މެޑްރިޑް (މާޗް 7) - ރެއާލް މެޑްރިޑަށް ކުޅެމުން އަންނަ އިނގިރޭސި މިޑްފީލްޑަރު، ޖޫޑް ބެލިންހަމް ދެ މެޗަށް ސަސްޕެންޑް ކުރަން ލަލީގާގެ ޑިސިޕްލިނަރީ ކޮމީޓީން ނިންމައިފި އެވެ.
ބެލިންހަމް، 20، ސަސްޕެންޑް ކުރީ އެންމެ ފަހުން ސްޕެނިޝް ލީގުގައި ރެއާލުން ވެލެންސިއާއާ 2-2 އިން އެއްވަރުވި މެޗުގައި ދެއްކި ރަތް ކާޑުގެ މައްސަލަ ބެލުމަށް ފަހު އެވެ.
އިތުރު ވަގުުތުގައި ރެއާލްގެ ޖޫޑް ބެލިންހަމް ޖެހި ގޯލުގެ ސިކުންތު ކޮޅެއް ކުރިން ރެފްރީ، ޖިލް މަންޒާނޯ މެޗު ނިންމާލުމާ އެކު، އެކަމާ ހިތްހަމަނުޖެހުން ފާޅުކުރުމުން ބެލިންހަމް އަށް ވަނީ ރަތް ކާޑެއް ދައްކައިފަ އެވެ. ރެފްރީ މެޗު ނިންމާލީ ބެލިންހަމް ބޮލުން ގޯލު ޖެހި ހުރަސް ނެގި ފަހުން، ކަމަށް ބުނެ، ރެއާލް ކުޅުންތެރިން ވަރަށް ބޮޑަށް އެޕީލްކުރި އެވެ. ބެލިންހަމް އަށް ރަތް ކާޑު ދެއްކީ ރެފްރީ، މަންޒާނޯއާ ދިމާލަށް ބުނި އެއްޗަކުންނެވެ.
މި މައްސަލައިގައި ބެލިންހަމް، ދެ މެޗަށް ސަސްޕެންޑްކުރިއިރު، ރެއާލުން ވަނީ އެޕީލްކޮށްފަ އެވެ. އެކަމަކު، ސްޕެއިނުގެ މީޑިއާ ރިޕޯޓްތައް ބުނާގޮތުން، ރެއާލްގެ މި އެޕީލް ކާމިޔާބުވުމުގެ ފުރުސަތެއް ނެތެވެ.
ޑޯޓްމަންޑް ދޫކޮށް މި ސީޒަނުގައި ރެއާލަށް ބަދަލުވެ، ބެލިންހަމް އަންނަނީ ތަފާތު ކުޅުމެއް ދައްކަމުންނެވެ. މި ސީޒަނުގެ ހުރިހާ މުބާރާތަކަށް ބަލާއިރު، ބެލިންހަމް ވަނީ 30 މެޗުން 20 ގޯލު ޖަހައި، ނުވަ ގޯލު ޖަހަން ފުރުސަތު ތަނަވަސްކޮށްދީފަ އެވެ.
ބެލިންހަމް ނުލައި، ސްޕެނިޝް ލީގުގެ އެއް ވަނައިގައި އޮތް ރެއާލުން ކުޅެން ޖެހޭނެ ދެ މެޗަކީ، އަމިއްލަ ދަނޑުގައި ސެލްޓަ ވިގޯއާ ކުޅޭ މެޗާއި ރަށުންބޭރުގައި އޮސަސޫނާއާ ބައްދަލުކުރާ މެޗެވެ. ބެލިންހަމްގެ ސަސްޕެންޝަން އެޕީލަށް ފަހު، ދިގުލައިފިނަމަ، އޭނާ އަށް އެތުލެޓިކް ބިލްބާއޯ މެޗު ވެސް ގެއްލުމުގެ ފުރުސަތު އެބައޮތެވެ.
