ސިޔާސީ ވިސްނުމުގައި ސަރުކާރު ކުންފުނިތަކުގެ މުވައްޒަފުން ވަޒީފާއިން ވަކިކުރާތީ ގާނޫނަށް ބަދަލު ގެންނަން ނިންމާފައިވާ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައި ތިމަރަފުށީ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓު ފަތުހުﷲ ޖަމީލް ރޭ ބޭއްވި ކެމްޕޭނު އިވެންޓެއްގައި، ކުރިން އިކޮނޮމިކް މިނިސްޓަރު ކަމާއި ރައްޔިތުންގެ މަޖިލީހުގެ މެމްބަރުކަން ވެސް ކުރެއްވި ފައްޔާޒް ވިދާޅުވީ މި ސަރުކާރާއެކު ކުންފުނިތަކުން މުވައްޒަފުން ވަކިކުރަން ފަށާފައިވާ ކަމަށެވެ. އެކަމުގެ ޝަކުވާ ރާއްޖޭގެ ހުރިހާ ހިސާބަކުން ލިބެމުންދާ ކަމަށާއި މި ސަރުކާރާއެކު އަނެއްކާ ވެސް ވަޒީފާގެ ބިރުވެރިކަން އިންތިހާއަށް ގޮސްފައިވާ ކަމަށް އޭނާ ވިދާޅުވި އެވެ.
"ދައުލަތުގެ ކުންފުނިތަކުގައި ހަރަކާތްތެރިވާ ހުރިހާ މުވައްޒަފުންނަށް އަޅުގަނޑު ދަންނަވާލަން އެއްވެސް ބިރެއް ނެތި ގާނޫނު އަސާސީން ލިބިދޭ ހައްގު ތިބޭފުޅުން ބޭނުން ކުރައްވާށޭ. ތިބޭފުޅުން ބޭނުން ގޮތަކަށް ސިޔާސީ ހަރަކާތް ކުރިޔަށް ގެންދެވޭނެއޭ،" ފައްޔާޒް ވިދާޅުވި އެވެ.
ވަކިކުރާ މުވައްޒަފުންގެ ވަޒީފާ އަނބުރާ އިޔާދަ ކުރެވޭ ގޮތަށް ގާނޫނަށް ބަދަލު ގެންނާނެ ކަމަށާއި، ބޭނުންހާ ގޮތަކަށް ސަރުކާރަށް މުވައްޒަފުން ނުކެނޑޭ ގޮތަށް ގާނޫނުތައް ހަދާނެ ކަމަށްވެސް ފައްޔާޒް ވިދާޅުވި އެވެ.
ފައްޔާޒް ވިދާޅުވީ މަޖިލީހުގައި އެމްޑީޕީގެ މެޖޯރިޓީ އެބަ އޮތް ކަމަށާއި، ގާނޫނު އެންމެ ރަނގަޅަށް ފާސްކުރާނެ ކަމަށެވެ. އަދި ސަރުކާރުގެ މިސްރާބު ހަމަ މަގަށް އެޅުވޭނީ އެމްޑީޕީއަށް މަޖިލިސް މެޖޯރިޓީ ލިބިގެން ކަމަށްވެސް އޭނާ ވިދާޅުވި އެވެ.
މި ސަރުކާރުން ސަރުކާރު ކުންފުނިތަކުގައި މަސައްކަތް ކުރަމުން އަންނަ ގިނަ އަދަދެއްގެ މުވައްޒަފުން ވަކި ކުރަމުން އަންނައިރު، އެމްޑީޕީން ވަނީ މީގެ ކުރިންވެސް އެކަމާ ކަންބޮޑުވުން ފާޅުކޮށްފަ އެވެ.
