅަށް ފިޔަވަޅު އަޅާނެ ކަމަށް އުންމީދު ކުރާ ކަމަށެވެ.
"އަހަރެން އުންމީދު ކުރަން ޔުއެފާ އިން މި މައްސަލަ ބަލާ އެ ކުލަބުތަކާ ދެކޮޅަށް ފިިޔަވަޅު އަޅާނެ ކަމަށް. މިއީ ވަރަށް ދެރަކަމެއް ހާއްސަކޮށް އަހަރެން ނުކުޅޭ މެޗުތަކުގައި ވެސް މިކަން އެބަވޭ" ވިނީޝިއުސް ބުންޏެވެ.
މީގެ ކުރިން ވިނީޝިއުސް އާ ދިމާކުރި މައްސަލައިގައި ހަތް މީހުން ސްޕެއިންގެ ފުލުހުން ހައްޔަރުކުރި އެވެ. އަދި އޭގެ ތެރެއިން ފަސް މީހަކު ވަނީ ޖޫރިމަނާ ކޮށްފަ އެވެ.
ނަސްލީ ގޮތުން ވިނީޝިއުސްއާ ދިމާކުރާ މައްސަލައިގައި އޭނާއާ އެކު ހުރިކަން ދައްކުވައިދޭން ގިނަ ކުޅުންތެރިން އަންނަނީ ސޯޝަލް މީޑިއާގައި ޝުއޫރު ފާޅުކުރަމުންނެވެ.
