މިހާރު ކުރިއަށްދާ އެފްއޭއެމް ވެޓެރަންސް ލީގު 2024 ގައި މިއަދު ކުޅުނު މެޗުން ދަ ގްރާންޑޭ ސްޕޯޓްސް ކްލަބުން 2-1 އިން މޯލްޑިވްސް ސޮކަ މޭޓްސް (އެމްއެސްއެމް) ބަލިކޮށްފި އެވެ.
މިދިޔަ އަހަރުގެ ފައިނަލުން ބަލިވި ދަ ގްރާންޑޭ އިން މި ފަހަރުގެ މުބާރާތް ވެސް ފަށާފައި މި ވަނީ ރަނގަޅު ޓްރެކުގަ އެވެ. ކ. މާފުށިން ސީދާ މެޗަށް އައިސް މިިދިޔަ އަހަރުގެ މުބާރާތުގައި ވެސް ޖުމްލަކޮށް، ދަ ގްރާންޑޭ އިން މޮޅު ކުޅުމެއް ދެއްކި އެވެ. މި ފަހަރުގެ ފުރަތަމަ މެޗުގައި ސޮކަ މޭޓްސް އަތުން މި ހޯދީ ރަނގަޅު މޮޅެކެވެ.
ހެންވޭރު ދަނޑުގައި މިއަދު ހަވީރު ކުޅުނު މެޗުގައި، ފުރަތަމަ ލީޑުނެގީ ސޮކަ މޭޓްސް އިންނެވެ. އެ ޓީމުގެ ލަނޑު ޖެހީ، މެޗުގެ 21 ވަަނަ މިނިޓްގައި އަހުމަދު އަޝްހަމް އެވެ.
ދަ ގްރާންޑޭ އިން ނަތީޖާ އަނބުރާލީ ފަހަތުން އަރަ އެވެ. އެ ގޮތުން، އެ ޓީމުން މެޗުގެ 34 ވަނަ މިނިޓްގައި ނަތީޖާ ހަމަހަމަކުރީ، މުހައްމަދު ޝަހީމް ޖެހި ގޯލުންނެވެ. އަދި އެ ޓީމު މޮޅުކޮށްދިން ލަނޑު ޖެހީ، އަލީ ނާޝިދު އެވެ.
ގްރޫޕް ބީ ގައި ހިމެނެނީ، ދަ ގްރާންޑޭ ސްޕޯޓްސް ކްލަބް، ސޮކަ މޭޓްސްގެ އިތުރުން، މުއިވެޔޮ، ލެގޫންސް ސްޕޯޓްސް ކްލަބް އަދި ކްލަބް ސްޓެލްކޯ އެވެ.
ތިރީސް ފަސް އަހަރުން މަތީގެ ކުޅުންތެރިންނަށް ހާއްސަކޮށްގެން ކޮންމެ ރޯދަ މަހެއްގައި ބާއްވާ މި މުބާރާތުގައި މާދަމާ ކުޅޭ މެޗުގައި ބައްދަލުކުރާނީ، ހުއްރިއްޔާ ސްޕޯޓްސް ކްލަބާއި ޕޮލިސް ކްލަބް އެވެ. މި ގްރޫޕްގެ ފުރަތަމަ މެޗުން، ވިލިމާލެ ޔުނައިޓެޑް އަތުން މުބާރާތުގެ އެންމެ ފަހުގެ ޗެމްޕިއަން، ހުޅުމާލެ ވެޓެރަންސް ކްލަބުން މޮޅުވީ 7-0 އިންނެވެ.
